Wananchi wamlilia Mwatuka.

Baadhi ya watumishi wa Bunge la Jmhuri ya Muungano wa Tanzania wakinyanyua jeneza lenye mwili wa aliyekuwa mbunge wa viti maalum kupitia Chama cha Wananchi (CUF), Clara Mwatuka, tayari kwa kwenda kuzika.

 

Mwili wa marehemu Clara Mwatuka ukiwa katika jeneza ukipelekwa kaburini kwa ajili ya kuzikwa, kijijini kwao Nanganga, Masasi, mkoani Mtwara.

Mwili wa marehemu Clara Mwatuka, ukiwa ndani ya jeneza kwa ajili ya kuagwa kabla ya kwenda kuzikwa.

Jeneza lililo na mwili wa marehemu Clara Mwatuka, likielekea kuingizwa kaburini.

Wananchi na baadhi ya viongozi wa serikali wakiuzika mwili wa Clara Mwatuka.

Aliyekuwa mbunge wa Nanyumbu Dastan Mkapa, akiweka shada juu ya kaburi la Clara Mwatuka. kwa mbali ni mbunge wa Mtwara mjini anayemaliza muda wake Hasnain Murji, naye akielekea kuweka shada.

Na Juma Mohamed, Masasi

HATIMAYE mwili wa aliyekuwa mbunge wa viti maalumu kupitia Chama cha Wananchi (CUF), Clara Mwatuka, umezikwa kijijini kwao Nanganga , wilayani Masasi, mokani Mtwara jana huku mamia ya wakaazi wa kijijini hapo wakiangua vilio kwa kuondokewa na mpendwa wao.

Naibu Spika wa Bunge la Jamhuri ya Muungano wa Tanzania, Mhe. Job Ndugai, alisema kifo cha mbunge huyo sio tu pigo kwa bunge bali ni pigo pia kwa wananchi wa mikoa ya Lindi na Mtwara kutokana na namna ambavyo alikuwa akitetea masilahi ya wananchi hao katika vikao vya bunge.

“Hakuwasahau ndugu zangu, aliwasemea sana bungeni..naamini kabisa ameacha mfano bora na alituelimisha kwa mambo mengi mengi ya kuwatetea..kwahiyo niahidi hapa kwamba baadhi ya haki zake tutazifuatilia na kuzishughulikia zile ambazo zimebakia kule..” alisema Ndugai.

Aidha, aliongeza kuwa ofisi ya bunge itatoa fedha sh. Milioni tano huku shirika la bima la Jubilee Insurance ambalo linashughulikia maswala ya Bima kwa wabunge ikiwa ni pamoja na Bima za ajali, litatoa kiasi kama hicho cha fedha kwa familia ya marehemu, ikiwa ni pamoja na kumuuguza mume wa marehemu ambaye bado yuko hospitalini.

Makamu mwenyekiti wa Chama cha Wabunge Wanawake, Mhe. Suzan Lyimo, akizungumza kwa niaba ya mwenyekiti wa chama hicho, Anna Abdallah, alisema wao kama chama wamechangia kiasi cha sh. Milioni 1 huku katibu wake bado akiendelea kuchangisha na kiasi kitakachopatikana kitatolewa kwa familia hiyo.