HATIMA YA YANGA SASA IPO KWA ALEX MGONGOLWA

HATIMA YA YANGA SASA IPO KWA ALEX MGONGOLWA

SHIRIKISHO la Soka Tanzania (TFF) linatafakari mustakabali wa Yanga, kufuatia Wajumbe kadhaa wa Kamati ya Utendaji ya Yanga akiwemo Mwenyekiti, Wakili Lloyd Baharagu Nchunga kujiuzulu.

Ofisa Habari wa Shirikisho la Soka Tanzania (TFF), Boniphace Wambura Mgoyo ameiambia BIN ZUBEIRY mchana huu kwamba, Kamati ya Uchaguzi ya Yanga imeliandikia barua shirikisho hilo, ikitaka mwongozo juu ya hilo.

Wambura amesema kwamba, kwa kuzingatia hilo, TFF imepeleka suala hilo kwa Kamati yake ya Sheria, Maadili na Hadhi za Wachezaji ili itoe maoni yake kisheria ya nini kinafanyike kuhakikisha Yanga inaendelea na shughuli zake kama kawaida.

Amesema Kamati ya Sheria, Maadili na Hadhi za Wachezaji chini ya Mwenyekiti wake, Alex Mgongolwa (pichani) inatarajia kukutana leo jioni kushughulikia suala hilo na baadaye Kamati ya Uchaguzi ya Yanga pamoja na Kamati ya Uchaguzi ya TFF zitapewa maelekezo ya kufanya kwa kuzingatia taratibu zilizopo.

LIGI YA TFF KUANZA MEI 27

MICHUANO ya Ligi ya Taifa inayoshirikisha mabingwa wa mikoa inaanza Mei 27 mwaka huu katika vituo vitatu tofauti huku Ashanti United ya Ilala na Polisi ya Mara zikifungua dimba katika Kituo cha Musoma.

Ligi hiyo ambayo inatarajia kumalizika Juni 12 na 13 mwaka huu itashuhudia mechi mbili kwa siku katika kila kituo, huku ya kwanza ikichezwa saa 8 mchana na kufuatiwa nay a pili 10 jioni.

Mechi za ufunguzi Kituo cha Musoma ambapo mechi zake zitachezwa Uwanja wa Kumbukumbu ya Karume mjini Musoma ni Flamingo ya Arusha dhidi ya Forest ya Kilimanjaro (saa 8 mchana) wakati saa 10 jioni ni Ashanti United na Polisi.

Kituo cha Kigoma siku ya ufunguzi kutakuwa na mechi moja tu itakayoanza saa 10 kamili jioni kwenye Uwanja wa Lake Tanganyika kati ya Mwadui ya Shinyanga na JKT Kanembwa ya Kigoma. Siku inayofuata ni CDA (Dodoma) vs Majimaji ya Tabora (saa 8 mchana) na Bandari ya Kagera vs Pamba ya Mwanza (saa 10 kamili jioni).

Tenende ya Mbeya na Kurugenzi ya Iringa ndizo zitakazoanza saa 8 mchana kwenye Kituo cha Mtwara na kufuatia na mechi kati ya Mpanda Stars ya Rukwa na Ndani ya Mtwara kuanzia saa 10 kamili jioni. Mechi hizo zitachezwa katika Uwanja wa Umoja.

 

NYOTA WA ATLETICO MADRID KUIONGOZA MALAWI DHIDI YA TAIFA STARS KESHO

Robin Ngalande

IKIONGOZWA na mchezaji wa timu ya vijana ya Atletico Madrid ya Hispania, Robin Ngalande Malawi The Flames kesho inatarajiwa kuwa mgeni wa Tanzania, Taifa Stars katika mechi ya kirafiki ya kimataifa kwenye Uwanja wa Taifa, Dar es Salaam kuanzia saa 10 kamili jioni.

Makocha wa timu zote mbili, Kim Poulsen wa Taifa Stars na Kinnah Phiri wa The Flames wamezungumzia umuhimu wa mechi hiyo katika Mkutano na Waandishi wa Habari uliofanyika leo (Mei 25 mwaka huu) ofisi za Shirikisho la Mpira wa Miguu Tanzania (TFF).

