Smalling apanda cheo Man Utd

Chris Smalling

Beki Chris Smalling ameteuliwa kuwa nahodha wa tatu wa miamba ya ligi ya Premier ya Uingereza, Manchester United kwa kipindi kinachosalia cha musimu huu.

Meneja Louis van Gaal amempandisha cheo mlinzi huyo, 25, baada ya kuimarika kuwa nguzo muhimu ya kikosi chake ingawa alitatizika kujikita katika timu hiyo muhula uliopita baada ya majeraha na kukosa ukakamavu wa mchezo.

Smalling alicheza mara 25 pekee musimu uliopita lakini amejizatiti na kung'ara msimu huu kiasi kwamba amepata jukumu la kudumu katika timu ya kwanza ya United.

Mchezaji huyo wa timu ya taifa ya Uingereza ataongoza timu hiyo uwanjani ikiwa nahodha wa kwanza, Wayne Rooney na msaidizi wake, Michael Carrick, watakosa mechi.

Van Gaal ametoa changamoto kwa Smalling kuimarika hadi kuwa kiongozi haswa baada ya beki wa muda mrefu, Johnny Evans kuondoka kujiunga na West Brom.

“Anastahili kujikuza hadi kuwa nahodha mkuu lakini kwa sasa, ataongoza wenzake ikiwa wawili hao hawatakuwa,” Van Gaal aliambia magazeti ya Uingereza.

SOURCE: SUPER SPORT