Mabingwa wa upasuaji kutoka Muhimbili wapiga kambi Mtwara kutoa huduma kwa wenye Mabusha na Matende..

Mkurugenzi wa Taasisi ya Uchunguzi wa Magonjwa ya Binadamu (NIMR), Dkt. Mwele Malecela, akizungumza katika uzinduzi wa kambi ya kufanya upasuaji kwa wagonjwa wa Mabusha na Matende, manispaa ya Mtwara Mikindani, uliofanyika katika hospitali ya rufaa ya Ligula leo.

Baadhi ya wagonjwa wanaosumbiliwa na matatizo ya mabusha na matende wa manispaa ya Mtwara Mikindani wanaotarajiwa kupata huduma za upasuaji katika hospitali ya rufaa ya Ligula, mkoani Mtwara, baada ya uzinduzi wa kambi ya upasuaji wa magonjwa hayo uliofanywa na wizara ya afya na ustawi wa jamii

Mkurugenzi wa kinga wa Mpango wa Magonjwa Yasiyopewa Kipaumbele (NTDs), Neema Rusibamayila, akipokea mfano wa Hundi yenye thamani ya dola za kimarekani 25, 000, 88 kutoka kwa mwakilishi wa Kampuni ya utafiti na uchimbaji wa rasilimali za mafuta na gesi (STATOIL), katika uzinduzi wa kambi ya upasuaji wa magonjwa ya Mabusha na Matende uliofanywa na wizara ya afya na ustawi wa jamii, katika hospitali ya rufaa ya Ligula, Mtwara

Kaimu katibu tawala wa mkoa wa Mtwara, Johansen Bukwali, akihubia katika uzinduzi wa kambi ya upasuaji wa magonjwa ya Mabusha na Matende uliofanywa na wizara ya afya na ustawi wa jamii kwa ufadhili wa Kampuni ya utafiti na uchimbaji wa rasilimali za mafuta na gesi (STATOIL), katika hospitali ya rufaa ya Ligula mkoani hapa

Kaimu katibu tawala wa mkoa wa Mtwara, Johansen Bukwali, akikata utepe katika mlango wa kuingilia wodi ya upasuaji kwa wagonjwa wa Mabusha na Matende, katika Hospitali ya rufaa ya Ligula mkoani hapa, kuashiria uzinduzi wa kambi ya upasuaji wa magonjwa hayo uliofanywa na wizara ya afya na ustawi wa jamii kwa ufadhili wa Kampuni ya utafiti na uchimbaji wa rasilimali za mafuta na gesi (STATOIL)

Na Juma Mohamed, Mtwara.

WIZARA ya afya na ustawi wa jamii imezindua kambi ya kufanyia upasuaji kwa watu wenye matatizo ya Mabusha na Matende, katika hospitali ya rufaa ya Ligula, manispaa ya Mtwara Mikindani.

Uzinduzi huo umefanyika leo ambapo wagonjwa wasiopungua 100 wanatarajiwa kufanyiwa upasuaji kupitia huduma zitakazotolewa na madaktari bingwa wa upasuaji kutoka hospitali ya taifa ya Muhimbili.

Abdallaha Namanga, mkazi wa Mbaye Mashariki, alisema fursa hiyo ni adimu ambayo inapatikana mara moja kwa mwaka, na kwamba ilipojitokeza wamelazimika kuichangamkia kwasababu ikipita gharama zinakuwa kubwa za kupata matibabu tofauti na uwezo wao.

Alisema, kutokana na kusumbuliwa na tatizo la busha, alikuwa anahisi kunyanyasika na kukosa raha anapokuwa katika shughuli zake za kila siku huku baadhi wa watu wakimtania jambo ambalo lilimlazimu avae nguo kubwa kwa ajili ya kuzuia watu wasitambue kwa urahisi matatizo yake.

