Wananchi Mtwara wazuia msafara wa kamati ya bunge ya Nishati na Madini.

Wananchi wa kata ya Msimbati, halmashauri ya wilaya ya Mtwara, wakifunga barabara kuzuia msafara wa kamati ya bunge ya Nishati na Madini ulioambatana na naibu waziri wa wizara ya Nishati na Madini Mhe. Medard Kalemani, kwa ajili ya kuwasilisha kero zao kwa naibu waziri huyo. 

Naibu waziri wa wizara ya Nishati na Madini, Mhe. Medard Kalemani, akiongea na wananchi wa Msimbati mkoani Mtwara waliozuia msafara wa kamati ya bunge ya Nishati na Madini, kwa ajili ya kuwasilisha kero zao

Na Juma Mohamed, Mtwara.

MSAFARA wa kamati ya Bunge ya Nishati na Madini ulioambatana na naibu waziri wa wizara hiyo, Dkt. Medad Kalemani, ulizuiwa na wananchi wa kata ya Msimbati halmashauri ya wilaya ya Mtwara kwa ajili ya kuwasilisha kero zao kwa naibu waziri ikiwamo gharama za umeme, kushuka kwa thamani ya ardhi na ubovu wa barabara.

Akizungumza kwa niaba yaw engine, Mohamed Shaban, alisema mwananchi analazimika kulipia hadi sh. 300,0000 pindi anapohitaji kupata nguzo ya kuvuta umeme nyumbani kwake na kudai kuwa kiasi hicho ni kikubwa ukilinganisha na hali ya maisha yao ilivyo na kwamba hawaoni faida ya kuwa na mradi wa gesi asilia ambao mitambo yake imejengwa huko.

Alisema, licha ya kuwa gesi asilia imeanza kutumika kuzalisha umeme lakni bado kumekuwa na tatizo la kukatika kwa huduma hiyo mara kwa mara jambo ambalo linayumbisha shughuli mbalimbali zinazohitaji umeme.

“Vilevile hata kama kuna mradi fuani kama wa uchimbaji visima au utafiti, fidia zile hazieleweki haziko wazi, kuna wakati mita moja ya ardhi ni sh. 80 kuna wakati sh. 1,170 kwa miaka ya nyuma ndio walilipa hivyo..lakini kadiri tunavyoenda thamani inashuka baadala ya kupanda, siamini kama kuna kokote duniani ardhi itashuka baadala ya kupanda..” alisema Shabani.

Wananchi

Aidha, walilalamikia ukosefu wa ajira kwa vijana wa eneo hilo ambao waliamini kuondokana na tatizo kutokana na kuwapo kwa mradi wa bomba la gesi uliotoa matumaini makubwa kwao na kudai kuwa wakihoji kwa wahusika wanaambiwa kuwa shughuli nyingine zinahitaji wataalamu zaidi.

Walisema walivyofanya uchunguzi waligundua kuwa shughuli hizo wanao uwezo wakuzifanya huku wakichagizwa na kauli zinazotolewa na baadhi ya viongozi wa serikali wakisisitiza kuwa wananchi wanaoishi katika maeneo yanayozungukwa kwa miradi ya uwekezaji wapewe kipaumbele cha ajira.

“Yani tunachotoka tujue ni masilahi ya mradi kuwepo katika eneo lenu, sisi hapa hatujajua, yani mradi upo hapa tulivyoambiwa tushirikiane tunashirikiana nao lakini lakini hatujui masilahi yake..leo hii tukishaghairi tukasema afadhali wafanye tu sisi hatuoni masilahi yake sawa..” alisema Salum Makanzu.

Kuhusu ubovu wa barabara inayotoka Mtwara mjini kwenda Msimbati, alisema ilianza kufanyiwa ukarabati wakati wa ujio wa waziri mkuu wa jamhuri ya muungano wa Tanzania, Mhe. Kassim Majaliwa, lakini kabla ya hapo hali ilikuwa mbaya zaidi.

Naye, Ismail Msuti, alilalamikia Marine Park kuwa imekuwa ikizuia maeneo mengine ambayo hayawahusu kwasababu awali walipewa kuhifadhi eneo la bahari ambalo ndilo waliloomba.

“Shida kubwa wamekuja kutuhifadhi na sisi wenyewe, kwamba mtu ukiwa na shamba kama unataka kuliuza, huwezi kuuza mpaka Marie Park wakubali..kuna shamba la mzee mmoja ilibidi ujengwe mnara wa voda na walisaini mkataba tayari, wakaja Marine Park wakazuia wakidai ni eneo la hifadhi.. kwahiyo kwa kifupi sisi Marine Park hatuna faida nayo na ni kero sisi wananchi..” alisema.

Akijibu hoja za wananchi hao, naibu waziri, alisema hoja zao ni za msingi na kumtaka meneja wa Shirika la Umeme Tanzania (TANESCO) mkoa wa Mtwara, Azizi Salum kutolea maelezo ambapo alidai kuwa tatizo la kukatika kwa umeme ni kutokana na kuzidiwa kwasababu laini inayopeleka umeme Msimbati ndio hiyo inayopeleka Tandahimba, Newala, Masasi, Nachingwea na Ruangwa.

Naibu waziri wa Nishati na Madini, Dkt. Medard Kalemani.

Kufuatia tatiz hilo, naibu waziri alimwagiza meneja huyo kuwajengea kituo kidogo cha kufua umeme (Sub Station) katani hapo ili umeme ukikatika Mtwara usikatike na huko, na kwamba utekelezaji wa agizo hilo uanze kuanzia wiki jayo.

Kuhusu suala la vijiji vinavyokosa umeme, alisema suala hilo lipo kwenye mpango wa utekelezaji kupitia mradi wa kusambaza umeme vijijini (REA) awamu ya pili ambao unatarajiwa kukamilika mwezi Juni mwaka huu.

“Lakini suala la gharama za umeme ni kweli ni kubwa sana kwa Mtwara, tulitarajia watu wa Mtwara kwasababu gesi inagundulika huku munufaike wakwanza, lakini mnajua kilichofanyika, gharama ya kuunganisha umeme kwa nchi nzima ni sh. 177,000 lakini kwa Mtwara tuliwaunganishia kwa sh. 99,000 tu mnalijua hilo?..kwahiyo tulishaanza kufanya hivyo, lakini kweli itabidi tuanze kufanya uchunguzi wa kina tuone namna gani nyie mnaweza kunufaika zaidi lakini kwasasa tumeshaanza kuchukua hatua..” alisema.