Mgombeaa mwenza CHADEMA alazimika kufanya maamuzi ya UKAWA jimbo la Mtwara mjini kuhepusha shari.

Umati wa wananchi wa mjini Mtwara waliojitokeza jana viwanja vya Mashujaa katika mkutano wa hadhara wa kampeni uliofanywa na Umoja wa Katiba ya Wananchi (UKAWA) kumnadi mgombea mwenza wa chama hicho katika nafasi ya Urais, Juma Duni Haji.

Na Juma Mohamed.
SHINIKIZO kutoka kwa wananchi limepelekea mgombea mwenza wa nafasi ya Urais kupitia Chama cha Demokrasia na Maendeleo (CHADEMA), Juma Duni Haji, kulazimika kumtangaza Maftaha Nachuma wa Chama cha Wananchi (CUF),  kuwa mgombea ubunge katika jimbo la Mtwara mjini kupitia Umoja wa Katiba ya Wananchi (UKAWA).

Maamuzi hayo yalitokana na wananchi waliojitokeza katika mkutano wa hadhara wa kampeni  uliofanywa na UKAWA jana katika viwanja vya Mashujaa mkoani hapa, kuwa na shauku ya kutaka kumjua mgombea wao katika jimbo hilo ambalo kwa kipindi kirefu lilikuwa na mvutano kati ya vyama vitatu vya NCCR-Mageuzi, CUF na CHADEMA.

Askari wa jeshi la polisi mkoani Mtwara wakishirikiana na kikundi cha ulinzi cha Chama cha Demokrasia na Maendeleo (CHADEMA) Red Brigad, kuwazuia wananchi waliojitokeza katika mkutano wa hadhara wa kampeni katika viwanja vya Mashujaa, ambao walishinikiza kutaka kumjua mgombea wa ubunge wa jimbo la Mtwara mjini kupitia UKAWA.

Wananchi walisimama kwa jazba huku wengi wao wakiwa na mabango na bendera za vyama vya NCCR na CUF baada ya kuona mkutano unaelekea kumalizika pasipokuwaona wagombea wao wakisimama jukwaani na kupata nafasi ya kumjua nani anasimamishwa na UKAWA katika jimbo hilo.

Askari wa jeshi la polisi mkoani Mtwara wakishirikiana na kikundi cha ulinzi cha Chama cha Demokrasia na Maendeleo (CHADEMA) Red Brigad, kuwazuia wananchi waliojitokeza katika mkutano wa hadhara wa kampeni katika viwanja vya Mashujaa, ambao walishinikiza kutaka kumjua mgombea wa ubunge wa jimbo la Mtwara mjini kupitia UKAWA. 

Baadhi ya viongozi wa vyama hivyo walijaribu kuwaomba wananchi kuwa na subira mpaka pale vikao vya UKAWA ngazi za juu vitakapofikia muwafaka wa nani anafaa kupewa jimbo hilo, lakini ilishindikana kutokana na kuona hali inazidi kuwa mbaya kwani wananchi walitaka kuvamia meza kuu ambako alikaa mgombea mwenza, Juma Duni Haji.

Baada ya kuona jazba imezidi kwa wananchi ndipo alipoamua kusimama mgombea huyo na kuwaomba wananchi kuwa watulivu na kumsikiliza “Kama munaniheshimu naomba nisikilizeni..hapa mgombea wa jimbo hili ni wa CUF..” alisema kwa ufupi na kuondoka katika viwanja hivyo.

Wakizungumza baada ya maamuzi hayo, baadhi ya wananchi walikuwa na maoni tofauti juu ya maamuzi yaliyotolewa ambapo wengine walionekana kuyaunga mkono huku wengine wakiyapinga.

Sada Abdallah, alisema mgombea aliyetangazwa anastaili kutokana na kuwa na sifa zote za kuwa mbunge ambapo alisema ni msomi na hata kugombea Urais anakidhi.

Naye, katibu wa kamati ya sheria na haki za binadamu wa CHADEMA kanda ya kusini, Hassani Mbagile, alisema wameyapokea maamuzi hayo kama yalivyoamuliwa na mgombea huyo lakini hayataishia hapo kwani watawasiliana na viongozi wa UKAWA ili kuhoji kama kuna uhalali wa mgombea kutoa maamuzi kutokana na shinikizo kutoka kwa wananchi.

“Tutawasiliana na viongozi wetu watueleze je, maamuzi ya UKAWA yanaamuliwa kwenye majukwaa ya kisiasa au yanaamuliwa katika viako vya UKAWA katika ngazi za kitaifa..je, kiongozi anaweza kutoa maamuzi magumu na mazito yanayobeba mustakabali wa watu wengi kutokana na presha ya watu kwenye mkutano wa hadhara?..kwahiyo mimi niseme tu tumeyapokea na tunamuheshimu mzee Duni ni kiongozi wetu na ni mmoja kati ya viongozi wa UKAWA na ni mgombea mwenza, kwahiyo tunamuheshimu kwa nafasi yake.” Alisema.

Kwa upande wake, mgombea wa NCCR Uledi Hassan, alipotafutwa na NEWS ROOM kuzungumzia maamuzi hayo alisema hawezi kuzungumza chochote kutokana na kuwa katika kikao.

Naye mgombea wa CHADEMA, Joel Nanauka, alisema hakutarajia maamuzi yaliyotolewa kutokana na vikao vya UKAWA kuwa bado vinaendelea lakini anayaheshimu na kwamba yuko tayari kuyaunga mkono endapo yatabaki kuwa kama yalivyotangazwa.

“Na niwaombe tu wafuasi wangu kuwa watulivu na kuwaunga mkono waliotangazwa kuwa wagombea katika ngazi zote kuanzia udiwani, ubunge na hata Urais ili tufikie malengo yetu..” alisema.

Mgombea mwenza wa nafasi ya Urais kupitia Chama cha Demokrasia na Maendeleo (CHADEMA), Juma Duni Haji, akihutubia katika mkutano wa hadhara uliofanyika jana mjini Mtwara katika viwanja vya Mashujaa

Aidha, akizungumza kabla ya maamuzi hayo, Juma Duni Haji, alisema endapo UKAWA watafanikiwa kuingia madarakani, wananchi wa Mtwara na mikoa mingine ambako kunalimwa zao la Korosho, watafurahia mauzo ya zao hilo na mfumo ulipo sasa wa kukopwa wakulima utakuwa umefika mwisho.

Alisema serikali iliyopo ya Chama Cha Mapinduzi (CCM) ndio inachangia kwa kiasi kikubwa umasikini wa wananchi kutokana na kuwakandamiza katika kipato chao kidogo wanachokipata, hasa pale wanapokatwa katika mazao yao ya biashara.

“Ni wizi wa macho macho, bei ya kuistahiki ya korosho baadala ya kupewa watu wa Mtwara inakatwa..unapewa 600 alafu unaambiwa 1000 baadae, kwahiyo kwa makusudi wanawafanya muwe masikini kwa hata kile kilicho chako..” alisema.

Mgombea wa ubunge jimbo la Mtwara mjini aliyetangazwa na mgombea mwenza wa Urais kupitia Chama cha Demokrasia na Maendeleo (CHADEMA), Juma Duni Haji, Maftaha Nachuma wa Chama cha Wanchi (CUF) akitambulishwa kwa wananchi waliohudhuria katika mkutano wa hadhara uliofanyika jana mkoani Mtwara katika viwanja vya Mashujaa.