Mgombea NCCR achukuwa fomu ya ubunge Mtwara mjini.

Mgombea ubunge jimbo la Mtwara mjini kupitia chama cha NCCR-Mageuzi, Hassan Uledi.

Na Juma Mohamed, Mtwara.

MGOMBEA Ubunge jimbo la Mtwara mjini kupitia chama cha NCCR-Mageuzi, Hassan Uledi,  amekiri kuwa bado jimbo hilo lipo katika hali ya sintofahamu juu ya nani anapaswa kuwa mgombea rasmi kupitia vyama vinavyounda Umoja wa Katiba ya Wananchi (UKAWA).

Uledi aliyazungumza hayo mapema leo baada ya kuchukuwa fomu ya kugombea ubunge kwa jimbo hilo, katika ofisi ya mkurugenzi wa manispaa ya Mtwara Mikindani, Limbakisye Shimwela.

Kumekuwa na mvutano mkubwa kwa vyama viwili vya NCCR-Mageuzi na Chama cha Wananchi (CUF) kati ya vinne vinavyounda UKAWA juu ya chama gani kinachopaswa kusimamisha mgombea katika jimbo hilo.

Alisema, aliitwa na viongozi wa UKAWA akiwa na mgombea wa CUF, Maftaha Nachuma ambaye tayari amechukuwa fomu, na kukutanishwa na mwanasheria ambapo walihojiwa juu ya nani anayefaa kugombea jimbo hilo lakini bado hakukuwa na maamuzi yaliyotolewa kuamua nani anafaa kugombea.

“Kwahiyo kwakuwa chama changu kinakwenda na wakati, wameniamrisha nichukue fomu leo ili hapo itakapotamkwa kuwa ni nani asimame, iwe tayari nimeshajipanga kwa kila jambo..” alisema.

Aliwataka Wanamtwara kukumbuka historia ya matukio yaliyotokea awali wakati wa vurugu za gesi na kuepuka kuwaunga mkono watu ambao wanajitokeza katika kipindi hiki ambacho hali imetulia na kuwaaminisha kuwa wao ndio wanafaa kuwa wawakilishi wao bungeni.