Wazee mkoani Mtwara watoa ya moyoni juu ya wagombea.

Mwanachama wa Chama cha Wazee na Wastaafu Mkoa wa Mtwara (CHAWAMU), Mchina Nnamba, akizungumza jambo juu ya changamoto zinazowakabili wazee, katika kikao na waandishi wa habari jana.

Na Juma Mohamed.

CHAMA cha Wastaafu na Wazee Mkoa wa Mtwara (CHAWAMU) kimelalamikia kitendo cha wanasiasa wanaogombea nafasi mbalimbali za uongozi katika ngazi zote, kuwasahau wazee katika sera zao wanazozitoa wakati wa kuomba kura kipindi hiki cha kampeni za kuelekea uchaguzi mkuu.

Akizungumza juzi mkoani hapa, katibu wa chama hicho, Wilbard Nandonde, alisema chama kinashangazwa na baadhi ya wagombea wa nafasi za Uras, Ubunge na Udiwani kutoongelea juu ya mustakabali wa changamoto zinazowakabili wazee na baadala yake wanajikita kutoa ahadi katika nyanja nyingine.

Baadhi ya wanachama wa Chama cha Wastaafu na Wazee Mkoa wa Mtwara (CHAWAMU) wakiwa na baadhi ya waandishi wa habari wa mkoa wa Mtwara, katika kiako cha pamoja kujadili mambo mbalimbali yanayohusu changamoto wanazopata wazee.

Alisema, katika kuonyesha msisitizo juu ya changamoto lukuki walizonazo, waliamua kusambaza makaratasi katika vyama mbalimbali vya siasa na katika ofisi za serikali, ambazo zinaelezea changamoto hizo ambazo zimeshindwa kutatuliwa kwa kipindi kirefu.

“Tumegawa katika ofisi zote za vyama na baadhi ya wagombea tumewapatia..sasa hayo mambo yako mengi lakini sisi tunaomba tu kwamba wazee wasitusahau katika kunadi sera zao au katika ‘manifesto’ yao wawe wanatutaja sisi wazee watatufanyia nini..” alisema.

Alisema yapo mapendekezo mengi ya wazee ambayo serikali bado haijayafanyia kazi na kuonekana kukaa kimya, ikiwa ni pamoja na kutopitishwa kwa sera ya wazee ya mwaka 2003 kuwa sheria ambayo kwa kiasi kikubwa ingezeweza kuwalinda.

“Angalia toka 20013 mpaka leo ni karibu miaka 12 lakini hii sera bado haijatungiwa sheria..mambo mengine ya manyanyaso labda mtu anakutukana, kama ingekuwa sheria sisi wenyewe tungechukuwa hatua. Mtu anaekutukana unamkamata na kumfikisha kwenye vyombo vya sheria, lakini kwasababu ni sera inaonekana haina mguvu yoyote..” aliongeza.

Katibu wa Chama cha Wazee na Wastaafu Mkoa wa Mtwara (CHAWAMU), Wilbard Nandonde, akiongelea maswala mbalimbali yanayowahusu wazee na changamoto zao juu ya kutekelezewa mahitaji yao ya msingi, katika kikao kati yao na waandishi wa habari jana.

Alieleza mapendekezo mengine kuwa ni swala la kupata bure huduma za matibabu ambayo ilitangazwa serikali lakini utekelezaji wake haufanyiki, ambapo alizitaka halmashauri zote kuandaa vitambulisho vya wazee kwa ajili ya kutambulika na kupatiwa matibabu bila kulipia gharama yoyote.

Aidha, alitoa wito kwa serikali juu ya kukomesha vitendo vya mauwaji ya wazee ambavyo kwa kiasi kikubwa vimekuwa vikitokea katika mikoa ya kanda ya ziwa, ambapo vinatokana na baadhi ya watu kuwa na imani potofu za kishirikina kwa kuamini kwa kufanya hivyo watafanikiwa mahitaji yao.

Naye, mwanachama wa chama hicho, Erntrudis Mpokwa, aliitaka manispaa ya Mtwara Mikindani, kutoa msamaha wa kodi za majengo kwa wazee wastaafu wa manispaa hiyo ambao uwezo wao wa kipato ni mdogo na hata nguvu ya kutafuta kipato sio kubwa kiasi cha kumudu gharama ya kulipa sh. 20,000 inayotozwa kwa mwaka.

Mwanachama wa Chama cha Wastaafu na Wazee Mkoa wa Mtwara (CHAWAMU), Erntrudis Mpokwa, akieleza jambo juu ya changamoto zinazowakabili wazee mkoani Mtwara, katika kikao na waandishi wa habari jana.

“Vyanzo vya mapato kwa manispaa viko vingi, kwanini wazee ambao hatujiwezi tusisamehewe kulipa hiyo kodi ya majengo..20,000 kwa mzee ambayo amestaafu na amechoka kuvua, mzee ambaye alikua seremala na hawezi kuranda tena ni pesa nyingi..kwahiyo tunamuomba tu mkurugenzi wa manispaa akubali kuwaachia wazee ambao nyumba zao hazipangishwi na hazifanyiwi biashara wasitozwe kodi kama inavyofanywa sasaivi..” alisema.

Mwanachama mwingine, Mchina Nnamba, alisema kodi inayotozwa na manispaa hiyo sio ya nyumba isipokuwa ni ya mtaa kwasababu viwango vinatozwa kutokana na hadhi ya nyumba kutoka katika mitaa tofauti.

“Sasa matokeo yake hawatozi kodi ya thamani ya nyumba, ila watoza kodi ya mtaa ambayo haipo..mimi jana (juzi) nilipewa hiyo barua nikawaambia haya madai yenu ni ya mtaa na sio ya nyumba, nyumba yenye thamani hii mimi sina kwanza uiwahi kufika ukaiona hiyo nyumba?..hilo ni jambo ambalo wazee wamelalamika mara nyingi..” alisema.

Chama hicho kimejipanga kuadhimisha siku ya wazee duniani katika wilaya ya Nanyumbu mkoani hapa itakayofanyika Oktoba 1 mwaka huu, ambapo kitaifa itaadhimishwa mkoani Kigoma.