UKAWA waendelea kuvutana jimbo la Mtwara mjini.

Mkurugenzi wa manispaa ya Mtwara Mikindani, Limbakisye Shimwela, akimkabidhi fomu ya ugombea ubunge jimbo la Mtwara mjini, mgombea wa Chama cha Wananchi (CUF), Maftaha Nachuma.

Mkurugenzi wa manispaa ya Mtwara Mikindani, Limbakisye Shimwela, akimpa maelekezo mgombea ubunge wa Mtwara mjini kupitia Chama cha Wananchi (CUF), Maftaha Nachuma, baada ya kuchukua fomu ya ugombea juzi katika manispaa hiyo.

 Na Juma Mohamed, Mtwara.

HALI bado tete kwa upande wa vyama vinavyounda Umoja wa Katiba ya Wananchi (UKAWA) mkoani hapa kutokana na kuwa na mkanganyiko juu ya chama gani kilichohalalishwa na umoja huo kusimamisha mgombea wa ubunge katika jimbo la Mtwara mjini.

Hali hiyo inatokana na kupishana kwa kauli za viongozi na wagombea ubunge wa vyama viwili kati ya vinne vinavyounda umoja huo, vya NCCR-Mageuzi na Chama cha Wananchi (CUF) kuonekana kujihalalishia jimbo hilo na kudai kuwa vimepata ridhaa kutoka kwa viongozi wa UKAWA.

Juzi mgombea ubunge katika jimbo hilo kupitia Chama cha Wananchi (CUF), Maftaha Nachuma, alikwenda kuchukuwa fomu ya ugombea katika ofisi ya mkurugenzi wa manispaa ya Mtwara Mikindani, Limbakisye Shimwela, kusema kuwa amepata ridhaa hiyo kutoka kwa uongozi wa chama chake lakini kupitia mwamvuli wa UKAWA.

Alisema awali waliitwa katika ofisi ya mwenyekiti mwenza wa UKAWA Mhe. James Mbatia, jijini Dar es Salaam, ambapo alikuwa na mwenyekiti wa chama cha NCCR-Mageuzi mkoa wa Mtwara, Hassan Uledi, ambaye pia aliwahi kutangaza kuwa chama chake ndicho kimepewa jimbo hilo na UKAWA, taarifa ambazo zilikanushwa na katibu mkuu wa NCCR, Mosena Nyambabe.

“Baada ya kufika tuliambiwa tuweke CV (wasifu) mezani, kwamba nani kati yetu ana uwezo mkubwa wa kupeperusha bendera ya UKAWA Mtwara mjini, kwasababu lengo la UKAWA ni kuhakikisha kwamba tunapata Rais mmoja..lakini sio tu Rais mmoja, ni kuhakikisha tunapata wabunge ambao wanaenda kuwa mawaziri lakini na wabunge ambao watahakikisha watetea masilahi ya wananchi wa sehemu husika..” alisema.

Na kuongeza “kwahiyo tukalazimika tuoneshe CV zetu, nikaanza mimi kuzungumza baadae akaja Mhe. Uledi ikaonekana CV za mwenzangu zimepwaya ndipo yakatoka mapendekezo kwamba jimbo la Mtwara asimame Mhe. Maftaha kupitia CUF..” aliongeza.

Alisema, ukiachiliambali wasifu, vigezo vingine vilivyoangaliwa ni chama kilicho na wafuasi wengi na kilichofanya vizuri katika uchaguzi wa serikali za mitaa ambapo NCCR walipata mitaa mitano huku CUF wakipata mitaa 36.

NEWS ROOM, ilimtafuta mwenyekiti wa NCCR mkoa wa Mtwara ambaye naye anagombea jimbo hilo, Hassan Uledi, ambaye alikanusha taarifa hizo na kusema kwamba katika kikao ambacho walikutana na Mbatia hakukuwa na maamuzi ya chama chochote kupewa jimbo hilo.

Alisema barua ambayo amepewa Maftaha na katibu mkuu wa CUF Maalim Seif Sharif Hamad ni barua ambayo kila mgombea anapaswa kupewa na katibu mkuu wa chama chake, hivyo hata yeye anayo aliyopewa na chama chake na kwamba Agosti 17 mwaka huu atakwenda kuchukuwa fomu ya kugombea jimbo hilo katika ofisi ya mkurugenzi wa manispaa ya Mtwara Mikindani.

Naye, katibu wa Chama cha Demokrasia na Maendeleo (CHADEMA) mkoa wa Mtwara, Willy Mkapa, alikana taarifa hizo na kusema kuwa bado wanasubiri waraka wa mgawanyo wa majimbo kutoka kwa viongozi wa UKAWA ambao ulitegemewa kutolewa kuanzia Agosti 15 mwaka huu.

Alisema wanaohusika katika vikao vya UKAWA sio wagombea bali ni wenye viti na makatibu wa vyama, jambo ambalo bado halijafanyika.

“Kwahiyo jimbo la Mtwara mjini bado halijatolewa kwa chama chochote..lakini pia naona ingekuwa ni vizuri tusingekuwa na haraka, tusubirie mwongozo ambao utatuelekeza vizuri ili kumaliza migogoro yote, maana leo hii (juzi) tumeletewa miongozo ya udiwani , kwahiyo tutaachiana kwa vigezo ambavyo vimeelekezwa na viongozi wetu wa ngazi za juu..” alisema Mkapa.