Mabomu yarindima Mtwara mechi ya Ndanda na Majimaji.

Askari polisi wakiwa katika harakati za kuwatawanya watu katika eneo la nje ya uwanja wa Nangwanda Sijaona juzi baada ya kuibuka vurugu kati ya mashabiki wa Ndanda Fc na polisi, zilizotokea baada ya kumalizika mchezo wa ligi kuu ya Vodacom Tanzania Bara kati ya Ndanda na Majimaji. Ndanda walishinda goli 1-0

Shabiki wa Ndanda Fc akitibiwa na madaktari wa timu hiyo juzi baada ya kujeruhiwa na jiwe lililorushwa na mtu ambaye hakufahamika katika vurugu zilizotokea uwanjani hapo baada ya mchezo wa Ndanda na Majimaji kumalizika, kati ya mashabiki na askali polisi

Mashabiki wa Ndanda Fc wakifunga milango ya geti kuu la kuingia na kutokea uwanja wa Nangwanda Sijaona, kuzuia magari ya polisi yasitoke kupinga mwenzao kuchukuliwa na kupelekwa kituoni

Na Juma Mohamed, Mtwara.

JESHI la polisi mkoani hapa limelazimika kutumia nguvu kiasi cha kufyatua mabomu ya machozi na risasi za moto kuwatawanya mashabiki wanaodaiwa kuwa ni wa timu ya Ndanda waliokuwa wanapinga mwenzao kuchuliwa na askari kupelekwa kituoni kutokana na kudaiwa kufanya vurugu.

Shabiki huyo aliyefahamka kwa majina ya Ally Likundasi, alionekana kuzimia baada ya Ndanda kupata goli dakika ya 75 kupitia kwa Kigi Makasy katika mechi ya ligi kuu ya Vodacom Tanzania Bara dhidi ya Majimaji ya Songea, lakini baada ya muda mfupi alizinduka na kuanza kupunga mikono kwa askari.

Mfungaji wa goli la Ndanda Kigi Makasy (Kushoto) akishangilia goli hilo ambalo alifunga juzi katika uwanja wa Nangwanda Sijaona Mtwara walipowakaribisha Majimaji ya Songea, Ruvuma katika mchezo wa ligi kuu ya Vodacom Tanzania Bara. Ndanda waliibuka na ushindi wa goli 1-0. 

Wachezaji wa Ndanda Fc wakishangilia goli lililofungwa na Kigi Makasy juzi katika uwanja wa Nangwanda Sijaona Mtwara walipowakaribisha Majimaji ya Songea, Ruvuma katika mchezo wa ligi kuu ya Vodacom Tanzania Bara. Ndanda waliibuka na ushindi wa goli 1-0.

Baada ya mchezo Likundasi alitaka kwenda kuwapa mikono wachezaji jambo ambalo polisi walilipinga kwa kwasababu ya kulinda usalama wa wachezaji ambapo wanahakikisha wachezaji wote wameingia ndani ya mabasi yao na kuondoka uwanjani ndipo mashabiki wanaweza kuingia uwanjani.

Kitendo cha polisi kumfunga pingu shabiki huyo na kumpandisha ndani ya gari lao kwa ajili ya kumfikisha kituoni kilionekana kupingwa vikali na mashabiki wenzake ambao baada ya kutoka mabasi ya wachezaji wa timu zote mbili waliamua kufunga milango ya uwanja huo wa Nangwanda Sijaona ili magari ya polisi yasitoke.

Mashabiki hao walijigawa wengine wakiwa ndani ya uwanja na wengine nje na kuanza kurusha mawe huku shabiki mmoja ambaye jina lake halikuweza kufahamika haraka akijeruhiwa kichwani baada ya kupigwa na jiwe.

Baada ya kuona hali inazidi kuwa mbaya huku magari yao yakiwa yamefungiwa ndani ya uwanja, polisi walianza kufyatua risasi hewani namabomu ya machozi kwa ajili ya kuwatawanya mashabiki hao, ambapo walifanikiwa na kuweza kuondoka na shabiki huyo.

Baada ya muda magari ya polisi yalirudi tena uwanjani kwa ajili ya kuwafuata wenzao ambao walibaki ambapo katika awamu hiyo dhahama iliwakumba waandishi wa habari ambao walikuwa wakitekeleza majukumu yao.

Waandishi waliokumbwa na kashkash hiyo ni Gregory Milanzi wa Mtukwao Community Radio na Adam Malima wa Chanel Ten ambaye alikamatwa na kupelekwa kituoni kwa madai alikuwa anapiga picha.

Milanzi ambaye alikuwa na Kamera kwa ajili ya kuchukua habari, alijikuta akipata kipigo kutoka kwa mmoja wa askari polisi aliyekuwa akimlazimisha kufuta picha na kumtaka aondoke katika eneo la tukio, ambapo alivunjiwa miwani yake ya macho.

Hata hivyo viongozi na wanachama wa Chama cha Waandishi wa Habari Mkoa wa Mtwara (MTPC) wakiongozwa na mwenyekiti Hassan Simba, makamu mwenyekiti Jimmy Mahundi na katibu Bryson Mshana, walifika kituoni hapo na kufanikisha kumtoa mwandishi huyo wa Chanel Ten aliyechukuliwa saa 1 usiku na kuachiwa saa 3 usiku.

Katibu wa Chama hicho, Bryson Mshana, alisema polisi hawakupaswa kuchukuwa jukumu la kumkamata mwandishi huyo na baadala yake walipaswa kujiridhisha kwanza juu ya taaluma yake ya uandishi kwasababu eneo la tukio hilo ndipo zilipo ofisi za Chama cha wanahabari na ofisi hizo zilikuwa wazi.

“Sisi kama Chama cha Waandishi wa Habari Mkoa wa Mtwara kwanza tunasikitishwa na kitendo hicho cha mwandishi kubugudhiwa akiwa kazini na kufuatwa mpaka katika ofisi za Press kwasababu ofisi zipo eneo lango kuu la kuingilia uwanjani kwa pembeni na mwenye alijitambulisha kuwa ni mwandishi wa habari..” alisema.

Aidha alisema, kwa mujibu wa maelezo ya mwandishi ni kwamba askari walihitaji Kamera lakini kutokana na hali ilivyokuwa ya vurugu pengine ndio sababu wakaamua kuondoka naye mpaka kituoni.

Kwa upande wake, mwenyekiti wa Chama cha Mpira wa Miguu Mkoa wa Mtwara (MTWAREFA) Athuman Kambi, alilitaka jeshi la polisi kuangalia namna bora katika kudhibiti vurugu kama hizo zinapotokea na kuhepuka kutumia nguvu ambazo zinaweza kuleta madhara zaidi.

“Wito wangu kwa mashabiki ni kutii sheria wanapokuwa uwnjani, lakini na wenzetu wa jeshi la Polisi waangalie namna bora ya kutuliza vurugu za aina ile zinapotokea..” alisema.

Jitihada za kumpata kamanda wa polisi wa mkoa wa Mtwara, Henry Mwaibambe, hazikuweza kufanikiwa mpaka habari hii inaingia mitamboni.

Katika mchezo huo wa ligi kuu ya Vodacom Tanzania Bara, Ndanda Fc waliweza kuchomoza na ushindi wa goli 1-0 dhidi ya Majimaji, na kufanikiwa kufikisha alama 20.