Mkomaindo yapiga hatua kupunguza vifo vya akina mama.

Waziri wa afya, maendeleo ya jamii, jinsia, wazee na watoto, Mhe. Ummy Mwalimu, akimsikiliza kaimu mganga mkuu wa halmashauri ya mji Masasi, dkt. Mussa Rashid, alipotembelea katika hospitali ya wilaya ya Masasi, Mkomaindo.

Waziri wa afya, maendeleo ya jamii, jinsia, wazee na watoto, Mhe. Ummy Mwalimu akiwa katika ziara katika hospitali ya wilaya ya Masasi, Mkomaindo. Kushoto ni mkuu wa wilaya hiyo Benard Nduta na dkt. Mussa Rashid.

Na Juma Mohamed, Masasi.

HOPITALI ya wilaya ya Masasi, Mkomaindo imefanikiwa kwa kiasi kikubwa kupunguza vifo vinavyotokana na uzazi kwa akina mama kutoka vifo 22 kwa mwaka 2014 mpaka kufikia vifo 12 ambapo ni sawa na asilimia 45.

Akizungumza wakati wa ziara ya waziri wa afya, maendeleo ya jamii, jinsia, wazee na watoto, Mhe. Ummy Mwalimu, kaimu mganga mkuu wa halmashauri ya mji Masasi, dkt. Mussa Rashid, alisema mafanikio hayo yanatokana na umoja uliopo kwa madaktari na wauguzi wa hospitali hiyo.

Alisema, sababu nyingine ni jitihada za kuielimisha jamii juu ya umuhimu wa kujifungulia katika vituo vya afya na hospitali ikiwa ni pamoja na kuwaeleza athari ambazo wanaweza kuzipata iwapo watajifungulia majumbani mwao.

“Tumekuwa tukiwaelemisha watu kwamba uzaliaji wa nyumbani tatizo kubwa na ni hatari, kwahiyo sasa hivi kumekuwa na mwamko mkubwa sana wa jamii kuzalia katika hospitali..kitendo hiki cha kuzalia hospitali na kwa akina mama pamoja na kupewa huduma bure zinazotolewa na serikali kumewezesha sisi kuweza kuwapa huduma zilizo salama kwao..” alisema.

Dkt. Mussa Rashid

Aidha, halmashauri hiyo imeweza kufanikiwa katika utoaji chanjo kwa kiwango kikubwa kiasi cha kuvuka lengo la Kitaifa la asilimia 95, kwa kuweza kufikia asilimia 96 mwaka jana kutoka asilimia 80 ya mwaka 2014.

“Hiki ni kiwango kikubwa sana ambacho pia kimevuka lengo la Taifa, lakini kwanini tumeweza kufanikiwa namna hii, tumeweza kufanikiwa kwasababu tunatumia WAJA hawa ni Watoa Huduma wa Chanjo wa Jamii katika halmashauri yetu, kwahiyo wanatembea na kwenda kuwachanja watoto..” alisema.

Mhe. Ummy Mwalimu, akiongea na wagonjwa katika hospitali ya wilaya ya Masasi, Mkomaindo.

Kwa upande wake, waziri Mhe. Ummy Mwalimu, alisema serikali ya awamu ya Tano itawapima waganga wakuu wa mikoa, wilaya pamoja na wale wa vituo vya afya kutokana na uwezo wao wa kuweza kupunguza vifo vya akina mama wajawazito.

“Ni jambo ambalo mimi mwenyewe nimejiwekea kipimo Mhe. Rais anipime kwahiyo na hili ndilo tutawapima waganga wakuu wa mikoa, waganga wakuu wa wilaya na waganga wafawidhi katika vituo vya afya..” alisema.