Makada 45 kuwania ubunge CCM Mtwara, Ghasia kupita bila kupingwa.

Katibu wa Chama Cha Mapinduzi mkoa wa Mtwara, Shaibu Akwilombe, akizungumza na NEWS ROOM leo ofisini kwake, juu ya mchakato wa wagombea Ubunge katika Mkoa wa Mtwara.

 Na Mwaandishi wetu.

Jumla ya makada 45 wamechukuwa na kurejesha fomu za kugombea ubunge katika majimbo yote 10 mkoani Mtwara, huku waziri wa Tawala za Mikoa na Serikali za Mitaa (TAMISEMI) Hawa Ghasia, akiwa na nafasi kubwa ya kupita bila kupingwa katika jimbo lake kutokana na kukosa mpinzani.

Akizungumza na NEWS ROOM jana, katibu wa Chama Cha Mapinduzi (CCM) mkoa wa Mtwara, Shaibu Akwilombe, alisema katika wagombea wote waliojitokeza ni Ghasia pekee ambaye amekosa mpinzani na hivyo anasubiri vikao vya chama kuweza kumpitisha.

Aidha, waziri wa Nchi Ofisi ya Rais Utawala Bora, George Mkuchika ambaye ni mbunge aliyemaliza muda wake katika jimbo la Newala mijini, amejikuta akipata upinzani wa wagombea wawili ambao wamejitokeza katika jimbo hilo ambao ni Kwame Andrew Daffari na Rajab Hamis Kazibure na kufanya idadi ya wagombea watatu.

Jimbo la Mtwara mjini ambalo lilikuwa chini ya Asnein Murji ambaye anawania tena, limepata wagombea wengine wanne ambao ni Hussein Kasugulu, Saidi Swala, Mussa Chimae na Salum Nahodha.

Akwilombe aliwasihi wagombea wote wanaowania nafasi ya ubunge kuwa na lugha nzuri katika majukwaa mbalimbali wanayopita katika kipindi hiki cha kampeni za ndani, ili kuhepusha mpasuko wa wenyewe kwa wenyewe ndani ya chama.

“Natoa wito kwa hawa makada wetu ambao ndio wagombea wenyewe, wanakwenda kwenye kampeni, hizi ni kampeni za ndani ya chama..ni kampeni za ndani ya familia moja kwahiyo naamini kwa upeo wao na uwelewa wao watatumia lugha za staha, lugha ambazo hazita chukiza watu wengine na watatumia lugha ambazo zitatufanya tukishamaliza mchakato huu chama kibakie kuwa kimoja, chenye mshikamano, kupendana na chenye ushirikiano..”alionya.

Alisema mpaka mtu anafanya uamuzi wa kuingia katika mchakato wa kugombea ni wazi kwamba anajua kanuni na taratibu zote zinazopaswa kufuatwa, hivyo hatarajii kuona kunatokea mkanganyiko baina ya wanachama wenyewe kwa wenye au wagombea na kwamba mchakato huo utaisha kwa amani.

“Kama mtu unajua kanuni na taratibu, basi pale ambapo hujaridhika utajua utaratibu wa kuufuata ili kuweza kuonesha hali yako ya kutoridhishwa..na tukienda na utaratibu huo siamini kama itafikia wakati mtu atafikiria kwenda mahala pengine kwa ajili ya kutafuta ridhaa hiyo, tutafanya uchaguzi wa wazi kabisa na haki ili kila mwanachama aridhike..” aliongeza.

…………………………………………………mwisho…………………………………………………..