Majaliwa atumbua ‘Jipu’ hospitali ya Ligula, Mtwara.

Waziri mkuu wa Jamhuri ya Muungano wa Tanzania, Mhe. Kassim Majaliwa,akiwa katika wodi ya wazazi akiongea na wagonjwa na kusikiliza maoni yao juu ya huduma wanazopatiwa katika hospitali ya rufaa ya mkoa wa Mtwara, Ligula katika ziara yake ya kikazi.

Waziri mkuu wa Jamhuri ya Muungano wa Tanzania, Mhe. Kassim Majaliwa,akiongea na Mfamasia mkuu wa hospitali ya rufaa ya mkoa wa Mtwara, Ligula, Dkt. Nassoro Juma, kufuatia malalamiko ya wananchi juu ya ukosefu wa dawa hospitalini hapo

Add caption

Daktari wa hospitali ya rufaa ya mkoa wa Mtwara Ligula, anayeshughulika katika kitengo cha wagonjwa wa nje (OPD) Dkt. Hindi Mastai, akitoa malalamiko yake kwa Waziri mkuu wa Jamhuri ya Muungano wa Tanzania, Mhe. Kassim Majaliwa, juu ya mapungufu yaliyopo hospitalini hapo. 

Na Juma Mohamed, Mtwara.

WAZIRI mkuu wa Jamhuri ya Muungano wa Tanzania Mhe. Kassim Majaliwa, amemsimamisha kazi kwa muda usiojulikana daktari mmoja wa hospitali ya rufaa ya mkoa wa Mtwara, Ligula, Dkt. Fortunatus Namahala, kufuatia kuwa na tuhuma za kupokea rushwa kutoka kwa mgonjwa.

Hatua hiyo imekuja baada ya waziri mkuu kufanya ziara ya kushtukiza hospitalini hapo jana asubuhi kwa ajili ya kukagua utendaji na miundombinu ya hospitali hiyo ambapo alianza kwa kwenda katika kitengo cha mapokezi ya wagonjwa kabla ya kwenda kusikiliza malalamiko ya wananchi waliokuwa wamekusanyika hospitalini hapo baada ya kupata taarifa za uwepo wake.

Baadhi ya wananchi waliopata nafasi ya kuwasilisha malalamiko yao kwa waziri walieleza mapungufu yaliyopo ikiwa ni pamoja na ukosefu wa maji, vipimo na dawa ambapo wanadai kuwa wanaelekezwa kwenda katika hospitali binafsi ambako huko watapata huduma zote zinazokosekana katika hospitali hiyo.

Waziri mkuu wa Jamhuri ya Muungano wa Tanzania, Mhe. Kassim Majaliwa, akiongea na Mganga Mkuu wa Mkoa wa Mtwara (RMO) Dkt. Shaibu Maarifa, kutaka majibu kufuatia malalamiko wanayoyatoa wananchi juu ya kutoridhishwa na huduma katika hospitali ya rufaa ya mkoa wa Mtwara, Ligula.

Tatu Abdallah, ambaye malalamiko yake kwa kiasi kikubwa ndio yamepelekea kusimamishwa kazi kwa daktari huyo, alisema alifika hospitalini hapo Februari 1 mwaka huu akiwa na mzazi wake wakiume ambaye ndio alikuwa mgonjwa kwa ajili ya kupatiwa matibabu ambapo alipatiwa vipimo na kuamriwa apelekwe Thieta.

Alisema daktari aliyempokea mgonjwa wake alimwagiza akanunue dawa zenye thamani ya sh. 85, 000 katika maduka yaliyopo jirani na hospitali ambapo alifanya hivyo aliporudi kwa daktari akaagizwa tena kwenda kununua uzi wenye thamani ya sh. 25,000 katika duka binafsi la Chambila.

Waziri mkuu wa Jamhuri ya Muungano wa Tanzania, Mhe. Kassim Majaliwa,akiwa katika ziara ya kutembelea maeneo mbalimbali katika hospitali ya rufaa ya mkoa wa Mtwara, Ligula ikiwa ni pamoja na wodini kupata maoni ya wagonjwa juu ya huduma zitolewazo hospitalini hapo

“Nikaenda kwa Chambila nikanunua uzi wa 25,000 nikamletea, nikamuuliza vimetimia akasema ndio ila mimi kama mimi ninataka hela 100,000 ili nimfanyie ‘Operation’ baba yako, nikamwambia hakuna shida nitakupa lakini ilimradi baba yangu niokoe uhai wake..” alisema.

