500 kufanyiwa upasuaji wa macho bure Mtwara.

Wananchi kutoka maeneo mbalimbali katika Manispaa ya Mtwara Mikindani waliohudhuria hafla fupi ya uzinduzi wa jengo la Kliniki ya Macho lililopo katika hospitali ya rufaa ya mkoa wa Mtwara, Ligula lililojengwa na Shirika la Heart To Heart Foundatio kwa ufadhili wa serikali ya nchini Korea.

Mkurugenzi wa Shirika la Heart To Heart Foundation nchini Tanzania, Grace Lee, akisoma taarifa ya mradi wa ujenzi wa jengo la Kliniki ya Macho katika hospitali ya rufaa ya mkoa wa Mtwara, Ligula lililojengwa na shirika hilo kwa ufadhili wa serikali ya Korea

Viongozi mbalimbali kutoka ofisi ya mkuu wa mkoa wa Mtwara, Shirika la Heart To Heart Foundation na Hospitali Ligula wakikata utepe kuashiria uzinduzi wa jengo la Kliniki ya Macho lililopo katika hospitali hiyo lililojengwa na Shirika hilo kwa ufadhili wa serikali ya Korea.

Na Juma Mohamed, Mtwara.

WAGONJWA 500 watakaougua ugonjwa wa macho wa kufanyiwa upasuaji (Mtoto wa Jicho) watapata matibabu bure katika Kliniki ya Macho iliyopo katika hospitali ya rufaa ya mkoa wa Mtwara, Ligula kupitia mradi wa ujenzi wa Kliniki hizo unaotekelezwa na shirika la Kikorea la Heart to Heart Foundation.

Akizungumza juzi mkoani hapa katika hafla ya uzinduzi wa jengo la Kliniki hiyo, mkurugenzi wa shirika hilo, Grece Lee, alisema jengo hilo lililogharimu zaidi ya dola za Kimarekani 110,000 tayari limekamilika likiwa na vifaa vya kisasa kwa ajili ya kutoa huduma za upasuaji wa macho (Mtoto wa Jicho).

Alisema, pamoja na kukamilika kwa jengo hilo lakini amegundua kuwa mkoa wa Mtwara bado unakabiliwa na changamoto kubwa juu ya mahitaji ya matibabu ya ugonjwa huo ambapo alizunguka katika wilaya zote na kubaini uwepo wa changamoto hizo, hivyo tayari amepanga andiko lingine atakalolituma serikali ya Korea kuomba ufadhili kwa ajili ya mradi mwingine.

“Mimi nimeshapanga mradi mwingine tayari sasa nitatuma serikali ya Korea na wakinijibu sawa, tunaendelea na miradi yetu hapa Mtwara..kwahiyo kama ikiboreshwa huduma ya macho mkoa wa Mtwara itapendeza, watu vijijini wa mjini wanoumwa macho wakipona vizuri wataendelea na maisha yao vizuri..” alisema.

Alisema, hali ya upatikanaji wa huduma za afya kwa wananchi katika maeneo mengi ya mkoa wa Mtwara hasa ya vijijini ni ya shida sana huku ikichangiwa kwa kiasi kikubwa na uhaba wa vituo vya afya, zahanati na ugumu wa maisha kwa wananchi na kupelekea kushindwa kumudu gharama za matibabu.

“Kipato kule vijijini watu wengine wanasema 5,000 wengine kwa mwezi 10,000 wengine kipindi cha korosho wanasema labda wanapata 100,000 lakini bado haitoshi kwenda hospitali kwenda kununua vitu..tukienda kwa wanafunzi zile kadi za afya watoto wanazo mmoja mmoja shule nyingne wanayo kama nusu na wengine robo..” alisema.

Mratibu wa huduma za macho katika mkoa wa Mtwara, Dkt. Upendo Abeid, alisema jamii ya mkoani hapa bado ina uelewa mdogo juu ya ugonjwa huo ambao unaweza kupelekea kuwa kipofu iwapo utachelewa kupata tiba.

“Kuna magonjwa mengine unatakiwa kuja hospitali mapema ili uchunguzi ufanyike mapema na kuweza kubaini tatizo lakini kwasababu uelewa wa jamii ni mdogo wanakuja wakiwa wamechelewa kwahiyo wanapoteza macho yao na kutoona tena..” alisema.

Athuman Bakari, ni mmoja wa watu waliowahi kuugua ugonjwa huo kwa kipindi kirefu na kumfanya ashindwe kuona vizuri, lakini kwa sasa amepona tatizo hilo baada ya kupata matibabu kutoka kwa wataalamu kupitia hospitali ya Ligula.

“Nilisikia vyombo vya habari kwamba watu wa msaada wa upasuaji wa macho wapo pale Ligula wanapasua macho kama ni mgonjwa basi nenda..mimi nikaja nikawakuta wataalamu baada ya kunichunguza kweli nikakutwa na tatizo, nikafanyiwa upasuaji baada ya muda kweli sasa hivi najisikia niko vizuri, naona na biashara zangu nafanya vizuri..” alisema.