Ndanda Day yadunda Nangwanda Sijaona..Tamasha laingiza milioni 3, huenda likarudiwa

Azizi Sibo wa Ndanda Sc, akimsaidia mwenzake kuwadhibiti washambuliaji wa Azam Fc wakati wa mchzo wa kirafiki wa kuadhimisha siku ya Ndanda (Ndanda Day) uliopigwa jana katika uwanja wa Nangwanda Sijaona mkoani Mtwara na kumalizika kwa sare ya 1-1

Wachezaji wa Ndanda na Azam wakiwania mpira wakati wa mchezo wa kirafiki wa kuadhimisha siku ya Ndanda ( Ndanda Day) uliopigwa jana katika uwanja wa Nangwanda Sijaona mkoani Mtwara na kumalizika kwa sare ya 1-1

Mashabiki waliojitokeza kushuhudia mchezo kati ya Ndanda Sc na Azam Fc

Jukwaa kuu

Waandishi wa habari wakifanya yao 

Na Juma Mohamed

MWENYEKITI wa Chama cha Soka Mkoa wa Mtwara (MTWAREFA), Athumani Kambi, amesema, wameshindwa kufikia lengo katika mchezo wa kirafiki wa kuadhimisha siku ya Ndanda (Ndanda Day) katia ya wenyeji Ndanda Sc na Azam Fc, uliopigwa jana katika uwanja wa Nangwanda Sijaona mkoani hapa na kumalizika kwa sare ya bao 1-1.

Kambi alisema, lengo la mchez huo ulioingiza kiasi cha sh. Milioni 3.1 kutokana na mashabiki walioingia uwanjani ilikuwa ni kuwatambulisha wachezaji wapya kwa na kuchangisha fedha za kuisaidia timu hiyo, lakini halikuweza kufanikiwa kutokana na uchache wa mashabiki waliojitokeza.

Alisema kutokana na hali hiyo, wanaangalia uwezekano wa kurudia kufanya tamasha hilo kwa kuialika timu nyingine kabla ya kuanza kwa ligi kuu ili kuweza kufikia lengo ambapo alisema inahitajika kufanya hamasa zaidi kwa mashabiki ili wajitokeze kuona wachezaji wapya waliosajiliwa na timu yao.

“Hatujui kwanini imekuwa hivi lakini nadhani ni hamasa na sisi wenyewe tulichelewa kuitangaza mechi kwahiyo hatuwezi kulaumu mashabiki..kwahiyo tutajiandaa vizuri na kuitangaza mechi na tutarudia tamasha la Ndanda..” alisema.

Na kuongeza “tulichofarijika leo ni kuiona timu na kwa mtazamo wangu nimeona timu yetu ni nzuri kuliko ile ya mwaka jana, kwahiyo ninaimani kwamba mwaka huu tunaweza kufanya vizuri zaidi.” Aliongeza.

Kwa upande wao, baadhi ya mashabiki waliojitokeza uwanjani hapo kushuhudia kipute hicho walikuwa na maoni tofauti juu ya kiwango kilichoonyeshwa na timu yao na uchache wa mashabiki walioingia uwanjani.

Mzarubu Shaibu, alisema bado anaimani na timu hiyo kuwa itafanya vizuri katika ligi kuu msimu huu kutokana na namna alivyoona ikicheza ukiachiliambali ugeni wa baadhi ya wachezaji waliosajiliwa, ambapo alisema wakikaa pamoja kwa muda mrefu watazoeana na kutengeneza muunganiko nzuri na kuipa matokeo mazuri Ndanda.

Naye, Salum Mabomba, alisema sababu zilizopelekea mashabiki kutojitokeza kwa wingi uwanjani hapo ni uwepo wa mkutano wa uznduzi wa kampeni kwa Chama cha Demokrasia na Maendeleo (CHADEMA) chini ya UKAWA na michuano ya ligi za Ulaya.

“Hamasa ni nzuri na leo tukumbuke kulikuwa na mchanganyiko wa mambo mengi, wengi wameenda kwenye siasa wengine wameenda kwenye mipira ya Uingereza lakini kidogo watu hajatuangusha, wamekuja kuiangalia na walikuwa na hamu sana na timu yao walikuwa wakilalamika kila siku kuwa timu inafanya mazoezi  Dar es Salaam lakini sasa imerudi..” alisema

Na kuongeza kuwa “ikitokea mechi nyingine basi tujae zaidi ya leo walivyokuja ili tuweze kuongeza hamasa zaidi na wachezaji wageni wajue kwamba watu wa Mtwara ni watu wa mpira siku zote.”

Katika mechi hiyo iliyochezeshwa na mwamuzi David Paul kutoka Mtwara, Azam ndio walikuwa wakwanza kupata bao kupitia kwa kiungo wao Kelvin Friday katika dakika ya 12 baada ya kuwazidi ujanja walinzi wa Ndanda, huku lile la kusawazisha kwa Ndanda likifungwa kwa kichwa na mshambuliaji wao Omari Mponda dakika ya 82 baada ya kuunganisha mpira wa adhabu uliopigwa na Kigi Makasy.

Azam Fc walijikuta wakimaliza pungufu mchezo huo baada ya mlinzi wao wa kati David Mwantika kulimwa kadi nyekundu kutokana na kumchezea madhambi Omari Mponda wakati akielekea langoni akiwa amewatoka walinzi wote, ambapo mwamuzi aliamuru ipigwe penaiti ambayo hata hivyo mpigaji Kigi Makasy alipaisha.

Akizungumza baada ya mchezo huo, kocha wa timu ya Ndanda, Hamimu Mawazo, alisema bado hajaridhishwa na kiwango cha wachezaji wake hivyo kazi ya ziada inahitajika ili kuweza kuwaweka sawa kabla ya kuanza mikikimikiki ya Ligi Kuu ya Tanzania Bara.

Kwa upande wake, kocha wa Azam Fc ambao walishusha kikosi B na baadhi ya wachezaji wa kikosi cha kwanza kutokana na makubaliano baina yao na Ndanda, Benis Kitambi, alisema mchezo ulikuwa mzuri na kwamba wao waliuchukulia kama mchezo wa kuwapima wachezaji wao ili waeze kupata uzoefu.