Kim ambaye hiyo itakuwa mechi yake ya kwanza tangu asaini mkataba wa kuinoa Stars, amesema baada ya mazoezi ya siku kumi hicho ndicho kipimo chake cha kwanza na cha mwisho kabla ya kucheza na Ivory Coast kwenye mechi ya mchujo ya Kombe la Dunia itakayofanyika ugenini Juni 2 mwaka huu.

“Wachezaji wangu wamekuwa wakipokea mafunzo vizuri ingawa Nurdin Bakari na Thomas Ulimwengu hatakuwepo kwa vile ni majeruhi. Bila shaka baada ya mazoezi ni lazima ujipime, hivyo mechi hii ni muhimu kwangu ukizingatia kuwa kwenye ubora wa viwango vya FIFA, Malawi wako juu yetu,” amesema Kim.

Naye Phiri ambaye ni mchezaji wa zamani wa kimataifa wa Malawi amesema awali aliombwa mechi na Misri, lakini akaamua kucheza na Taifa Stars kwa vile anaamini kitakuwa kipimo kizuri kwake kabla ya kucheza mechi ya mchujo ya Kombe la Dunia dhidi ya Kenya itakayofanyika Juni 2 mwaka huu jijini Nairobi.

“Nimekuja na wachezaji 20 ambapo nusu yao wanacheza mpira wa kulipwa nje ya Malawi, wengi wakiwa Afrika Kusini lakini wapo pia kutoka Msumbiji na mmoja anacheza Hispania katika timu ya vijana ya Atletico Madrid. Tumejianda si kwa mechi hii tu, bali pia dhidi ya Kenya na baadaye Nigeria ambao tutacheza nao numbani Juni 9 mwaka huu,” amesema Phiri ambaye kwenye benchi lake la ufundi anasaidiwa na Young Chimodzi.

Viingilio katika mechi hiyo ni sh. 3,000 kwa viti vya kijani, sh. 5,000 kwa viti vya rangi ya chungwa, sh. 15,000 kwa VIP C na B wakati VIP A inayochukua watazamaji 748 tu itakuwa sh. 20,000.

BLATTER AKATAA MIKWAJU YA PENALTI, ASEMA ITALETA BALAA

Blatter

RAIS wa FIFA, Sepp Blatter amesema kwamba soka inaweaza kugeuka janga iwapo mechi itaamuliwa kwa mikwaju ya penalti.

Licha ya kutawala mechi ya fainali ya Ligi ya Mabingwa Ulaya, ndoto za Bayern Munich kutwaa taji hilo la Ulaya, zilizimwa na Chelsea kwa bahati nasibu ya mikwaju ya penalti Jumamosi ya wiki iliyopita.

Blatter anaamini uhalisia wa soka unapotea inapofikia mechi inaamuliwa kwa mikwaju ya penalti, na amesema kwamba ufumbuzi utatafutwa baadaye.

"Soka inaweza kuwa janga unakwenda kwenye mikwaju ya penalti," Blatter alisema kwa mujibu wa BBC. "Soka haiwezi kuwa ya mmoja kwa mmoja, inapofikia kwenye mikwaju ya penalti soka inapoteza uhalisi wake.

"Natumai Franz Beckenbauer na Kamati yake ya [FIFA Task Force] 2014 watatuonyesha njia, hata isiwe leo, lakini baadaye."

Katika jitihada za kurekebisha zaidi mchezo huo, FIFA imetangaza kwamba mechi ya kirafiki kati ya England na Ubelgiji Juni 2, itatumika kufanyia majaribio sheria ya teknolojia kwenye mstari wa lango, ili kujua kama mpira umevuka, au haujavuka mstari.

TASWA YAMPA 'BRAVO' MHARIRI TANZANIA DAIMA KUINGIA RT

CHAMA cha Waandishi wa Habari za Michezo Tanzania (TASWA) kinatoa pongezi kwa Mhariri wa Habari za Michezo wa gazeti la Tanzania Daima, Tullo Chambo (pichani kushoto) kwa kuchaguliwa kuwa Mjumbe wa Kamati ya Utendaji ya Chama cha Riadha Tanzania (RT).

