Mnyama asalenda Taifa mbele ya Wanajangwani..aondolewa kileleni.

Wachezaji wa Yanga wakishangilia goli, katika mchezo wa ligi kuu ya Vodacom Tanzania Bara dhidi ya Simba. Yanga walishinda magoli 2-0

Na Juma Mohamed.

KWA mara nyingine, wekundu wa Msimbazi timu ya Simba Sc leo imeshindwa kutamba mbele ya watani wao Yanga Sc baada ya kukubali kichapo cha magoli 2-0 katika mchezo wa ligi kuu ya Vodacom Tanzania Bara, uliofanyika katika uwanja wa Taifa, jijini Dar es Salaam.

Simba walianza mchezo vizuri wakicheza kwa pasi fupi kama kawaida yao na kutengeneza nafasi kadhaa langoni mwa Yanga ambao leo safu yao ya ulinzi iliyoongozwa na Mbuyu Twite na Vicente Bosou ilionekana kuyumba katika dakika za mwanzo kwa kufanya makosa ambayo hata hivyo Simba walishindwa kuyatumia.

Mambo yalianza kwenda kombo kwa Simba mapema tu ambapo katika dakika ya 34, mlinzi wa kati Abdi Banda alitolewa nje kwa kuonyeshwa kadi nyekundu na mwamuzi ikiwa ni kadi ya pili ya njano akiipata muda mfupi baada ya kuonyeshwa kadi ya njano ya kwanza, na kuifanya Simba kucheza pungufu.

Baada ya hapo walianza kuyumba kwa kucheza bila maelewano na kupoteza hali ya kujiamini ambapo katika dakika ya 39, mlinzi wa pembeni, Kessy Ramadhani alijikuta akiwazawadia Yanga bao la kuongoza baada ya kufanya makosa ya kupiga pasi fupi ya kuurejesha mpira kwa golikipa wake, Vicente Agban, ambao uliwahiwa na kiungo wa Yanga, Donald Ngoma na kumlamba chenga kipa kasha kuukwamisha mpira wavuni.

Dakika 45 za kwanza zikamalizika kwa Yanga kwenda mapumziko wakiwa kifua mbele kwa mtaji wa goli moja la kuongoza.

Kipindi cha pili Simba walirudi kwa kucheza kwa tahadhali huku wakiimarisha safu ya kiungo na mbele kumwacha Hamisi Kiiza pekeake ambapo walijaribu kupanga mashambulizi yao wakilazimisha kupita katikati jambo ambalo lilionekana kuwa gumu kwao hasa baada ya wapinzani wao kuimarisha sehemu yao ya kiungo.

Dakika ya 79, Yanga walipata goli la pili kupitia kwa Amis Tambwe, aliyeunganisha krosi ya Geofrey Mwashiuya aliyeingia kuchukuwa nafasi ya Harouna Niyonzima ambaye aliumia, bao ambalo lilidumu mpaka mwisho wa mchezo.

Kwa matokeo hayo, Yanga anarudi kileleni mwa ligi akiwa na alama 46 baada ya kucheza mara 19 huku Simba akirudi mpaka nafasi ya Tatu kwa kusalia na alama zake 45 ambapo sasa Azam ambao baada ya kushinda leo dhidi ya Mbeya City wamefikisha alama 45 lakini wakiwazidi Simba magoli ya kufunga na kufungwa.