Ndanda, Mtibwa hakuna mbabe-Nangwanda.

Wachezaji wa Ndanda wakishangilia goli 

Wachezaji wa Ndanda na Mtibwa wakichuana katika mechi ya ligi kuu ya vodacom Tanzania Bara iliyochezwa jana Nangwanda Sijaona Mtwara-Timu hizo zilifungana goli 1-1

William Lucian wa Ndanda akimtoka mchezaji wa Mtibwa.

Wachezaji wa akiba wa Ndanda Fc wakishangilia goli baada ya timu hiyo kusawazisha katika dakika za majeruhi.

Jukwaa la mashabiki wa Ndanda lilivyokuwa baada ya timu yao kusawazisha goli

Na Juma Mohamed.

Timu ya soka ya Ndanda Fc jana ilijitupa uwanjani Nangwanda Sijaona Mtwara katika mfululizo wa michezo ya ligi kuu ya Vodacom Tanzania Bara walipochuana na Mtibwa Sugar ya Morogoro, mchezo ambao ulimalizika kwa sare ya kufungana goli 1-1.

Mtibwa ndio walioanza kupata bao katika dakika ya 30 likifungwa na Seleman Rajab baada ya makosa ya golikipa wa Ndanda Jeremia Kisubi aliyeutema mpira wa kona iliyochongwa na Issa Rashid,  ambapo mpaka kipindi cha kwanza kinamalizika Mtibwa walikuwa mbele kwa goli hilo moja.

Kipindi cha pili Ndanda walirejea kwa kasi na kujaribu kupanga mashambulizi ya mara kwa mara langoni mwa Mtibwa huku wakifanya mabadiliko ya kuwapumzisha baadhi ya wachezaji wake kama Omega Seme na nafasi yake kuchukuliwa na Said Mohamed na Omary Mponda aliyempisha Buruhan Rashidi huku Mtibwa wakiwapumzisha Mohamed Ibrahim ambaye aliumia nafasi yake ikachukuliwa na Ally Sharifu, Ibrahim Juma alimpisha Henry Joseph na Seleman Rajab aliyempisha Vicent Barnabas.

Atupele Green-akipongezwa na mashabiki wa Ndanda baada ya mchezo

Mabadiliko ya Ndanda yalionekana kuzaa matunda, ambapo katika dakika ya 84 mshambuliaji Atupele Green alitumia vyema makosa ya golikipa wa Mtibwa Sugar, Said Mohamed ambaye aliudaka mpira na kuwachia mbele ya mchezaji huyo kwa lengo la kutaka kuupiga mbele ndipo Atupele alipopata nafasi ya kuucheza na kumpasia Bryson Raphael aliyeukwamisha wavuni na kuisawazishia Ndanda goli.

Kabla ya kufungwa kwa goli hilo, mwamuzi Israel Mujuni Mkongo alimwonesha kadi ya njano mchezaji Said Mkopi wa Mtibwa baada ya kumchezea madhambi kiungo wa Ndanda, Kiggi Makasi.

Hata hivyo bao la Ndanda lilionekana kulalamikiwa zaidi na viongozi wa na wachezaji wa Mtibwa kwa madai kuwa wachezaji wa Ndanda walimpokonya mpira golikipa ambaye alikuwa tayari ameshaudaka.

Kocha wa Mtibwa Sugar Meck Mexime alionekana mwenye jazba baada ya kufungwa kwa goli hilo na kudai kuwa mwamuzi hakuwatendea haki huku akisema milele soka la Tanzania haliwezi kuendelea kutokana na aina ya maamuzi yanaamuliwa katika baadhi ya mechi.

Kocha wa Mtibwa Sugar, Meck Mexime, akiongea na waandishi baada ya mchezo.

Mfungaji wa bao hilo, Bryson Raphael, alisema ni bao halali ambapo lilitokana na makosa ya golikipa wa Mtibwa ambaye aliuwachia mpira kwa ajili ya kuanza na kwamba mpira ukishauwachia maana yake tayari umekwishauanzisha na ndio maana Atupele aliuwahi kabla ya kumpatia yeye na kuukwamisha wavuni.

Bryson Raphael akiongea na waandishi baada ya mchezo

Naye kocha msaidi wa Ndanda Mussa Mbaya aliyekaimu nafasi ya kocha mkuu anayesubiriwa kujiunga na timu hiyo kutokea JKU ya Zanzibar, Malale Hamsini, aliwasifu wachezaji wake kwa kupambana mpaka dakika za wisho huku akijinasibu kucheza soka safi katika kipindi cha pili na kupelekea kupata bao la kusawazisha.

Kocha msaidizi wa Ndanda, Mussa Mbaya, akiongea na waandishi baada ya mchezo

Ndanda sasa inafikisha alama 17 baada ya kushuka dimbani mara 18 ambapo imepanda kwa nafasi moja kutoka nafasi ya 11 mpaka nafasi ya 10 huku Mtibwa ikisalia katika nafasi yake ya Nne baada ya kucheza mara 18 na kujikusanyia alama 33.