Katibu Mkuu wa TASWA, Amiri Mhando ameiambia BIN ZUBEIRY mchana huu kwamba, Chambo alitwaa nafasi hiyo kwenye Uchaguzi Mkuu wa RT uliofanyika Jumapili mjini Morogoro, ambapo ni miongoni mwa wajumbe wapya walioingia kwenye chama hicho.

Wengine walioshinda ni Anthony Mtaka ambaye anakuwa Rais mpya wa RT, wakati Makamu wa Rais Utawala ni William Kallaghe, Makamu wa Rais Ufundi, Dk. Ahmed Ndee, Katibu Mkuu, Suleiman Nyambui, Katibu Msaidizi, Ombeni Zavalla, Mhazini, Is-Haq Suleiman.

Wajumbe wa Kamati ya Utendaji ni Mwinga Mwanjala, Meta Petro, Peter Mwita, Rehema Killo, Lwiza John, Zakaria Barrie, Zakaria Gwanda, Robert Kalyahe na Christian Matembo.

TASWA inatambua Chambo ni mwanahabari mzoefu, ambaye kwa muda mrefu amekuwa mhariri wa habari za michezo na ni mtu mwenye kujua mambo mengi yanayohusu riadha, hivyo atakuwa kiungo muhimu kwa watu wa riadha, pia atakuwa kiongo kizuri kwa waandishi wa habari za michezo kuhusiana na mambo ya riadha.

TASWA inaahidi kumpa ushirikiano wa kutosha kadri itakavyoweza na inamtakia kila la heri, huku ikiamini hatawaangusha Wajumbe wa Mkutano Mkuu wa RT waliomuamini wakamchagua kushika wadhifa huo.

Pia Taswa inawapongeza viongozi wote wa RT walioingia madarakani Jumapili, ikiamini watakuwa chachu ya mafanikio ya riadha hapa nchini.

 

HALI BADO TETE YANGA LICHA YA NCHUNGA KUJIUZULU

KIKAO cha Kamati ya Utendaji ya Yanga kujadili barua ya Mwenyekiti wa klabu hiyo, Wakili Lloyd Baharagu Nchunga kujiuzulu kimeshindwa kufanyika leo, kutokana na safu kutotimia.

Katibu Mkuu wa Yanga, Celestine Mwesigwa ameiambia BIN ZUBEIRY mchana huu kwamba, Mbaraka Igangula yupo Afrika Kusini wakati Khalifa Mgonja yupo Arusha,

Mwesigwa alisema kwa sababu hiyo, wanasubiri Wajumbe wote wa Kamati ya Utendaji wafike Dar es Salaam ndipo kikao kifanyike. Wakati huo huo, Wazee wa klabu hiyo walikutana na waandishi wa Habari leo mchana makao makuu ya klabu na kusema kwamba, hawamtambui Mjumbe yeyote wa Kamati ya Utendaji, kwani Nchunga ameondoka na watu wake wote.

Aidha, baadhi ya Wajumbe waliotangaza kujiuzulu wameanza kuzikana barua zao, wakidai walilazimika kuandika kutokana na vitisho walivyokuwa wakipewa. BIN ZUBEIRY iliwasiliana na Mwanasheria wa Shirikisho la Soka Tanzania (TFF), Alex Mgongolwa kutaka ufafanuzi zaidi juu ya sakata la klabu hiyo, lakini akasema yuko kwenye kikao.

Wakati BIN ZUBEIRY ikiwa imetega rada zake kwa Mgongolwa hadi hapo atakapomaliza kikao, taarifa zaidi zinasema kikao hicho kinahnusu syala hilo hilo la Yanga na atalitolea tamko leo.

Jana, Nchunga alitangaza kujiuzulu Uenyekiti wa Yanga, akisema timu anaikabidhi kwa Baraza la Wadhamini, ambalo kwa sasa linaundwa na wajumbe watatu, Mama Fatuma Karume, Deo Filikunjombe na Francis Kifukwe.

