NCCR Mtwara wapinga maamuzi ya mgombea mwenza UKAWA kutoa jimbo kwa CUF

Mwenyekiti wa NCCR-Mageuzi mkoa wa Mtwara, Uledi Hassan (katikati), akizungumza na waandishi wa habari kutoa tamko la kupinga maamuzi ya kupewa jimbo la Mtwara mjini Chama cha Wananchi (CUF) yaliyotolewa na mgombea mwenza wa Urais kupitia Chama cha Demokrasia na Maendeleo (CHADEMA) chini ya UKAWA, Juma Duni Haji, katika mkutano wa hadhara wa kampeni uliofanyika jana katika viwanja ya Mashujaa mkoani Mtwara

Mwenyekiti wa NCCR-Mageuzi mkoa wa Mtwara, Uledi Hassan, akizungumza na waandishi wa habari kutoa tamko la kupinga maamuzi ya kupewa jimbo la Mtwara mjini Chama cha Wananchi (CUF) yaliyotolewa na mgombea mwenza wa Urais kupitia Chama cha Demokrasia na Maendeleo (CHADEMA) chini ya UKAWA, Juma Duni Haji, katika mkutano wa hadhara wa kampeni uliofanyika jana katika viwanja ya Mashujaa mkoani Mtwara

Mwenyekiti wa NCCR-Mageuzi mkoa wa Mtwara, Uledi Hassan, akizungumza na waandishi wa habari kutoa tamko la kupinga maamuzi ya kupewa jimbo la Mtwara mjini Chama cha Wananchi (CUF) yaliyotolewa na mgombea mwenza wa Urais kupitia Chama cha Demokrasia na Maendeleo (CHADEMA) chini ya UKAWA, Juma Duni Haji, katika mkutano wa hadhara wa kampeni uliofanyika jana katika viwanja ya Mashujaa mkoani Mtwara

NA Juma Mohamed

CHAMA cha NCCR-Mageuzi mkoani hapa kimepinga maamuzi ya kupewa jimbo la Mtwara mjini Chama cha Wananchi (CUF) kusimamisha mgombea ubunge kupitia Umoja wa Katiba ya Wananchi (UKAWA), yaliyotolewa juzi na mgombea mwenza wa Urais kupitia Chama cha Demokrasia na Maendeleo (CHADEMA), Juma Duni Haji.

Akizungumza na waandishi wa habari jana, mwenyekiti wa NCCR mkoa wa Mtwara na mgombea wa ubunge katika jimbo hilo, Uledi Hassan, alisema kilichotamkwa na mgombea huyo siyo makubaliano ya UKAWA kwani makubaliano rasmi yanatolewa katika vikao halali vinavyowahusisha viongozi wakuu wa umoja huo ambapo mpaka juzi ilikuwa bado hayajatolewa maamuzi yoyote juu ya jimbo hilo.

“Mpaka jana (juzi) tulipata taarifa kwamba jimbo la Mtwara mjini hakuna chama hata kimoja kilichopewa..kwahiyo tunakwenda kwenye mkutano tukijua hilo, lakini kilichokuja baadae kila mtu anashangaa kuona anatangazwa mtu ambae sio makubaliano ya UKAWA..” alisema.

Aidha, alisema iwapo taratibu za kutangazwa mgombea zitafuatwa, basi yuko tayari kumuunga mkono mgombea yeyote atakaepitishwa na umoja huo hata kama siyo yeye, lakini sio kwa njia ya kutangaza katika majukwaa ya mikutano ya kisiasa.

Alisema, jana ilikuwa aanze kapeni eneo la Bima mjini hapa, lakini ilishindikana kutokana na kusubiri maamuzi kutoka kwa viongozi wa UKAWA juu ya jimbo hilo, na kwamba aliwataka wananchi waendelee kuwa na uvumilivu mpaka mgombea rasmi atakapotangazwa.

“Kwahiyo wananchi wa Mtwara mi nafikiri bado waendelee kusubiri tu, kwasababu hivi ni vyama, na vyama ni taasisi na zina sheria na kanuni zake, sasa watakavyokubaliana kule, wakisema apewe mtu wa CUF sisi hatuna tatizo, wakisema apewe CHADEMA hatuna shaka..sasa kama hatuheshimiani katika maamuzi ya kitaifa nadhani UKAWA huko mbele utakwenda kuyumba sana..” alisema.

Maamuzi ya kupewa jimbo CUF yalitokana na wananchi waliojitokeza katika mkutano wa hadhara wa kampeni  uliofanywa na UKAWA juzi katika viwanja vya Mashujaa mkoani hapa, kuwa na shauku ya kutaka kumjua mgombea wao katika jimbo hilo ambalo kwa kipindi kirefu lilikuwa na mvutano kati ya vyama vitatu vya NCCR-Mageuzi, CUF na CHADEMA.

Wananchi walisimama kwa jazba huku wengi wao wakiwa na mabango na bendera za vyama vya NCCR na CUF baada ya kuona mkutano unaelekea kumalizika pasipokuwaona wagombea wao wakisimama jukwaani na kupata nafasi ya kumjua nani anasimamishwa na UKAWA katika jimbo hilo, ndipo Juma Duni Haji akaamua kutangaza kuwa CUF ndio wasimamishe mgombea.