Mwenyekiti NCCR Mtwara apotosha wananchi

Na Mwaandishi wetu

MWENYEKITI wa NCCR-Mageuzi mkoani hapa Hassan Uledi, amejikuta katika wakati mgumu baada ya kutoa taarifa zisizo sahihi zilizodai kuwa vyama vinavyounda Umoja wa Katiba ya Wananchi (UKAWA) vimempitisha kuwa mgombea wa ubunge katika jimbo la Mtwara mjini.

Julai 23 mwaka huu Uledi aliita vyombo vya habari na kutoa taarifa juu ya kuhalalishwa na UKAWA kuwa ndio mgombea ubunge wa jimbo hilo akidai kuwa amepata taarifa kutoka makao makuu ya chama hicho jijini Dar es Salaam kupitia kwa katibu mkuu, Mosena Nyambabe.

“Amesema jimbo la Mtwara mjini kupitia UKAWA ni jimbo ambalo wameachiwa NCCR-Mageuzi..na jimbo jingine ni jimbo jipya la Nanyamba. Hii ni taarifa rasmi kabisa kwahiyo wananchi wafahamu kwamba katika majimbo ya mkoa wote wa Mtwara ambao kwa sasa tuna majimbo nane, NCCR-Mageuzi imepata majimbo mawili chini ya UKAWA.” alisema Uledi.

Hata hivyo, taarifa hizo zilikanushwa na katibu mkuu wa NCCR-Mageuzi, Mosena Nyambabe, ambaye alisema bado wapo katika mjadala juu ya maswala hayo ya kugawa majimbo na taarifa rasmi zitatangazwa baada ya kukamilika kwa mchakato.

Alisema taarifa zilizozungumzwa na mwenyekiti huyo ni za mwanzo ambapo anaweza kupewa jimbo kwa wakati huu alafu baadae likabadilishwa, kwahiyo ni vigumu kutamka kwamba ni jimbo la NCCR kwa wakati huu.

“Kama tukikubaliana UKAWA baada ya kukamilisha tutangaza ‘officially’ (rasmi), hayo ambayo yanazungumzwa ni ya mwanzo..unajua kuna matokeo ya awali na yale ambayo ni rasmi, kwahiyo anaweza akawa sasaivi amepewa jimbo lakini baadae likabadilishwa.” Alisema Nyambabe.

Kwa upande wake, katibu wa Chama cha Demokrasia na Maendeleo (CHADEMA) mkoa wa Mtwara, Willy Mkapa, alisema jambo hilo limeongelewa kwa utashi tu wa NCCR lakini wao bado hawajapatiwa waraka wowote wa kuthibitisha uhalali wa kuachiwa NCCR jimbo hilo.

Alisema inawezekana mwenyekiti huyo aliongea hayo kwa kuwafurahisha wanachama wake au wagombea wake, na kwamba bado viongozi wa UKAWA hawajakaa na kutoa mrejesho juu ya ugawaji wa majimbo kwa wagombea wa vyama hivyo.

Naye, mkurugenzi wa mipango na uchaguzi wa Chama cha Wananchi (CUF) Suleiman Lukunga, alisema wao hawazitambui taarifa hizo na hawezi kuzikanusha kwasababu zimetolewa na chama kingine ambacho ni taasisi na kwamba kila chama kinaendeshwa kulingana na misingi yake.

“Kama wao wamepata hiyo taarifa basi itakuwa wamepata wao, lakini sisi kama chama ambacho ni miongoni mwa vyama hivyo vinavyounda UKAWA hatujapata taarifa rasmi za kuonyesha jimbo hili amepewa NCCR, CHADEMA, NLD au tumepewa sisi CUF.” Alisema.