COLE AANDALIWA MKATABA MPYA MNONO CHELSEA SAWA NA WA TORRES

Ashley Cole

EXCLUSIVE
By Wayne Veysey | Chief Correspondent

KLABU ya Chelsea, iko tayari kumpa ofa ya mkataba mpya Ashley Cole ambao utamuweka Stamford Bridge kwa kipindi chote kilchobaki cha maisha yake ya soka.

Beki huyo amebakiza mwaka mmoja tu katika mkataba wake wa sasa na klabu hiyo inataka kumfunga kwa mkataba mpya mwanzoni mwa msimu ujao, kwa mazungumzo ambayo yataanza hivi karibuni, baada ya beki huyo wa kushoto kuonyesha soka ya nguvu msimu huu, akitoa mchango mkubwa kwa timu kutwaa taji la Ligi ya Mabingwa.

Chanzo cha habari, kimeiambia Goal.com, ambako BIN ZUBEIRY imeipata habari hii, kwamba beki huyo mwenye umri wa miaka 31 atapewa mkataba wa makia mitatu na kuingia kwenye orodha ya wachezaji wanaolipwa vizuri katika klabu hiyo, sambamba na akina John Terry, Frank Lampard na Fernando Torres.

Mshahara wake wa sasa inasemekana ni kiasi cha pauni 120,000 kwa wiki, wakati Barcelona ni miongoni mwa klabu ambazo zinamtaka sana Cole na kwa sasa inasikilizia tu kama Chelsea itashindwana naye, iingie msituni kusaka saini ya mchezaji huyo, aliyesajiliwa Stamford Bridge katika mazingira ya utatanishi kutoka Arsenal mwaka 2006.

Hadi sasa hakuna dalili kwamba Cole anataka kuondoka London na baada ya kumaliza msimu na mataji mawili, kwa sasa yuko likizo Los Angeles, Marekani kabla ya kujiunga na timu ya taifa ya England wiki ijayo kujiandaa na mchezo wa kirafiki dhidi ya Ubelgiji Juni 2, mwaka huu.

Pamoja na kurefusha maisha ya Cole, Stamford Bridge, pia Chelsea inataka kuwaongezea mikataba Michael Essien, Florent Malouda na Frank Lampard, ambao wanamaliza 2013.

Kama BIN ZUBEIRY ilivyoinukuu Goal.com Jumatano kwamba Salomon Kalou anaweza kutemwa, sasa suala lake litatatuliwa wiki ijayo, wakati Jose Bosingwa anajiandaa kutemwa licha ya kuwa beki chaguo la kwanza kulia katika kikosi kilichomaliza msimu na mataji mawili.

 

JEZI MPYA ZA VIGOGO LIGI KUU ENGLAND MSIMU UJAO

MANCHESTER UNITED

CHELSEA

MANCHESTER CITY

ARSENAL

LIVERPOOL

WANAUME FAMILY KUMPA TAFU DOGO ASLAY DODOMA

Wanaume Family

KUNDI zima la TMK Wanaume Family la Temeke jijini Dar es Salaam, litasindikiza utambulisho wa msanii chipukizi wa muziki wa kizazi kipya nchini Aslahi Isihaka ‘Dogo Aslay’ litakalofanyika kwenye uwanja wa Jamhuri Dodoma na ukumbi wa Royal Village mjini humo.

Akizungumza na mwandishi wa habari hizi jijini Dar es Salaam jana mratibu wa onesho hilo Jackline Masano wa Kampuni ya Ruhazi Promotion ya jijini Dar es Salaam, alisema kuwa TMK Family watafanya vituo vyao kwenye onesho hilo litakalofanyika Jumamosi Juni 9,2012 kwenye uwanja wa Jamhuri mjini Dodoma.

Alisema TMK Family wanaungana na wasanii kutoka kituo cha Mkubwa na Wanawe cha Temeke Sandali jijini katika kumsindikiza msanii huyo aliye gumzo hivi sasa kutona na wimbo wake ‘Naenda Kusema’.

“Tunapenda kuwaambia wapenzi wa muziki wa mjini Dodoma na maeneo jirani kwamba Kampuni ya Ruhazi Promotion imekubaliana na TMK Family hivyo mchana wa Jumamosi Juni 09, 2012 kuanzia saa 6:00 mpaka saa 12:00 jioni itakuwa kwenye uwanja wa Jamhuri Dodoma na litaanza saa 2:00 usiku hadi saa 6:30 usiku kwenye ukumbi wa Royal Village,” alisema Jackline Masano.

