Ndanda Sc na Azam Fc hakuna mbabe Nangwanda Sijaona Mtwara..Mwantika kala 'Umeme'

Wachezaji wa Ndanda na Azam wakiwania mpira wakati wa mchezo wa kirafiki wa kuadhimisha siku ya Ndanda ( Ndanda Day) uliopigwa leo katika uwanja wa Nangwanda Sijaona mkoani Mtwara na kumalizika kwa sare ya 1-1

Mashabiki waliojitokeza kushuhudia mchezo kati ya Ndanda Sc na Azam Fc

Jukwaa kuu

Waandishi wa habari wakifanya yao 

Na Juma Mohamed, Mtwara.

Mechi ya kirafiki ya kuadhimisha siku ya Ndanda (Ndanda Day) iliyopigwa leo katika uwanja wa Nangwanda Sijaona mkoani Mtwara, kati ya wenyeji Ndanda Sc dhidi ya wanalambalamba Azam Fc, imemalizika kwa sare ya kufungana bao 1-1, kwa mabao ya Kelvin Friday kwa upande Azam kabla ya Omari Nyenje kuisawazishia Ndanda Sc kwa kichwa.

Akizungumza baada ya mchezo huo, kocha wa timu ya Ndanda, Hamimu Mawazo, amesema bado hajaridhishwa na kiwango cha wachezaji wake hivyo kazi ya ziada inahitajika ili kuweza kuwaweka sawa kabla ya kuanza mikikimikiki ya Ligi Kuu ya Tanzania Bara.

Azizi Sibo wa Ndanda Sc, akimsaidia mwenzake kuwadhibiti washambuliaji wa Azam Fc wakati wa mchzo wa kirafiki wa kuadhimisha siku ya Ndanda (Ndanda Day) uliopigwa leo katika uwanja wa Nangwanda Sijaona mkoani Mtwara na kumalizika kwa sare ya 1-1

Kwa upande wake, kocha wa Azam Fc ambao walishusha kikosi B na baadhi ya wachezaji wa kikosi cha kwanza kutokana na makubaliano baina yao na Ndanda, Benis Kitambi, amesema mchezo ulikuwa mzuri na kwamba wao waliuchukulia kama mchezo wa kuwapima wachezaji wao ili waeze kupata uzoefu.

Katika mchezo huo, mlinzi wa Azam, David Mwantika, alijikuta akitolewa nje kwa kuonyeshwa kadi nyekundu baada ya kumchezea madhambi mshambuliaji wa Ndanda Omari Nyenje, aliekuwa akielekea golini akibaki yeye na golikipa, ambapo Ndanda walipata penaiti iliyopigwa na Kigi Makasy ambaye hata hivyo alipaisha.

Watoto wakiimba na kucheza nyimbo za kuishangilia timu yao ya Ndanda Sc.

Aidha, mwenyekiti wa Chama cha Soka Mkoa wa Mtwara, Athumani Kambi, amesema, wameshindwa kufikia lengo katika mchezo huo ambao ulikuwa maalumu kwa ajili ya kuwatambulisha wachezaji wapya kwa mashabiki na kuchangisha fedha za kuisaidia timu hiyo, kutokana na uchache wa mashabiki waliojitokeza.