Rungwe: CCM ni sawa na betri iliyoishiwa chaji.

Mgombea Urais wa Jamhuri ya Muungano wa Tanzania kupitia Chama cha Ukombozi wa Umma (CHAUMMA), Hashimu Rungwe, akihutubia katika mkutano wa hadhara wa kunadi sera za chama na kuomba kura, kwa wananchi wa Manispaa ya Mtwara, uliofanyika jana katika kata ya Vigaeni mjini Mtwara.

Na Juma Mohamed.

MGOMBEA Urais wa Jamhuri ya Muungano wa Tanzania kupitia Chama cha Ukombozi wa Umma (CHAUMMA), Hashim Rungwe, amesema serikali ya Chama Cha Mapinduzi (CCM) imechoka kiasi cha kushindwa kuinua hali duni walizonazo wananchi kwa kipindi cha zaidi ya miaka 50.

Akizungumza juzi mkoani hapa katika mkutano wa hadhara wa kunadi sera za chama na kuomba kura kwa wananchi, alisema CCM ni sawa na betri iliyoisha ‘chaji’ kutokana na kukosa nguvu na mbinu za kuwafanya wananchi waishi maisha bora huku kukiwa na rasilimali nyingi za kuinua uchumi.

Alisema, iwapo wananchi watamchagua kuwa Rais, atahakikisha kunajengwa viwanda vya kusindika nyama, kutengeneza nguo ambazo zitawafanya watu waache kuvaa mitumba pamoja na viwanda vya kutengeneza magari.

“Jamaa mwingine alikuwa ananiuliza mimi eti nitajenga viwanda hela nitapata wapi, nikamwambia muulize mzee aliyetangulia ela alitoa wapi..hela ipo wasiwadanganye mbona wananunua mabaluni yale..mimi nauza magari, si mnajua kuwa biashara yangu ni kuuza magari..leo mnawafundisha watanzania kuuza magari haya yaliyotumiwa na wenzetu sisi hatuna uwezo wa kutengeneza magari, ila mkinipa mimi tunatengeza magari hapa..” alisema.

Hashim Rungwe

Alisema, Tanzania kuna watu wenye uwezo mkubwa na vipaji ambavyo vinaweza kuwafanya waunde bidhaa mbalimbali yakiwemo magari, na kwamba hawana tofauti na watu wa Japani ambako ni maarufu kwa utengenezaji wa magari.

Aliwataka wananchi kumpigia kura za Urais na kuachana na kuichagua CCM huku kura za Udiwani na Ubunge wawapigie vyama vingine vya upinzani na kuwasihi kuto pigia chama kimoja na baadala yake wachaguwe wabunge wa vyama mbalimbali ili kutoa ushindani wa kweli bungeni.

“Msije mkakipa chama kimoja wabunge wote, timu lazima iwe ‘combine’..tumeona jeuri ya CCM kule bungeni wakati mimi nagombea bunge la katiba, walinibana huku na huku wanatumia uwingi..hakuna mbunge wa chama kimoja akake pekeake bungeni hatutaki..nataka mchanganyiko, CHADEMA kidogo, NCCR kidogo, CUF kidogo, CHAUMMA kidogo tunataka mchanganyiko..” alisema.

Hashim Rungwe

Awali, mwenyekiti wa chama hicho mkoa wa Mtwara, Fatuma Selemani, alisema wameacha kusimamisha wagombea wa Udiwani na Ubunge kwasababu wanaunga mkono muungano wa vyama vinavyounda Umoja wa Katiba ya Wananchi (UKAWA).

Alisema, kutokana na adha waliyoipata Wanamtwara wakati wa vurugu za gesi, ambazo CHAUMMA wanaamini zilichangiwa kwa kiasi kikubwa na serikali iliyopo madarakani ya CCM, wameona kuna haja ya kuungana UKAWA kuweza kuwaondoa madarakani.

“Kwahiyo sisi CHAUMMA pamoja na viongozi wangu wa kitaifa wameliona hilo pamoja na kukumbuka adha ya Mtwara..walikuwa wanaona tulivyokimbia lakini viongozi hawa mmoja alikuja lakini alishindwa kufanya mkutano kwasababu ya kufukuzwa na watu hawajatulia wakangoja mpaka watulie..” alisema.

Naye, mgombea mwenza wa chama hicho, Issa Habasi Hussein, alitaja vipaumbele vya chama hicho kuwa ni pamoja na ajira, afya kutolewa bure kwa wananchi, kutoa mikopo kwa wafanya biashara wadogo ambayo haitakuwa na riba, pamoja na kutoa elimu bure kuanzia darasa la kwanza mpaka chuo.