Waandishi Mtwara wawachakaza bila huruma TRA, Nangwanda Sijaona..

Wachezaji wa timu ya Waandishi wa habari wa Mtwara (MTPC Fc) wakiwa katika picha ya pamoja na wachezaji wenzao wa timu ya Mamlaka ya Mapato Tanzania (TRA) mkoa wa Mtwra baada ya mechi ambayo waandishi walishinda kwa magoli 3-0.

Mratibu wa mabonanza ya timu ya waandishi wa habari wa mkoa wa Mtwara (MTPC Fc) Juma Mohamed, akihojiwa na vyombo vya habari baada ya kumalizika kwa mchezo kati yao na timu ya Mamlaka ya Mapato Tanzania (TRA) mkoa wa Mtwara. Waandishi walishinda magoli 3-0

Wachezaji wa timu ya waandishi wa habari mkoa wa Mtwara (MTPC Fc) wakiwa katika picha ya pamoja muda mfupi kabla ya kuanza kwa mchezo wao na timu ya Mamlaka ya Mapato Tanzania (TRA) uliopigwa katika uwanja wa Nangwanda Sijaona, Mtwara. Waandishi walishinda magoli 3-0.

Na Juma Mohamed, Mtwara.

TIMU ya soka ya Chama cha Waandishi wa Habari Mkoa wa Mtwara (MTPC Fc) imeendeleza ubabe katika michezo yake baada yah ii leo kuwagalagaza wakusanya mapato, timu ya Mamlaka ya Mapato Tanzania (TRA) mkoa wa Mtwara kwa kuwafunga magoli 3-0.

Katika mchezo huo wa bonanza ambao ulianadaliwa na MTPC, timu zote zilionekana kuanza mchezo kwa kasi huku zote zikicheza kwa tahadhari kubwa kuhepuka Kurusu mabao ya mapema na kujikuta wakienda mapumziko wakiwa hawajafungana.

Kipindi cha pili kilipoanza madiliko kadhaa yalifanyika kwa timu zote mbili ambayo hata hivyo yalionekana kuwa na manufaa kwa MTPC ambao walifanikiwa kupata mabao mawili ya haraka kupitia kwa kiungo wao Marick Mbuyu baada ya kupiga pasi ndefu za kuonana kabla ya mfungaji kuwatoka walinzi wa TRA na kupachika mabao hayo ya aina moja.

Baada ya hapo TRA walijaribu kupanga mashambulizi kadhaa langoni mwa MTPC na kudhani pengine wataweza kukomboa magoli hayo lakini baadae wakajikuta wanafungwa goli la Tatu likifungwa na Hassan Mayamba baada ya kubabatizana na mlinzi wa TRA.

Mwamuzi anapuliza filimbi ya mwisho kuashiria kumaliza mpambano huo, ni MTPC Fc ndio ambao walioibuka mashujaa kwa ushindi huo mnono wa magoli 3-0 na kuendeleza rekodi yao ya matokeo mazuri katika michezo wanayocheza uwanja wa Nangwanda, huku wakiwa na kumbukumbu nzuri ya kuwachapa mashabiki wa Ndanda Fc magoli 3-1 miezi kadhaa iliyopita.

Akizungumza baada ya mchezo huo, kiongozi wa TRA, Isack Mgongolwa, alisema wamefurahi kujumuika kwa pamoja na waandishi wa habari kwasababu wamepata fursa ya kufahamiana na waandishi mbalimbali.

Kiongozi wa timu ya Mamlaka ya Mapato Tanzania (TRA) mkoa wa Mtwara, Isack Mgongolwa, akihojiwa na vyombo vya habari baada ya kumalizika kwa mchezo wao na waandishi wa habari. Waandishi walishinda kwa magoli 3-0

Alisema, mechi za aina hiyo zinasaidia kuiweka miili katika hali nzuri kwasababu ni moja ya mazoezi muhimu kwa ajili ya kujijenga kiafya huku akisisitiza kuwe na mabonanza mengine kama hayo kwa ajili ya kujenga urafiki na wadau mbalimbali.

Akizungumza baada mchezo huo, katibu wa MTPC na Nahodha wa timu hiyo, Bryson Mshana, aliwapongeza wachezaji wake kwa kucheza kwa kujituma na kuonesha kiwango safi huku akiweka wazi kuwa huo ndio utakuwa utaratibu wa taasisi hiyo ya wanahabari wa kuwa na mabonanza kama hayo kila baada ya wiki mbili.

Alisema kitendo hicho kitasaidia sana kujiweka karibu na taasisi mbalimbali na kujenga urafiki baina ya wanahabari na taasisi jambo amablo ni muhimu katika kusaidia kulijenga Taifa.

“Huu ni utaratibu wetu na huu ni mwanzo tu lakini mipango yetu ambayo tumejiwekea ni kuwa na mechi ambazo tutakuwa tukicheza na taasisi mbalimbali angalau mara mbili kwa mwezi..hii itatusaidia sana kutujenga kiafya na kuweka ukaribu kati yetu na wadau wetu..” alisema Mshana.

Naye, mratibu wa bonanza hilo, Juma Mohamed, alliwataka waandishi wa habari kuona umuhimu wa kushiriki kwa pamoja katika michezo kama hiyo kwasababu inasaidia kuiaminisha jamii kuwa waandishi wa habari wapo karibu nao na wanajumuika katika masuala mengine tofauti na taaluma yao.

“Mimi nitoe wito tu kwa wanahabari wenzangu tuungane mkono katika haya masuala yakijamii kwasababu tumepanga kuwa na haya mabonanza na shughuli nyingine za kijamii ambazo tutafanya kwa utaratibu ambao tutajiwekea..nadhani itatusaidia sana kwanza kuwa fiti kiafya lakini pia kujiweka karibu na jamii ambayo tunafanya nayo kazi..” alisema na kuongeza:

“Nadhani wote mnakumbuka tukio lililotokea katika mchezo wa Ndanda hapa siku chache zilizopita na lilituhusu sisi kwasababu mwandishi mwenzetu alikamatwa na askari wakati akitekeleza majukumu yake, sasa hii inaweza kutuokoa katika majanga kama yale..” aliongeza.