Wabunge Mtwara waitaka serikali kutimiza ahadi ya ujenzi wa barabara.

Mbunge wa Tandahimba (CUF), Katan Ahmad, akizungumza na waandishi wa habari baada ya kumalizika kikao cha bodi ya barabara.

Mbunge wa Newala vijijini, Rashid Akbar, akizungumza na waandishi wa habari juu ya kero za miundombinu ya barabara jimboni kwake na mkoani Mtwara kwa ujumla.

Mbunge wa Newala mjini (CCM), Geroge Mkuchika, akichangia jambo katika kikao cha bodi ya barabara.

Na Juma Mohamed, Mtwara.

WABUNGE mkoani hapa wameitaka serikali kutekeleza ahadi zake inazozipanga ikiwamo ahadi ya ujenzi wa barabara ya Mtwara-Nanyamba-Tandahimba-Newala na Masasi, ambayo imekuwa kero kubwa kwa wananchi wa Mtwara.

Wakizungumza mara baada ya kikao cha bodi ya barabara, walisema ahadi za ujenzi wa barabara hiyo zimekua zikitolewa muda mrefu kuanzia serikali ya awamu ya Nne ambayo mpaka inamaliza muda wake hakuna chochote kilichofanyika.

Walisema, wakati wa kampeni za kuelekea uchaguzi mkuu wa mwaka jana, Rais wa Jamhuri ya Muungano wa Tanzania, Mhe. John Magufuli, aliwaahidi wananchi juu ya ujenzi wa barabara hiyo yenye urefu wa Km 210, na kuwaambia kuwa tayari ilishatengewa pesa zaidi ya sh. Bilioni 60.

“Lakini jambo la ajabu leo tunakuja kwenye kikao tunapewa sanaa tu ya Bilioni 3.5 ambazo haziwezi kufanya jambo lolote..sasa hili ni jambo la ajabu sana na huu wakati tuliokuwa nao sio wakati wa siasa, na muda wote huwezi kuwafanya Watanzania kuwa watoto unazungumza jambo la Km 210 alafu kwenye bajeti unatoa ahadi ya Km 50 lakini kwenye bajeti hakuna hata Km 5, sasa hii ni sanaa..” alisema Katani Ahmad, Mbunge wa Tandahimba (CUF).

Aliwataka wabunge wenzie wa mkoa wa Mtwara kulivalia njuga suala la ujenzi wa barabara hiyo kwa kwenda kuonana na waziri husika kwa ajili ya kutoa msukumo na ikibidi hata kwenda kuonana na Rais ili ahadi yake ianze kutekelezwa.

Naye, mbuunge wa viti maalum (Chadema), Tunza Malapo, alisema changamoto kubwa inayoyumbisha ujenzi wa barabara ni uchache wa fedha zinazotengwa na serikali na wakati mwingine kutopatikana kabisa.

Mbunge wa viti maalum (CHADEMA), Tunza Malapo, akizungumza na waandishi wa habari juu ya kero za barabara Mtwara.

“Ingawa tumepewa matumaini kwamba watafuatilia na kutekeleza wale ambao wanahusika moja kwa moja lakini na sisi kama wabunge tuna nafasi yetu ya kufuatilia na pia kusisitiza kwa wale mawaziri wenye dhamana watusikie na kujali hasa barabara yetu hii ya uchumi yenye Km 210..tumeambiwa kwa mpango wa awali itajengwa kwa kiwango cha lami kwa Km 50 ingawa bado pesa ni tatizo lakini tutaendelea kufuatilia na kusisitiza..” alisema.

Kwa upande wake, mkuu wa mkoa wa Mtwara, Halima Dendego, alikiri kuwepo kwa changamoto za upatikanaji wa fedha na kusema kuwa ndio inakwamisha kumalizwa kwa kero hiyo ya muda mrefu kwa wakazi wa Mtwara na wilaya zake.

Alisema, fedha inapochelewa kupatikana ndipo miradi inachelewa kuanza na kwamba kadri barabara zinapokaa kwa muda mrefu bila kutengenezwa ndipo zinazidi kuharibika hivyo mahitaji ya fedha yanakuwa makubwa mwaka hadi mwaka.

Mkuu wa mkoa wa Mtwara, Halima Dendego, akizungumza na waandishi wa habari baada ya kumalizika kikao cha bodi ya barabara.

“Miradi ya 2015/2016 pesa yake hata senti moja bado hatujaipata, kwahiyo unapochelewa kupata fedha hata utekelezaji wa miradi ambayo tumejipangia kuitekeleza inakua inachelewa, inapochelewa basi changamoto inaongezeka kama eneo lenye uharibifu lilikua dogo basi unaweza ukakuta limepanuka tena hata wakati wa utekelezaji zile bajeti zinaweza kuwa sio halisia..” alisema.

Alisema serikali ya mkoa bado inaendelea kuwasiliana na wizara ili kuhakikisha fedha zinapatikana kwa wakati kwa ajili ya kuikamilisha miradi hiyo na kuzifanya barabara ziweze kupitika vizuri kwa wakati wote wa mvua na jua.