Alisema pamoja na kwamba onesho hilo litapambwa na wasanii wengi lakini kiingilio kitakuwa shilingi 5,000 tu kwa wakubwa na shilingi 1,000 kwa watoto ili kuwawezesha wapenzi wengi zaidi kukimudu ambapo watapata burudani ya uhakika.

Aliongeza kwamba hivi sasa, wanaendeelea kufanya mazungumzo na wasanii wengine watakaopamba maonesho hayo yote na kwamba pindi mazungumzo yatakapokamilika watawaweka hadharani.

KILIMANJARO PREMIUM LAGER KUENDELEA KUDHAMINI KOMBE LA TAIFA

George Kavishe, Meneja wa Kilimanjaro Beer

Gaudence Mwaikimba, mfungaji bora wa taifa Cup msimu
uliopita akiwa na mabingwa watetezi Mbeya

MENEJA wa Bia ya Kilimajaro Premium Lager, George Kavishe amesema kwamba pamoja na kuingia mkataba wa kuidhamini timu ya soka ya taifa ya Tanzania, Taifa Stars, lakini wataendelea pia kudhamini mashindano ya Kombe la Taifa, Kili Taifa Cup.

Akizungumza na BIN ZUBEIRY jana usiku katika mahojiano maalum, Nyumbani Lounge, Oysterbay, Dar es Salaam, Kavishe alisema kwamba Kilimanjaro Premium Lager bado ni wadhamini wa Taifa Cup na mwaka huu itafanyika kama kawaida.

Hata hivyo, alipoulizwa juu ya ukimya wa maandalizi hadi sasa, Kavishe alisema; “Sisi tunawasubiri TFF (Shirikisho la Soka Tanzania), wao ndio wanatakiwa kutupa mwongozo, sisi ni wadhamini tu, tunawezesha, ila mipango yote na nini, ni TFF wao wenyewe,”alisema Kavishe ambaye jana bia yake ilifanya pati la uzinduzi wa kampeni ya Kilimanjaro Premium Lager 100% TZ Flava kwenye ukumni wa Nyumbani Lounge.

Kumekuwa na wasiwasi wa Kombe la Taifa ama kutofanyika kabisa mwaka huu, au kufanyika bila ya udhamini, baada ya Kilimanjaro Premium Lager ambao pia ni wadhamini wa klabu za Simba na Yanga, kuingia mkataba wa kuidhamini Taifa Stars, ambayo awali ilikuwa inadhamini na bia ya Serengeti Premium Lager.

Lakini kauli hii ya Kavishe inakuja kuondoa wasiwasi huo na mikoa sasa inaweza kuendelea na maandalizi yake kama kawaida.

 

Thursday, May 24, 2012

MAN CITY WATAKA KUNG'OA KIFAA KINGINE BARCA

Martinez

Tetesi za Ijumaa magazeti Ulaya

MAN CITY WAIPA FEDHA NA MCHEZAJI BARCELONA ILI WAMTWAE DANI ALVES

KLABU ya Manchester City inajiandaa kuchukua mchezaji mwingine Barcelona, beki nyota Dani Alves, mwenye umri wa miaka 29. Kwa mujibu wa taarifa kutoka Hispania, City wametoa ofa ya pauni Milioni 12 na kuwapa Aleksandar Kolarov pia.

Habari kamili: talkSPORT

MSHAMBULIAJI wa Manchester City, Mario Balotelli ameonyesha nia yake ya kubaki katika klabu hiyo, akikanusha uvumi kwamba anataka kurejea Italia kujiunga na AC Milan.

Habari kamili: Manchester Evening News

KLABU ya Manchester United inajiandaa kuboresha ofa yake ya ya pauni Milioni 13 kumnasa kiungo Shinji Kagawa mwenye umri wa miaka 23, kutoka Borussia Dortmund.

Habari kamili: Daily Mail

KLABU ya Tottenham ipo karibu kumsaini beki wa kati Jan Vertonghen, mwenye umri wa miaka 25, kutoka Ajax kwa dau la pauni Milioni 9.6.

