Mgombea ubunge CHADEMA Mtwara aliyedaiwa kutekwa apelekwa Muhimbili..

Na Juma Mohamed.

Mgombea ubunge wa jimbo la Mtwara mjini kupitia Chama cha Demokrasia na Maendeleo (CHADEMA), Joel Nanauka, aliyedaiwa kutekwa na kuteswa na watu wasiojulikana, amelazika kupatiwa rufaa na kupelekwa hospitali ya Taifa ya Muhimbili kwa ajili ya kupata matibabu zaidi.

Akizungumza ofisini kwake hii leo, mganga Mfawidhi wa hospitali ya rufaa ya mkoa wa Mtwara ya Ligula, Dkt. Mhuza Mdoe, alisema wamelazimika kumpatia rufaa hiyo ili apatiwe vipimo zaidi na kuweza kubaini tatizo alilonalo ndani ya mwili wake, ambapo mpaka sasa halijafahamika.

“Tukio lenyewe ilivyokuwa ni kwamba inahitajika vipimo vya ziada, kwahiyo ni vyema kwamba aende kwenye hospitali kubwa ili kuweza kugundua kama kuna shida yeyote kubwa ndani ya mwili wake..nachoweza kusema ni kwamba sisi tumefanya uchunguzi katika kiwango chetu na tumempatia matibabu katika kiwango chetu..” alisema.

Hata hivyo mganga huyo hakutaka kuweka wazi juu ya tatizo alilotibiwa kwa siku moja aliyolazwa hospitalini hapo, na kusema kuwa ni siri za mgonjwa ambazo hazipaswi kuelezwa.

“Siri za mgonjwa hizo hatuwezi kuziongea lakini tumemtibia kuhakikisha kwamba anapata nafuu kwa matatizo ambayo alikuwa nayo..na hakukuwa na mabadiliko makubwa na sio kwamba ilikuwa inaenda kwenye hali mbaya..” aliongeza.

Kwa upande wake, kamanda wa polisi mkoa wa Mtwara ASP Henry Mwaibambe, alipotafutwa kwa ajili ya kueleza taarifa za kutekwa kwa mgombea huyo, alisema yuko kwenye majukumu mengine, hivyo mazingira aliyopo hawezi kulizungumzia swala hilo.

Mgombea Ubunge jimbo la Mtwara mjini kupitia Chama cha Demokrasia na Maendeleo (CHADEMA), Joel Nanauka, akiwa wodini katika hospitali ya rufaa ya Ligula mkoani Mtwara, alikopelekwa kwa ajili ya kupata matibabu kutokana na maumivu aliyoyapata kwa kipindi amabcho alikuwa haonekani.

Joel Nanauka

Mganga wa Zahanati ya Bursa, Dkt. Pendo Mmbando, akizungumzia mazingira ambayo mgombea ubunge wa Mtwara mjini kupitia Chama cha Demokrasia na Maendeleo (CHADEMA), Joel Nanauka, alivyopokelewa hospitalini hapo na kupatiwa matibabu ya awali kabla ya kumpatia rufaa ya kwenda hospitali ya rufaa ya mkoa, Ligula.

Mganga mfawidhi wa hospitali ya rufaa ya mkoa wa Mtwara, Ligula, Dkt. Muhuza Mdoe, akizungumzia hali ya mgombea ubunge wa Mtwara mjini kupitia Chama cha Demokrasia na Maendeleo (CHADEMA), Joel Nanauka, kutokana na maumivu aliyoyapata kwa kipindi amabacho alikuwa haonekani.

Mzee Grey Nanauka, ambaye ni Baba mzazi wa mgombea ubunge wa Mtwara mjini kupitia Chama cha Demokraisa na Maendeleo (CHADEMA), Joel Nanauka, akizungumzia mazingira ya kutoweka kwa mwanae na namna alivyopatikana.

Kufuatia kuzagaa kwa uvumi wa takribani siku nne zilizopita kuwa mgombea huyo alitoweka ghafla na kutofahamika aliko huku wengine wakienda mbali zaidi na kudhani kwamba ametekwa na watu wasiojulikana, hatimaye alionekana katika Zahanati ya Bursa ilyopo manispaa ya Mtwara akipata matibabu.

