Serikali kuokoa dola bil. 1 kwa mwaka kutokana na matumizi ya gesi asilia.

 

Meneja Mradi wa kiwanda cha kuchakata gesi kilichopo Madimba, mkoani Mtwara, Leonce Mrosso, akitoa maelezo kuhusu mradi huo mbele ya waandishi wa habari wa mikoa ya Mtwara, Lindi na Dar es Salaam baada ya kutembelea kiwandani hapo jana.

Katibu wa Baraza la Habari Tanzania (MCT) Kajubi Mukajanga, akifungua mafunzo ya siku mbili kwa waandishi wa habari wa mikoa ya Mtwara, Lindi na Dar es Salaam, kuhusu namna ya kuandika habari za rasilimali za mafuta na gesi.

Waandishi wa habari wa mikoa ya Mtwara, Lindi na Dar es Salaam, wakiwa katika mafunzo ya siku mbili ya namna ya kuandika habari za rasilimali za mafuta na gesi, yaliyofanyika katika ukumbi wa Naf Beach, Mtwara.

Waandishi wa habari wakiwa katika ukumbi wa mikutano katika eneo la mradi wa gesi uliopo Madimba mkoani Mtwara, baada ya kutembelea ikiwa ni sehemu ya somo katika mafunzo ya kuandika habari za rasilimali za gesi na mafuta.

Na Juma Mohamed, Mtwara.

SERIKALI itaokoa kiasi cha dola za kimarekani bilioni 1 kwa mwaka zinazotumika kwa kuagiza mafuta kutoka nje baada ya kuanza kuzalisha umeme kwa kutumia gesi asilia kutoka katika kiwanda cha kuchakata rasilimali hiyo cha Madimba, mkoani hapa.

Hayo yamezungumzwa juzi na meneja mradi wa kiwanda hicho Leonce Mrosso, alipokuwa akizungumza na waandishi wa habari wa mikoa ya Mtwara, Lindi na Dar es Salaam baada ya kutembelea kiwandani hapo kama sehemu ya somo wakiwa katika mafunzo ya siku mbili ya kujifunza kuandika habari za rasilimali za mafuta na gesi yaliyoandaliwa na Baraza la Habari Tanzania (MCT).

Alisema licha ya kuokoa kiasi hicho cha fedha kupitia rasilimali hiyo ambayo uzalishaji wake unakadiriwa kuanza kati ya Septemba 15-20 mwaka huu,kutakuwa na faida nyingine kwa taifa ambazo ni kuwa na umeme wa uhakika na kuongezeka kwa viwanda ambavyo vitaliingizia taifa mapato.

“Faida za rasilimali hii ni nyingi sana..kwasababu hiki kiwanda baada ya kuchakata gesi sasa kutakuwa na mabaki yale ambayo yenyewe ni faida vilevile kwasababu yatatumika kwa kutengeza vitu vingine kama plastiki..lakini nchi yetu haitakuwa na tatizo tena la umeme na hata viwanda vitaongezeka kwasababu watu watakuja kuwekeza zaidi kwa ajili ya kufuata umeme wa uhakika..” alisema.

Aliongeza kuwa, upatikanaji wa maji kwa wakazi wa eneo linalozunguka mradi ni faida nyingine inayotokana na rasilimali hiyo huku akisema mpaka sasa ni kijiji cha Madimba pekee kinachopata maji na kwamba juhudi ya kuvifikia vijiji vingine zinafanyika.

Aidha, alisema zoezi linaloendelea sasa kiwandani hapo ni kuijaribu mitambo kabla ya kuanza kuisukuma gesi kuipeleka Kinyerezi, ikiwa ni wiki moja baada ya kufungua gesi hiyo kutoka katika visima viwili kati ya vitano vilivyopo Msimbati.

Alisema kiwanda hicho kinauwezo wa kuzalisha gesi futi za ujazo milioni 210 kwa siku huku bomba linalotoka kiwandani hapo kwenda Kinyerezi lenye urefu wa km 487 na inchi 36, linauwezo wa kusafirisha gesi yenye futi za ujazo 784 kwa siku, hivyo hakuna uwezekano wa gesi kuisha kwenye bomba.

Alisema asilimia 95 za fedha za ujenzi wa mradi huo ambao umegharimu kiasi cha dola za kimarekano bilioni 1.33 ni za mkopo kutoka katika benki ya Exim ya nchini China huku fedha za serikali ikiwa ni asilimia 5 iliyobaki.

Awali akizungumza katika ufunguzi wa mafunzo, katibu wa MCT, Kajubi Mukajanga, aliwataka waandishi wa habari kubadilika katika uandishi hasa katika kuandika habari zinazohusu masuala ya uziduaji, na kuuliza maswali kwa ajili ya kupata undani wa jambo na kuepuka kuandika taarifa kama inavyotolewa na mtoaji.

“Kila nyumba itakuwa na mabomba mawili, moja la maji lingihe la gesi..na sisi tunaandika tu hivyo hivyo hatuulizi nini kitatakiwa ili hali hiyo iweze kutokea, hatuulizi itawezekanaje katika mazingira ambayo Tandale hata hilo bomba la maji lenyewe kupitisha mpaka kufika nyumbani kwako ni mbinde..” alisema.

Alisema lengo la mafunzo hayo ni kumfanya mwandishi aweze kuuliza maswali ya nyongeza kwa chanzo chake na kuto ridhika na maelezo yanayotolewa kwa kuamini kuwa yamejitosheleza.