Habari kamili: The Guardian

KLABU ya Arsenal iko tayari kwa mazungumzo ya kumchukua mshambuliaji wa Montpellier, Olivier Giroud kwa ofa ya dau la pauni Milioni 6.4, pamoja na kuwapa Marouane Chamakh, ili wamnase mshambuliaji huyo mwenye umri wa miaka 25.

Habari kamili: The Metro

MWENYEKITI WIGAN AMUONYA MARTINEZ

MWENYEKITI wa Wigan, Dave Whelan amemtaka kocha wake, Roberto Martinez kufikiria kwa umakini juu ya kujiunga na Liverpool kufanya kazi chini ya Mkurugenzi wa Soka.

Habari kamili: Daily Mirror

KOCHA wa zamani wa England, Fabio Capello anakuwa kocha wa mwingine kusitisha mpango wa kwenda Liverpool, lakini bado ana matumaini ya kupata kazi Chelsea.

Habari kamili: Daily Mail

KOCHA Steve Bruce anatakiwa na Hull City akachukue nafasi ya Nick Barmby, lakini hawezi kuchukua uamuzi wowote kwa sasa, akiwa anavizia kurejea kwa mara ya tatu Wigan, iwapo Martinez ataondoka.

Habari kamili: Daily Mirror

KOCHA wa Muda wa Chelsea, Roberto Di Matteo anatakiwa na klabu ya nyumbani kwao, Italia, Napoli baada ya mazungumzo yake na klabu yake ya sasa, Chelsea kuwa bado hayajafanyika.

Habari kamili: talkSPORT

MARTINEZ ATUA MIAMI KUZUNGUMZA NA WAMILIKI LIVERPOOL

• Facebook
• Twitter
• Tuma kwa rafiki yako
• Chapisha

Afika Miami kushauriana na matajiri wa Liverpool

MMILIKI wa klabu ya soka ya Wigan, Dave Whelan amesema Roberto Martinez amefika Miami, Marekani, kushauriana na matajiri wanaomiliki klabu ya Liverpool.

Whelan alitoa ruhusua wiki iliyopita kwa Martinez kufanya mashauri na timu ya Liverpool, na kuamua ikiwa atajiunga nao kama meneja, na Whelan amempa hadi tarehe 5 Juni kuamua atasalia Wigan, ama atajiunga na Liverpool.

"Roberto yuko Miami leo, na unaweza kuamua amefika huko kufanya nini [kuzungumza na wamiliki wa Liverpool]," Whelan aliielezea BBC.

"Yeye ni mtu mwaminifu, na ninatazamia katika kipindi cha saa 48 zijazo aniarifu yaliyoafikiwa."

Mashauri hayo ya Martinez yanaashiria mazungumzo rasmi yameanza kufanyika katika juhudi za klabu ya Liverpool kumtafuta meneja mpya, baada ya kumfuta kazi Kenny Dalglish tarehe 16 Mei.

Meneja wa Swansea, Brendan Rodgers, na Frank de Boer wa klabu ya Ajax ya Uholanzi, ni kati ya meneja ambao wamekataa ombi la kuhojiwa kwa kibarua hicho cha klabu ya Anfield.

Aliyekuwa meneja wa Chelsea zamani, Andre Villas-Boas ni kati ya watu ambao wanafikiriwa huenda wakachaguliwa kuifunza Liverpool.

Martinez, ambaye alikuwa kocha wa zamani wa Swansea, na mwenye umri wa miaka 38, alikataa kuwa meneja wa Aston Villa msimu uliopita, na hivi sasa yuko likizoni Barbados, hadi Jumanne, na amepewa muda wa siku saba na Whelan kuamua atabaki Wigan au atajiunga na Liverpool.

Whelan anatumaini hali hiyo ya kutofahamu kinachoendelea itakwisha haraka.

Aliongezea: "Yuko Carribean, kwa hiyo ni muda wa saa mbili kufika Miami.

"Ikiwa ataamua kuondoka, na natumaini hatafanya hivyo, basi itanibidi kumtafuta atakayejaza pengo haraka iwezekanavyo