Mkataba mpya wampa jeuri Mkwasa..aisambaratisha 'The Flames' bila huruma

Thomas Ulimwengu (kulia) akimkimbilia Mbwana Samata kushangilia goli la pili baada ya kuifungia Stars wakati ikicheza dhidi ya Malawi

Mbwana Samata (aliyepiga goti) akishangilia kwa kufuta kiatu cha Thomas Ulimwengu baada ya kufunga goli la kwanza akipokea pasi toka kwa Ulimwengu

Mashabiki waliojitokeza kushuhudia pambano kati ya Stars dhidi ya Malawi huku wakiwa mamebeba bango lenye ujumbe wa kumwamini Mkwasa

Kutoka kwenye sare mbili mfululizo katika mechi za mashindano,timu ya Taifa ya Tanzania ‘Taifa Stars’ chini ya kocha mzalendo Charles Boniface Mkwasa ambaye amekula shavu la uhakika la kuinoa timu hiyo hadi 2017, leo imefanikiwa kuibuka na ushindi wa goli 2-0 dhidi ya Malawi kwenye mchezo wa awali uliopigwa kwenye uwanja wa Taifa kusaka tiketi ya kushiriki fainali za kombe la dunia mwaka 2018 nchini Urusi.

Iliwachukuwa dk 19 tu Stars kabla ya kuwainua mashabiki waliojitokeza uwanjani hapo, kupitia bao safi la Mbwana Samata akiunganisha pasi ya mchezaji mwenzake wa TP Mazembe Thomas Ulimwengu.

Mashabiki waliojitokeza kushuhudia pambano kati ya Stars dhidi ya Malawi huku wakiwa mamebeba bango lenye ujumbe wa kumwamini Mkwasa

Stars baada ya kupata goli hilo waliamka na kuanza kucheza mpira na kutawala mchezo kwa asilimia nyingi katika kipindi cha kwanza na kutengeneza nafasi kadhaa za kufunga lakini nafasi hizo hazikutumiwa ipasavyo kwani bado walipoteza nafasi nyingi za kufunga.

Dk tatu baadaye, Thomas Ulimwengu aliiandikia Stars bao la pili kufuatia makosa ya mlinda mlango wa ‘The Flames’ baada ya kuutema mpira uliopigwa na Haji Mwinyi kasha kumkuta mfungaji na kuihakikishia timu hiyo kupata ushindi wa kwanza tangu imeanza kunolewa na Mkwasa aliyepokea kijiti hicho toka kwa kocha Mart Nooij aliyetimuliwa mwezi Julai mwaka huu.

Kabla ya mchezo wa leo, Stars ikiwa chini ya kocha Mkwasa imetoka sare kwenye mechi mbili za mashindano na kupoteza mchezo mmoja wa kirafiki.

Sare ya kwanza ilikuwa ni dhidi ya Uganda mchezo uliochezwa Uganda kuwania kufuzu kucheza fainali za Afrika kwa wacheaji wa ligi za ndani (CHAN) huku wakitoka sare ya bila kufungana dhidi ya Nigeria kuwania kufuzu fainali za mataifa ya Afrika.

Stars ikiwa chini ya Mkwasa ilipoteza mchezo wa kirafiki dhidi ya Libya kwa goli 2-1 wakati ikiwa Uturuki kujiandaa na mchezo dhidi ya Nigeria.

SOURCE: SHAFFIH DAUDA