Elimu Bure yasababisha mlinzi kuwa ‘ombaomba’.

Na Juma Mohamed, Mtwara.

WANANCHI wa kijiji cha Lyowa, halmashauri ya wilaya ya Mtwara wameonesha kukerwa na tabia ya mlinzi wa shule ya msingi Lyowa, Athuman Naweka anaedaiwa kuwa na tabia ya kuomba chakula katika kila nyumba anaeishi mwanafunzi wa shule hiyo.

Wananchi hao waliwasilisha malalamiko yao kupitia mkutano wa hadhara ulioitishwa na mbunge wa viti maalumu mkoa wa Mtwara Tunza Malapo, wakati wa kukabidhi bati 70 kwa ajili ya ujenzi wa ofisi ya kijiji cha Lyowa.

Wanadai kuwa mlinzi huyo ambaye waliingia naye mkataba kwa ajili ya kulinda shule, ameanza kuwa na tabia hiyo mara baada ya serikali kuja na mpango wa kutoa elimu bure kwa shule za msingi na sekondari.

“Mlinzi tumeingia naye mkataba kijiji cha Lyowa lakini tangu Rais alipotangaza elimu bure mpaka leo hajalipwa pesa zake sasa mlinzi anapata mashaka anapita nyumba hadi nyumba anakwambia mimi ni mlinzi nalinda shule yenu na pesa sipati kwahiyo leo nimekuja kula kwako leo na akishakwambia leo anakuja kula kwako hatanii ndivyo ilivyo amekuwa kama mwanafamilia wa kijiji..”aisema Twalib Mtambula.

Diwani wa kata hiyo, Hassan Likutwe alisema tabia hiyo inayofanywa na mlinzi huyo inatokana na kukosa mshahara hivyo wamedhamiria kuitisha mkutano wa wananchi ili kuona namna ya kuondokana na tatizo hilo.

Alisema aliwahi kwenda nyumbani kwake na kumlalamikia juu ya kukosa mshahara na namna anavyofanya kazi katika mazingira magumu lakini alishindwa kumpa majibu ya moja kwa moja.

“Mimi aliwahi kuja kwangu kunilalamikia lakini nilimwambia sina jibu la moja kwa moja kwasababu sasahivi hairuhusiwi mtu yeyote kuchangishwa michango kwa ajili ya kupelekwa shule, kwahiyo nikamwambia itabidi tuweke mkutano wa wananchi ili tupate ridhaa ya sisi wenyewe tujitoe ili aweze kupata stahiki zake..”alisema Likutwe.

Kwa upande wake, mlinzi huyo alikiri kufanya kitendo hicho na kudai kuwa ni kutokana na kutopata mshahara wake kwa miezi mitatu amekuwa akilazimika kupita nyumba hadi nyumba ili kupata chakula kwani kila anapodai mshahara anaambiwa asubiri pesa ya serikali.

“Ni kweli nagonga nyumba hadi nyumba kwasababu nalinda shule yenye watoto wao, mimi sijalipwa mshahara wangu wa miezi mitatu kwahiyo familia yangu inaishi kwa tabu na kila nikidai mshahara wangu shuleni naambiwa nisubiri pesa ya Rais ambayo mimi sijui italetwa lini..” alisema Naweka

Katika hatua nyingine, mwalimu mkuu wa shule hiyo Oraf Mlima, alisema shule inakabiliwa na uhaba wa walimu pamoja na nyumba za walimu hali inayowafanya kuishi kwa mashaka hasa kipindi cha mvua kutokana na nyumba zao kubomoka na hivyo kurudisha utendaji kazi nyuma.

“Kama mnavyoona mazingira ya nyumba zetu yalivyo ni kwamba tunapata adha kubwa sana kwanza ukiangalia zimeengeshwa na miti kwasababu zinadondoka na wakati wa mvua kama hivi zinavuja kwahiyo inatulazimu kutoa mishahara yetu walau kuziba lile eneo tunalolala, hiki ni kilio cha Tanzania nzima lakini katika mazingira yetu hali ni ngumu zaidi na hata ufanyaji wa kazi kiutendaji unakuwa mgumu kutokana na mazingira.” Alisema.

Mbunge wa viti maalumu mkoa wa Mtwara, Tunza Malapo alisema kutokana na hali za walimu kuwa mbaya zimekuwa zikiwapunguzia hari ya kufanya kazi na kumtaka   waziri mwenye mamlaka kuangalia suala hilo upya.

“Tuache masihara tusichezee elimu, elimu ina mambo mengi lakini mwalimu anatakiwa aishi viruzi alale sehemu nzuri ili kesho aamke aende shule akafundishe kwa ustadi..walimu wana moyo wa kufundisha lakini mazingira yanawarudisha nyuma..” alisema na kuongeza:

“Mimi kama mbunge nimejionea hali hii kwa macho yangu nitalisimamia kuhakikisha yanapatiwa ufumbuzi wa kudumu kwasababu hata mimi nimetokea kwenye ualimu.” aliongezaMalapo.