“Niliona kama nanyanyasika kijinsia yani mtu anakutania kwamba una mpira..sasa inabidi upate shati ‘over size’ ili kuzuia, sasa kwakweli kitu kama kile nilikua naumia moyo sana..sasa jana nimekaa nyumbani majira ya saa mbili nikasikia gari la matangazo, nikasema hapana nikamuaga mke wangu lakini sikumwambia naenda wapi..” alisema.

Omari Makongoro, mkazi wa kata ya Likombe, ambaye anasumbuliwa na busha na mlemavu wa mguu, alienda mbali zaidi na kuwataka wasamalia wema kumsaidia kwa namna yoyote ili aweze kuendesha maisha yake kutokana na kukosa ndugu wa kuweza kumsaidia.

Alisema tatizo la busha limekuwa likimsumbua kwa kipindi kirefu na kwamba awali aliwahi kufanyiwa upasuaji lakini limemrudia tena kwa mara ya pili kiasi cha kumzidishia matatizo ukilinganisha na hali yake ya ulemavu na ukosefu wa kipato alionao kwa sasa.

“Naomba msaada kwa redio zote za mjini hapa na wasamalia wema, ninavyoishi nyumbani huko hali ni mbaya sana..bora mwanzo nilikuwa na Baiskeli ambayo ilikuwa ikinisaidia kuzunguka mitaani na kupata chochote lakini sasaivi Baiskeli imekufa kwahiyo siwezi kutembea tena, sasa nafikiria nitaishi vipi..ndio naomba waisilamu wenzangu na wakristo, maana mungu ni mmoja ..” alieleza.

Naye, Mkurugenzi wa Taasisi ya Uchunguzi wa Magonjwa ya Binadamu (NIMR), Dkt. Mwele Malecela, alisema wizara ya afya imeweka mkazo katika mkoa wa Mtwara kwasababu umekuwa ni mkoa mmojawapo kati ya mine ya Tanzania ambayo inaongoza kwa kuwa na wagonjwa wengi wa matatizo ya mabusha.

Alisema kumekuwa na idadi kubwa ya wagonjwa wenye matatizo hayo hapa nchini na kwamba ili kufikia malengo ya 2020, ni lazima zifanyike jitihada kubwa zaidi kuwafikia wagonjwa wote wanaohitaji upasuaji kabla ya mwaka huo.

“Mkakati wa kutokomeza matende una sura mbili kuu, ya kwanza ni kumaliza kabisa maambukizi kati ya Mbu na Binadamu na pili ni kutoa huduma kwa ambao tayari wameathirika kwa ugonjwa huu..na hii sababu ya pili ndio imetuleta hapa leo..” alisema.

Kwa upande wake, Kaimu katibu tawala wa mkoa wa Mtwara, Johansen Bukwali, akizungumza kwa niaba ya mkuu wa mkoa Halima Dendego, aliwataka viongozi wa halmashauri kuhakikisha kwamba halmashauri zao zinatenga fedha kila mwaka kwa ajili ya kufanya huduma za upasuaji wa Ngirimaji, na sio kuwategemea wafadhili pekeao.

“Tukumbuke kwamba, wafadhili wanatusaidia, lakini wenye dhamana ya afya kwa wananchi wetu ni sisi wenyewe viongozi wa mkoa na wilaya, na pia tuhakikishe tunajenga mazingira mazuri ya kazi hii ili iwe endelevu.” Alisema.

Mwakilishi wa kampuni ya Statoil inayoshughulika na utafiti na uchimbaji wa rasilimali za mafuta na gesi mkoani hapa, ambao ndio wafadhili wa shughuli hiyo, Naomi Makota, alisema kupitia mpango wao wa Maisha ni Ushirikiano, waliweza kuanza kuungana na watu wa Mpango wa Magonjwa Yasiyopewa Kipaumbele (NTDs) ambao waliwaomba wachangie katika kudhibiti magonjwa ya Ngirimaji.

Alisema, ufadhili wao katika shughuli hiyo umegharimu kiasi cha dola za kimarekani 250, 88 ambapo walikabidhi mfano wa hundi yenye thamani hiyo kwa mkurugenzi wa kinga wa NTDs, Dkt. Neema Rusibamayila.