Kura za maoni CCM.. Juma Njwayo apinga matokeo baada ya kupigwa chini

Mbunge wa Tandahimba anayemaliza muda wake, Juma Njwayo.

 Na Juma Mohamed, Mtwara.

MBUNGE wa Tandahimba anayemaliza muda wake Mhe. Juma Njwayo, amesema hajaridhishwa na matokeo ya kura za maoni katika uchaguzi wa kuwapata wagombea ubunge kupitia Chama Cha Mapinduzi (CCM) uliofanyika hivi karibuni ambapo ameshindwa kutetea nafasi yake ya kuwa mgombea katika jimbo hilo.

Akizungumza na NEWS ROOM kwa njia ya simu muda mfupi baada ya kutangazwa kwa matokeo hayo, Njwayo aliyeshika nafasi ya tatu kwa kupata kura 4,304, alisema awali alizunguka katika matawi mbalimbali na kujiridhisha kuwa aliongoza lakini katika majumuisho akajikuta ameshindwa na kuwa katika nafasi ya tatu.

Alisema viongozi wa CCM wilaya walipofanya majumuisho hawakuwashirikisha wagombea na kwamba tatizo likaanzia hapo kwasababu kuna kata ambazo anaamini kura ziliongezwa huku akiitaja kata ya Mihuta ambayo ilikuwa na kura 522 lakini baadaye ilionekana kuwa na kura zaidi ya 1,000.

“Mtu mmoja alipewa kura 994 ambaye alipata kura 30, kwanini hiyo..sasa baada ya hayo yote kwasababu inaonekana kulikuwa na uchakachuaji, bado tukaenda ku ‘count’ (Kuhesabu) kura zile zile zilizochakachuliwa..kwahiyo ndio maana nasema sijaridhika sana na mimi napinga zoezi hilo.” Alisema Njwayo.

Alisema kwa namna zoezi hilo lilivyoendeshwa, amekosa imani na viongozi wa CCM wilayani humo na kwamba atafuata taratibu zote za chama katika kuhakikisha anapata haki yake ya msingi.

Awali katibu wa CCM wilaya ya Tandahimba, Mohamed Manyamba, alisema mshindi katika jimbo hilo ni Shaibu Salim Likumbo aliyepata kura 4,719 akifuatiwa na Abdullah Suleiman Lutavi ambaye alipata kura 4,521 huku Juma Njwayo akiambulia nafasi ya tatu kwa kupata kura 4,304.

Alisema, hata hivyo Njwayo aliktaa kusaini karatasi ya matokeo hayo kutokana na msimamo wake wa kutokubaliana nayo jambo halitoweza kubadilisha matokeo.