NANAUKA: CCM walitoa vitisho dhidi yangu na familia yangu.

Mgombea Ubunge wa jimbo la Mtwara mjini kupitia Chama cha Demokrasia na Maendeleo (CHADEMA), Joel Nanauka, akiwa jukwaani kuwahutubia wanamtwara ambao kwa kiasi kikubwa wanaonesha kuwa na imani naye katika safari yake ya kuwania nafasi ya kuwawakilisha Bungeni.

Na Juma Mohamed, Mtwara.

MGOMBEA ubunge katika jimbo la Mtwara mjini kupitia Chama cha Demokrasia na Maendeleo (CHADEMA) Joel Nanauka, amezitaja sababu zilizomfanya kuhama Chama Cha Mapinduzi (CCM) ni pamoja na kuwa na misimamo tofauti wakati wa vurugu za gesi kiasi cha kutishiwa maisha pamoja na familia yake.

Akizungumza na Mtandao huu wiki iliyopita, alisema sababu nyingine ni kupingana na matakwa yao kuhusu mradi wa bomba la gesi ambapo katika ilani ya CCM katika Ibara ya 63 (k) na (h) ilisema kuwa mradi wa Mnazi Bay wa Megawati 300 ni tofauti na wa Kinyerezi wa Megawati 240, jambo ambalo alitaja kuwa lilikiuka mpango wa maendeleo wa miaka mitano uliopitishwa Bungeni.

Alisema mambo hayo yalipelekea viongozi wa CCM kuona kama anahujumu chama na kujaribu kukalishwa katika vikao vya nidhamu lakini bado aliendelea kubaki katika misimamo yake, ambapo baadae akaona bora aende katika chama ambacho kinaamini katika haki na uwazi.

“Nilipata ushauri wa watu wengi viongozi wa Chadema sio tu wa hapa Mtwara, wa maeneo mbalimbali wengine rafiki zangu ambao nilikuwa nao chuoni wabunge kama akina Silinde..nikasema ngoja nikapigane katika upande ule ambao wanaamini katika haki, uwazi na masuala ya kijamii..” alisema Nanauka ambaye tayari ameshachukua na kurudisha fomu.

Joel Nanauka, wapili kushoto, akiwa amepozi na wanachama wenzake wa Chama cha Demokrasia na Maendeleo (CHADEMA) mkoani Mtwara, katika moja ya mikutano ya hadhara.

Aliongeza kuwa, “niko hapa nataka wananchi wa Mtwara wanitume kama mwakilishi wao kwenda kusema katika Bunge la Jamuhuri ya Muungano wa Tanzania lakini kuleta mabadilikio ambayo tumekuwa tukiyasubiria kwa muda mrefu na kushindwa kuyapata.” Aliongeza.

Alisema swala la mwanasiasa kuhama kutoka chama kimoja kwenda kingine sio la ajabu kwani wapo viongozi wengi waliopo katika nafasi mbalimbali katika vyama vyao kwa sasa ambao walishafanya hivyo huku akitolea mfano kwa katibu mkuu wa Chama cha Wananchi (CUF) Maalim Seif Sharif Hamad, ambaye aliwahi kuwa mjumbe wa kamati kuu ya CCM toka mwaka 1977-1987, waziri kiongozi na mwenyekiti wa kamati ya uchumi na uwekezaji wa CCM lakini leo hayupo huko nab ado CUF wanazidi kumuamini.

Mgombea Ubunge wa Jimbo la Mtwara mjini kupitia Chama cha Demokrasia na Maendeleo (CHADEMA), Joel Nanauka, akiwa katika jukwaa akihutubia wananchi wa Mtwara.

Aidha, alisema hana hofu na ushindani utakaojitokeza kutoka kwa watia nia wengine iwe ndani ya Chadema au nje kwani ushindani wa kiuongozi ni ushindani wa hoja, uwezo, uzoefu na matakwa ya wananchi hivyo anamini kwakuwa chema cha jiuza na kibaya chajitembeza, na kwakuwa amejipima na anawafahamu wagombea wengine anaimani wakiwekwa kwenye mizani atashinda.

“Mimi nasema nimejipima, nimejiangalia, uwezo wangu naujua na nauamini na wapo wananchi wa Mtwara ambao wanafahamu msimamo wangu na shughuli za kimaendeleo ambazo nimezifanya..kwahiyo naamini tutakapokwenda kwenye mizani na hao wanaogombea wengi nawajua ambao wametajwa kwa majina yao na nilipojipima na wao ndipo nikapata nguvu kwasababu nawafahamu..” alisema.

Baadhi ya wanachama na wafuasi wa Chama cha Demokrasia na Maendeleo (CHADEMA) mkoani Mtwara, wakiwa katika moja ya harakati za kipenzi chao Joel Nanauka katika safari yake ya kuwania ubunge wa jimbo la Mtwara mjini.

 Nanauka ambaye amefanya kazi na kampuni mbalimbali za serikali na binafsi, kwa sasa ni muajiriwa wa shirika la Umoja wa Mataifa (UNESCO) linaloshughulika na maswala ya elimu, na yupo hapo kama msaidizi maalumu wa Mkurugenzi nchini Tanzania.

………………………………mwisho……………………………………………..