Wanawake Mtwara watakiwa kujiunga na SACOS kujikwamua kiuchumi.

Wanachama wa Umoja Mtwara Sacos (UMOSA) wakiwa katika kikao cha kujadili masuala mbalimbali ya kikundi chao.

Na Juma Mohamed, Mtwara.

WANAWAKE na vijana mkoani hapa wametakiwa kujiunga na Umoja Mtwara Sacos (UMOSA) ili waweze kunufaika na mikopo ya gharama nafuu inayotolewa na SACOS hiyo kwa ajili ya kujikwamua kimaisha na kuacha kuwa tegemezi.

Wakizungumza na Nipashe, baadhi ya wanawake ambao ni wanachama wa SACOS hiyo, walisema kuwa kikundi hicho hakina ubaguzi kwa jinsi yoyote lakini kutokana na baadhi ya wanawake kuwa na woga wa kuthubutu, kimetoa kipaumbele kwao kuhakikisha wanapiga hatua.

Wanachama wa UMOSA

“Mimi niwatoe wasiwasi, kikundi hiki hakibagui jinsia ya kike na kiume tena wanawake tunapewa kipaumbele hata kupata nafasi ya kuwa viongozi ili tuweze kupata ule ujasiri wa kuweza kusimama lakini pia kusimama kama mwanamke kuondoa ule utegemezi wa kumtegemea mwanaume..kwahiyo mimi nawashauri waje wajiunge tunapata elimu tena wanawake tunapata elimu za bure..” alisema Ritha Kiteleki.

Katibu wa kikundi hicho Evalaiti Matinga, alisema kutokana na hali ya maisha ilivyo kwa sasa kuna haja ya kushirikiana baina mke na mume katika kutafuta kipato, hivyo wanawake lazima wabadilike na kuchangamkia fursa kama hizo za kujiunga na vikundi vitakavyowapatia mikopo ambayo haina masharti magumu.

Alisema licha ya kuwa na kibarua kinachomuingizia kipato, lakini aliona kuna umuhimu wa kujiunga na kikundi hicho kwasaabu ameona Mtwara kuna fursa nyingi z kujikwamua kiuchumi ambazo kama mtu ukiwa na mtaji mzuri unaweza kufanikiwa.

Mwenyekiti wa SACOS hiyo iliyoanzishwa mwaka jana yenye jumla ya wanachama 26, Clemence Mwombeki, alisema inalenga kupunguza makali ya maisha kwa wananchi wa Mtwara ambao kwa wakifanikiwa kuwa wanachama wanaweza kununua hisa kwa bei nafuu.

“Hisa zetu ni 250,000 ambazo ni kama hisa 10 kwa maana ya kila hisa moja ni sh. 25,000..SACOS hii inalenga kupambana na umasikini na imekuwa tofauti na SACOS nyingine ambazo zimekuwa zikianzishwa katika maeneo tofauti, hii imeundwa na sheria, kanuni na katiba yetu..” alisema.