Wizara ya Mawasiliano yawanoa wadau wa vyombo vya usalama juu ya sheria ya makosa ya mitandaoni

Mwanasheria kutoka Wizara ya Mawasiliano Sayansi na Teknolojia, Anna Kalomo, akitoa somo kwa wadau wa vyombo vya usalama wa mikoa ya Lindi, Mtwara na Ruvuma, katika semina ya siku moja ya kuwajengea uwezo juu a sheria ya makosa ya mtandao (Cybercrimes) na Sheria ya miamala ya kielektroniki ya mwaka 2015, iliyofanyika katika ukumbi wa Naf Beach mkoani Mtwara jana.

 Na Juma Mohamed.

WAMILIKI wa mitandao ya mawasiliano nchini wametakiwa kutoa taarifa haraka juu ya makosa ya uharifu wa mitandaoni pindi yanapojitokeza, ili kuwarahisishia watu wa vyombo vya usalama kuweza kuchukua hatua za haraka kwa wahusika.

Wito huo ulitolewa jana mkoani hapa na mkuu wa upelelezi Polisi wilaya ya Masasi, SP Nathaniel Kyando, wakati wa Semina ya mahakimu, waendesha mashitaka na wapelelezi kuhusu elimu ya sheria ya makosa ya mtandao na sheria ya miamala ya kielektroniki ya mwaka 2015.

Alisema, sheria hiyo ambayo imeanza kufanya kazi Septemba 1 mwaka huu, ilitakiwa kutolewa mapema kwasababu yapo makosa mengine ambayo tayari yameshatendeka ambayo yalipaswa kudhitiwa kwa watendaji wake.

“Kumekuwa na tatizo kwa wamiliki wa vyombo vya mitandao kama watu wa simu, taarifa hua hawazitoi kwa muda muwafaka kiasi kwamba upatikanaji wa waalifu wa kimtandao mara nyingine unakuwa ni wa shida sana..lakini pamoja na uwepo wa sheria hii, ni muhimu sasa wamiliki wa vyombo vya mitandao wakaona umuhimu wa kutoa taarifa kwa wakati..” alisema.

Wadau wa vyombo vya usalama wa mikoa ya Lindi, Mtwara na Ruvuma wakiwa katika semina ya siku moja ya kujengewa uwezo juu ya makosa ya mtandao (CyberCrimes) na sheria ya miamala ya kielektroniki ya mwaka 2015, iliyofanyika jana katika ukumbi wa Naf Beach mkoani Mtwara. 

Kwa upande wake, mkuu wa kitengo cha sheria kutoka wizara ya Mawasiliano, Sayansi na Teknolojia, Veronica Sudayi, akizungumza kwa niaba ya katibu mkuu wa wizara hiyo, alisema jamii inatakiwa kufahamu kwamba sheria hiyo haina vitu vipya isipokuwa ni mabadiliko ya kimfumo ambayo umeyaingiza makosa hayo katika mfumo wa kielektroniki.

“Zamani kabla ya sheria hii ilikuwa unashindwa kumtia hatiani mtu aliyefanya uhalifu kwa kutumia mfumo kwasababu kile kitendo cha kushika anaweza asikifanye, lakini kwa sasa sheria hii itamtia hatiani kwasababu hata ukionekana ukioneka fedha kwa kuhamisha kutoka akaunti moja kwenda nyingine na ikathibitika basi utatiwa hatiani..” alisema.

Alisema, mwanzoni jamii ilikuwa na dhana potofu juu ya sheria hiyo kwa kudhani kwamba watu wengi watukuwa wanaingia jela lakini kwa kiasi fulani sasa wanaanza kuelewa na kutii yale maadili yanatopaswa kufuatwa kwa watumiaji wa mitanado.

Aidha, alisema lengo la semina hiyo ni kuwajengea uwezo wahusika ambao ni Mahakimu, wapelelezi na waendesha mashitaka wa mikoa ya Lindi, Mtwara na Ruvuma na majaji wote ili wanapotekeleza majukumu yao juu ya sheria hiyo haki itendeke.

Naye, mwanasheria kutoka wizara hiyo, Anna Kalamo, alisema miongoni mwa mada ambazo wanapatiwa wahusika ni pamoja na sheria mbili ambazo zimepitishwa na serikali za miamala kielektroniki na sheria ya makosa ya mitandao zote za mwaka 2015 ambazo zimetungwa kwa lengo la kuleta ulinzi na matumizi salama ya mitandao hapa nchini.

Anna Kalomo

Alisema kuna athari nyingi ambazo zinatokana na makosa ya mitandaoni ambayo miongoni mwake ni kuibiwa, watu kujiua kutokana na kudhalilishwa, kuvunjika kwa ndoa za watu pamoja na hasara mbalimbali katika taasisi za kifedha kama Benki Kuu ya Tanzania (BoT) ambayo ilitangaza hasara ya karibu bilioni 54.