Kwa mujibu wa daktari wa Zahanati hiyo aliyempokea na kushughulika na huduma ya kwanza kwa mgombea huyo kabla ya kumpatia rufaa ya kwenda hospitali ya mkoa ya Ligula, Dkt. Pendo Mmbando, alisema alipokelewa hospitalini hapo alfajili ya leo akiwa mwenyewe bila ya kuambatana na mtu.

Dkt. Pendo Mmbando

Alisema, walimfanyia vipimo na kubaini kuwa sukari yake ilikuwa iko chini pamoja na malaria, na kuamua kumpatia huduma ya kwanza kabla ya kumkatia rufaa ya kwenda hospitali ya Ligula.

“Alikuja mwenyewe alfajiri na alipokelewa kama mgonjwa wa kawaida kwasababu tulikuwa hatujui chochote kinachoendelea, alipimwa sukari, malaria na mkojo..baadae akabainika kuwa sukari ipo chini, malaria ipo lakini akawa analalamika kuwa anasikia maumivu ya mbavu na shingo..” alisema.

Baada ya kupata huduma ya kwanza, alichukuliwa na baadhi ya ndugu zake na marafiki zake na kumpeleka katika hospitali ya Ligula, ambako alipokelewa na kufikishwa wodini na baadae kuchunguzwa na daktari.

Hata hivyo, hakukuwa na uwezekano wa kuzungumza naye kutokana na waandishi kuzuiwa na askari polisi kwa madai kuwa hawezi kuzungumza kutokana na maumivu na kupoteza baadhi ya kumbukumbu ya tukio lililomtokea, jambo ambalo limekuwa gumu kutambua undani na chanzo cha tukio la kupotea kwake katika mazingira ya kutatanisha.

Joel Nanauka

Baadae waandishi waliruhusiwa kuingia wodini humo lakini kwa mashariti ya kutozungumza naye na baadala yake, wapige picha na kuondoka.

Kwa upande wake, mganga mfawidhi wa hospitali hiyo, Dkt. Mdoee Muhuza, alisema kwa mujibu wa maelezo yake ni kwamba aliokotwa mahali ambapo alihisi kuwa alipewa dawa za usingizi na baadae kupelekwa katika Zahanati ya Bursa kabla ya kufikishwa hospitalini hapo ambako alifanyiwa uchunguzi ambao hata hivyo hawakubaini kuwa na majeraha yeyote mwilini mwake.

Dkt. Muhuza Mdoe

“Kuna maeneo ambayo anasema alikuwa ansikia maumivu lakini kwa maelezo yake ni kwamba kadiri muda unavyokwenda na dawa ambazo alikuwa amepatiwa basi maumivu yanakuwa yanapotea taratibu..zaidi anachokielezea kwa sasa ni kwamba mwili tu hauna nguvu na anajisikia kuchoka..” alisema.

Naye, baba mzazi wa mgombea huyo, mzee Grey Nanauka, alisema taarifa za kutoonekana kwa mwanae alizipata siku ya Jumatatu, Oktoba 5 mwaka huu, na alikuwa wilayani Newala, ambapo alipigiwa simu na mke wake.

Alisema aliamua kujaribu kudadisi kujua mazingira ya kutoweka kwake, ambapo aliambiwa kuwa aliondoka asubuhi na hakuna mtu mbaye alimuaga, na kwamba walijaribu kusubiri mpaka jioni kabla ya kuanza kumtafuta kwa simu lakini simu zake hazikuweza kupatikana.

Grey Nanauka

“Kwahiyo wliendelea kumtafuta kwa simu mpaka majira ya saa tano za usiku pamoja na kwenda kumtafuta katika baadhi ya maeneo ambayo anaenda kwa ajili ya shughuli zake za siasa lakini hakuweza kupatikana..kwahiyo kilichoamuliwa ni kwenda kutoa taarifa kituo cha polisi..mpaka siku iliyofuata hakupatikana na mimi nilirudi jana  saa saba mchana nikaungana na wenzangu pamoja na askari ambao walikuwa wanajaribu kuwahoji watu ambao aliwasiliana nao kwa siku hiyo..” alisema.

