Julio awataka mashabiki Ndanda Fc kuiunga mkono timu yao.

Kocha wa Mwadui Fc, Jamuhuri Kiwelo 'Julio' akiongea na Juma News kuelekea mchezo wao na Ndanda Fc.

Na Juma Mohamed, Mtwara.

KOCHA wa timu ya Mwadui ya mkoani Shinyanga, Jamuhuri Kiwelo ‘Julio’ amewataka mashabiki wa timu ya Ndanda Fc ya mkoani hapa kuzidi kuiunga mkono timu yao na kujitokeza kwa wingi katika michezo yao kwasababu ni timu inayoonesha uwezo mkubwa katika michezo yake.

Akizungumza na Juma News wakati wa maandalizi ya mchezo wa ligi kuu ya Tanzania bara baina yao na Ndanda, alisema timu hiyo imeonesha uwezo wa hali ya juu katika michezo yake hasa katika mzunguko wa pili wa ligi hata pale ilipokutana na timu kubwa za Yanga na Azam.

“Lakini nimeifuatilia katika mechi mbili, ya FA na Yanga Ndanda walishinda kwa maana kwamba walidhurumiwa goli mbili ambazo mimi mwenyewe niliziona, lakini vilevile mechi na Azam..Azam ni timu ya watu wenye pesa na ina oganaizesheni nzuri lakini wameweza kupata sare na Ndanda ‘away’, kwahiyo wanatakiwa wasapotiwe Ndanda..” alisema Julio na kuongeza;

“Sasa mtu atakaesema mambo mengine tofauti kwa kuwabeza Ndanda, huyu mtu mpira hajui na nadiriki kusema ni mpuuzi na hajui nini anakifanya, kwahiyo tuisapoti Ndanda kwasababu ni timu ambayo inauweza mkubwa mimi nasema..” aliongeza.

Kocha wa Mwadui Fc, Jamuhuri Kiwelo 'Julio'

Akizungumzia uwezo wa Mwadui, alisema wana kikosi imara ambacho kinauwezo wa kupambana na timu yoyote katika ligi kuu jambo ambalo limewafanya wapate matokeo mazuri kwenye mechi zao na kuwa katika nafasi ya Sita katika msimamo.

Alisema, wao hawana haja na ubingwa ambao wamewaachia vilabu vya Simba, Yanga na Azam na kudai kuwa wamejikita katika kuhakikisha wanapata ubingwa wa michuano ya kombe la shirikisho la Azam Sports Federation Cup (FA) ambapo wao wameshatinga hatua ya nusu fainali hivyo wanasubiri mshindi kati ya Simba na Coastal Union.

“Ubingwa nimewaachia Simba, Yanga na Azam lakini huku kwenye kombe la washindi barani Afrika naamini nitapata nafasi kwasababu timu hizi zina majina tu au timu kongwe lakini hazinauwezo wa kutisha kama ulivyoona kwa Ndanda walivyofanya..kwasababu mimi nina experience ya kupambana na hizo timu kubwa ninaamini nitapata nafasi hiyo.” Alisema.