Aliendelea kumweleza waziri mkuu kuwa pamoja na kukamilisha mahitaji yote aliyoagizwa na daktari na kukubali kutoa hizo sh. 100,000 lakini upasuaji haukufanyika mpaka kufikia Februari 7 alikuwa bado hajafanyiwa chochote huku akiamriwa tu kumpa chakula na kujibiwa majibu ya mkato kuwa daktari huyo hajiskii kumfanyia upasuaji mgonjwa.

Daktari wa hospitari ya rufaa ya mkoa wa Mtwara, Ligula, Dkt. Fortunatus Namahala aliyesimamishwa kazi na Waziri mkuu wa Jamhuri ya Muungano wa Tanzania, Mhe. Kassim Majaliwa, kufuatia tuhuma za kutaka kupokea rushwa kutoka kwa muuguzi, Tatu Abdallah.

Baada ya kuona hakuna dalili za kutibiwa hazipo, alichukua uamuzi wa kumpeleka katika hospitali binafsi ya Sajora akiwa amekabidhiwa boksi la dawa ambazo hata hivyo zilikataliwa na waliompokea kwa madai daktari wa hospitali hiyo anayehusika na upasuaji hawezi kuzikubali.

“Wakanipa namba ya dkt. Kaisi wa hapo Sajora, nikampigia nikamweleza akaniambia ngoja kwanza nije alipokuja nikamweleza akasema mimi ninaweza kumsaidia baba yako lakini kwa hali hii ninaweza kumuua kwasababu amechoka na siku zote Nane alizokaa Ligula hajakula, kanunue chakula umpe mzee, mimi kesho nitamfanyia upasuaji lakini ninahitaji 360,000..mimi nikageuka nikamwangalia baba nikasema kweli masikini tunakufa wakati siku bado..” alisema.

Alisema, baada ya baba kumsikia daktari akitoa agizo hilo la fedha, alimwambia mwanaye aende kijijini kwao, Kiromba ili auze shamba apate fedha hizo za kumkabidhi daktari ili amtibu mgonjwa.

“Na kweli mimi nikachukua pikipiki pale nikaenda siku hiyohiyo nikafanikiwa kupata sh. 500,000 nikarudi inaama shamba lake la heka 5 sasa hivi zimebaki heka Mbili na Nusu, nikafika pale Sajora akafanyiwa ‘Operation’ tukalipa tukarudi nyumbani..” aliongeza.

Waziri mkuu aliwajibu wananchi kuwa ameyapokea malalamiko yao na hata wale ambao walikosa nafasi ya kueleza aliwaambia kuwa anajua kiu yao na kuendelea na ziara yake katika wodi mbalimbali ikiwa ni pamoja na wodi ya wazazi ambako huko alikutana na changamoto ya wazazi kutumia nguo zao kutandika katika vitanda huku shuka zikiwa zimefungiwa.

Alitembelea pia wodi ya upasuaji ambako waandishi hawakuruhusiwa kuingia lakini hakuchelewa na baadala ya hapo aliamua kwenda katika ukumbi wa hospitali hiyo kwa ajili ya kuongea na watumishi wa hospitali hiyo.

Katika kikao hicho ambacho kilihudhuriwa na baadhi ya watumishi pamoja na maofisa wa hospitali hiyo, waziri mkuu aliamsimamisha mlalamikaji Tatu Abdallah, na kumtaka aende kumshika mkono daktari ambaye alimwomba rushwa ya sh. 100,000 ambaye awali alisema hamfahamu kwa jina lakini kwa sura anamjua.

Aliinuka na kwenda kumshika mkono na kumuinua daktari huyo ambaye alikaa nyuma kabisa ya ndani ya ukumbi huo na kuamriwa asogee mbele karibu na meza kuu na kisha kutamkiwa rasmi na waziri mkuu kuwa anasimamishwa kazi mara moja mpaka uchunguzi ukamilike na kumuamuru atoke nje ya ukumbi.

