Mgombea ubunge jimbo jipya Mtwara kumaliza kero za maji kwa wananchi

 

Mgombea ubunge katika jimbo la Nanyamba mkoani Mtwara, Abdallah Chikota akiwa ameshakabidhi fomu ya kugombea nafasi hiyo katika ofisi za Chama Cha Mapinduzi (CCM) wilaya ya Mtwara vijijini jana (PICHA NA MPIGA PICHA WETU)

Abdallah Chikota akiwa amekabidhi fomu kwa katibu wa CCM wilaya ya Mtwara vijijini jana Amina Imbo

Na Mwandishi wetu, Mtwara.

WANANCHI wa jimbo la Nanyamba, mkoani hapa wameahidiwa neema za kutatuliwa changamoto kubwa za ukosefu wa maji na mgombea ubunge wa jimbo hilo kupitia Chama Cha Mapinduzi (CCM), Abdallah Dadi Chikota iwapo atafanikiwa kuwa mwakilishi wao katika bunge la Jamhuri ya Muungano wa Tanzania.

Akizungumza na NEWS ROOM muda mfupi baada ya kurudisha fomu katika ofisi za CCM wilaya ya Mtwara vijijini, Chikota alisema Hawa Ghasia amejitahidi kutatua baadhi ya changamoto zilizopo jimboni humo lakini zipo ambazo bado zinahitaji kufanyiwa kazi ikiwa ni pamoja na kero ya maji ambayo imekuwa ni ya muda mrefu.

Wanachama wa CCM waliojitokeza kumsindikiza Abdallah Chikota wakati anarudisha fomu ya kugombea ubunge wa jimbo la Nanyamba jana

 “Changamoto ya kwanza ambayo ipo katika maeneo yetu ni swala la maji..tuna miradi mikubwa sana ya vijiji kumi ambayo imeandikwa katika kila halmashauri, lakini miradi hii bado haijaweza kutatua changamoto hii na kama tunavyofahamu kuwa eneo letu lipo chini ya mradi mkubwa ule wa makonde lakini bado tuna shida kubwa sana ya maji..kwahiyo kipaumbele changu cha kwanza ni kuhakikisha tunashirikiana na wananchi na serikali katika kipindi hiki cha miaka mitano tunalipunguza na kama sio kulimaliza kabisa..” alisema.

Naye katibu wa CCM wilaya ya Mtwara vijijini, Amina Imbo, aliwataka wanachama wa chama hicho kuwa na umoja na wale watakao kosa nafasi ya kupitishwa katika mchujo kuwa wagombea, kutokuwa na tabia ya kuwaunga mkono wapinzani au kuwavunja moyo wale waliopitishwa.

Abdallah Chikota akikabidhi fomu ya kugombea ubunge wa jimbo la Nanyamba kwa katibu wa CCM wilaya ya Mtwara vijijini, Amina Imbo

Aidha, aliwataja waliochukuwa fomu za ubunge mpka juzi saa 8 mchana kwa jimbo la Mtwara vijijini kuwa ni mbunge aliemaliza muda wake na waziri wa Tamisemi, Mhe. Hawa Ghasia na Selemani Libubulu huku jimbo jipya la Nanyamba ni Abdallah Chikota na Selemani Livanga.

…………………………………….MWISHO……………………………………………..