Halmashauri zatakiwa kutekeleza nia ya JPM ya matibabu bure kwa wazee.

Waziri wa afya, maendeleo ya jamii, jinsia, wazee na watoto, Mhe. Ummy Mwalimu, akizungumza na watumishi wa hospitali ya rufaa ya mkoa wa Mtwara, Ligula.

Waziri wa afya, maendeleo ya jamii, jinsia, wazee na watoto, Mhe. Ummy Mwalimu, akimsikiliza mzee kutoka kata ya Nanguruwe.

Na Juma Mohamed, Masasi.

SERIKALI imezitaka halmashauri nchini kutekeleza kwa vitendo nia ya Rais wa Jamhuri ya Muungano wa Tanzania, Mhe. John Pombe Magufuli ya kutaka kutatua changamoto zinazowakabili wazee katika kupata huduma za afya, kwa kuwapatia kadi za kupata matibabu bure.

Akizungumza katika hospitali ya wilaya ya Masasi, Mkomaindo, waziri wa afya, maendeleo ya jamii, jinsia, wazee na watoto, Mhe. Ummy Mwalimu, alisema, Rais aliamua kwa makusudi kuweka jina la wazee katika wizara ya afya kwa ajili ya kutambua kuwa ni sehemu ya maendeleo ya jamii.

“Na wazee kwakweli kero yao kubwa wao wala hawana shida ya kazi, lakini ni mbili uhakika wa kipato na suala la matibabu..kwahiyo kama sisi sekta ya afya tukijitahidi kuhakikisha wanapata matibabu, tunawaachia wenzetu wa wizara ya fedha wao wafanye kazi ya kuwapa pensheni, na kazi imeshaanza kufanyika kwahiyo hili kwakweli ni suala lakujipongeza..” alisema.

Waziri wa afya, maendeleo ya jamii, jinsia, wazee na watoto, Mhe. Ummy Mwalimu, akimsikiliza mzee kutoka kata ya Nanguruwe.

Aidha, waziri aliipongeza halmashauri ya mji Masasi kwa kuweza kuwalipia gharama za matibabu kupitia Mfuko wa Afya ya Jamii (CHF) wazee 780 ambao ni sawa na asilimia 20 ya wazee 3,905 waliotambuliwa kwa mwaka wa fedha wa 2015/2016.

Alisema, pamoja na kuonesha mfano nzuri kwa kuweza kulipia idadi hiyo lakini bado wanatakiwa kuongeza juhudi ili angalau waweze kufikia asilimia 50 ya kuwalipia wazee ambao wanakabiliwa na changamoto kubwa katika kupata matibabu huku wengi wao wakiwa na kipato duni.

“Kwakweli ni changamoto kubwa kwasababu na Mhe. Rais ameamua kuwapa hadhi wazee..kwahiyo ndio maana wizara hii angesema tu hatamki wazee, ukisema maendeleo ya jamii unazungumzia wanawake, watoto na wazee lakini Mhe. Rais kwa ajili ya kuonesha msisitizo wake akaamua wizara iwe na jina la wazee..” aliongeza.