Aidha, alisema taarifa za kuonekana kwake alizipata leo asubuhi baada ya kupigiwa simu na rafiki wa mgombea huyo aliyemtaja kwa jina moja la Daudi, na kumuambia kuwa Joel alimpigia simu na kumuambia kuwa yupo Zahanati ya Bursa, akisema kuwa hata simu aliyeitumia aliazima kutokana na simu zake kutokuwa na chaji.

Alisema, baada ya kupata taarifa hizo, aliamua kwenda kutoa taarifa kituo cha polisi kwa askari ambao walishirikiana katika hatua za kumtafuta na kuamua kwenda Zahanati hapo kwa ajili ya kuthibitisha ambapo waliamua kuacha askari waendelee na kazi yao ya kupeleleza juu ya tukio hilo.

“Leo nilipopata taarifa za ghafla juu ya kuonekana kwake ni jambo la furaha kubwa kwasababu ni kitu ambacho sikukitarajia, kwa hali ya kawaida mtu anapokamatwa au kutekwa na mtu ambaye humjui huwezi kujua kwamba anaweza kumfanyia jambo gani..kwahiyo kuna mambo mawili kumpokea akiwa hai au akiwa maiti.” Alisema.

Alisema, kutokana na hali ambaye alikuwa nae wakati alipomuona hakuweza kumuhoji chochote juu ya kutoweka kwake kwasababu alichoka na hata kumbukumbu zake hazikuwa sawa na kusubiri mpaka hapo atakapopata nafuu.

Hata hivyo, mzazi huyo hakutaka kulihusisha moja kwa moja tukio hilo na maswala ya kisiasa ukizingatia na mvutano wa jimbo uliopo baina ya vyama vitatu kati ya vine vinavyowakilisha Umoja wa Katiba ya Wananchi (UKAWA) vya NCCR-Mageuzi, CHADEMA na Chama cha Wananchi (CUF).

“Kuna mambo mawili yanatokea wakati wa siasa, mtu mwingine anaweza akawa na jambo lake la pembeni lakini akatumia nafasi ya wanasiasa au migogoro ya kisiasa kuingiza jambo lake ili lionekane ni la kisiasa..kwahiyo ukisema linahusika na siasa naweza nikasema ni ndio au hapama..” aliongeza.

Alisema, haliwahi kumfuata na kumuambia juu ya kuwepo kwa vitisho anavyovipata juu ya shughuli zake za siasa lakini hakuwahi kuweka wazi anavipata kutoka wapi.

“Kuna siku alishawahi kuniambia kwamba kuna watu wanasema kwamba likitokea hili basi watakuja kukuchomea nyumba moto..hilo alishawahi kuniambia lakini hakusema ni nani na wakati mwingine wanamtumia ujumbe wa simu na wengine wanaongea nae ana kwa ana kumuambia kuwa akifanya hivi tutafanya hivi, lakini kwenye siasa ni vitu vya kawaida.” Alisema.

Kamanda wa polisi mkoa wa Mtwara, Henry Mwaibambe, alithibitisha kupokea taarifa za kupotea kwa mgombea huyo ambapo zilipokelewa ofisini kwake juzi saa saba mchana zikidai kuwa aliaga nyumbani kwake kuwa nakwenda maeneo ya Mnarani kwa ajili ya kukutana na jamaa zake na hakuonekana tena baada ya hapo.

“Kwahiyo polisi tukaanza uchunguzi lakini hatimae leo (jana) amepatikana akiwa katika hali ambaye sio nzuri sana, yupo katika kituo cha afya anatibiwa na kwamba akipata fahamu tutajua nini kilichomtokea, lakini anaendelea vizuri..lakini kabla ya hapo mgombea huyu alikuwa na mambo ya hajabu kidogo, aliwahi kwenda katika vyombo vya habari na kusema kwamba amejitoa na hata gombea tena.

Alisema na kuongeza, “lakini wakati huo huo wenzake kwenye chama chake cha Chadema, waksema hawezi kujitoa kwasababu chama ndicho kinaweza kutangaza kujitoa..” aliongeza.

Aliwataka wanasiasa kuwa watulivu na kufanya kampeni zao kwa amani na kwamba swala la mgombea kugombea au kuto gombea ni la hiyari yake, hivyo wahepuke kuzua mitafaruku isiyo ya lazima ili mchakato upite salama.