“Sasa naanza na wewe, utasimama kazi na uchunguzi unafanywa juu ya hilo..na wengine wote ambao nitawabaini utaratibu ni huo hatuwezi kwenda na hali hiyo kwa wananchi wa kawaida lakini hatuwezi kusita kwa ‘professional’ zenu..kama ulionywa utabadilika na hubadiliki nitajua na kama ulikua hufanyi usifanye, nataka mabadiliko kwanzia leo..” alisema waziri mkuu.

Waziri mkuu wa Jamhuri ya Muungano wa Tanzania, Mhe. Kassim Majaliwa,akiongea na watumishi wa hospitali ya rufaa ya mkoa wa Mtwara, Ligula baada ya kumaliza ziara ya kikazi hospialini hapo.

Alimwagiza kamanda wa polisi mkoa wa Mtwara, Henry Mwaibambe, kuhakikisha mama huyo analindwa vizuri kwa kuhofia anaweza kuwindwa na kufanyiwa vitendo viovu.

Aidha, alimtaka katibu tawala wa mkoa wa Mtwara, Alfred Luanda kwa kushirikiana na maofisa wa Taasisi ya Kuzuia na Kupambana na Rushwa (TAKUKURU) kufanya uchunguzi juu ya tuhuma zinazomkabili daktari huyo katika kipindi ambacho amesimamishwa kazi.

“RPC huyu mama alindwe asije akafuatwa jioni nyumbni, huu ni utaratibu wa kawaida wa ukweli na uwazi..mumemwambia akanunue dawa sawa, 100,000 ya nini? Alafu mumemwacha kumuhudumia, akalazimika kwenda kuuza shamba na kumpeleka Sajora, yani ameamua kutoiamini Ligula na kwenda kwenye Private Hospital..haileti picha.” Alisema.

Aidha, alisema kupitia kikao hicho ambacho alidhani kuwa kingekuwa cha kusikiliza changamoto kutoka kwa madaktari na kujua namna gani serikali imejipanga kuweza kuzitatua na kuboresha masilahi yao lakini imekuwa tofauti na baadala yake hakuweza kusikiliza hoja zao hizo kutokana na kuchukizwa na namna ambavyo wananchi wanapata shida katika kupata huduma.

Alimwagiza katibu tawala kuhakikisha kuwa maduka yote ya watu binafsi yaliyopo katika maeneo ya jirani na hospitali hiyo yafungwe mara moja na baadala yake kuwe na duka ndani ya hospitali na kitengo cha kutoa huduma za Mfuko wa Taifa wa Biama ya Afya (NHIF)

Kabla ya kufikia mwisho wa kikao hicho, baadhi ya madktari walisimama na kuomba kutoa malalamiko yao, ambapo walilalamikia namna wanavyopata shida ya kutekelezewa mahitaji yao na wakuu wao wengine wakielekeza lawama zao katika ofisi ya katibu tawala.

“Mimi nilifikia hatua ya kuandika barua kwa katibu mkuu wa wizara ya afya, nikampa nakala katibu mkuu wa Tamisemi, katibu mkuu wa ofisi ya waziri mkuu, nakala waziri wa afya na waziri wa Tamisemi..lakini nilivyorudi hapa nikaitwa na Ras na wakuu wa Idara nikapata vitisho..na hata kama nikifa basi katibu tawala na watu wake wawe ‘responsible’, kwasababu ubadhirifu wa majengo umekisiri hapa hospitali haiwezekani hospitali ya mkoa tuwe na Oxygen Mashine moja..” alisema Dkt. Hindi Mastai kutoka kitengo cha wagonjwa wanje (OPD) anaeshughulikia Bima.

Aliitaka serikali kuwawajibisha wahusika wanaosimamia huduma za afya mkoani hapa na kusema lawama zinaelekezwa kwao kwa makosa kwani wanaopaswa kuanza kushughulikiwa ni hao, huku akitaja mapungufu mengine hospitalini hapo kuwa ni pamoja na ukosefu na uchafu katika choo cha wodi ya wazazi ambayo ilifanyiwa usafi baada ya kupata taarifa za ujio wa waziri mkuu.