AMCOS Mtwara zatakiwa kutoa mchanganuo mauzo ya korosho.

Mkuu wa mkoa wa Mtwara, Halima Dendego.

Na Juma Mohamed, Mtwara.

VYAMA vya msingi mkoani hapa (AMCOS) vimetakiwa kuwa wawazi kwa kutoa mchanganuo wa mapato na matumizi kwa wakulima wa zao la korosho baada ya kufanyika kwa minada ili kuondoa malalamiko kwa baadhi ya wakulima hao ambao hawaridhishwi na wanachokipata baada ya mauzo ya zao hilo.

Akizungumza na waandishi wa habari, mkuu wa mkoa wa Mtwara, Halima Dendego, alisema bado hajaridhishwa na utendaji kazi kwa baadhi ya vyama hivyo na kuahidi kuchukua hatua kwa vyama ambavyo vitashindwa kutekeleza agizo hilo kuanzia msimu ujao wa korosho.

“Kwahiyo Sitegemei chama chochote cha msingi kwanza kwenda kumlipa mkulima bila kumpa taarifa ya mapato na matumizi, lakini kwasababu nalifuatilia kwa karibu na hua Napata taarifa kutoka maeneo yote kupitia kwenye ofisi zetu rasmi na wakulima wenyewe, bado nikiri kuna maeneo vyama vyetu va msingi vinaenda kinyume na tulivyokubaliana..” alisema.

Aliwataka wadau na viongozi wengine wa ngazi za chini kuhakikisha wanalinda masilahi ya mkulima ambaye ndio chimbuko la kupanda kwa uchumi wa mkoa ambao kwa kiasi kikubwa unachangiwa kwa kufanya vizuri kwa zao la korosho.

Mkuu wa mkoa wa Mtwara, Halima Dendego.

“Tukisimama sisi viongozi wote na hasa wale maafisa wetu wa Ugani na ushirika mimi naamini kabisa wakulima wetu hawatofanyiwa visivyo, lakini jamii hii wapo waliopotoka, mimi nasema hatutacheka nao tutachukua hatua kali dhidi yao kwasababu tunataka angalau mkulima wakati tunajipanga kuelekea kubangua korosho basi afaidike na hiki kidogo ambacho kinapatikana..” alisema.

Alisema, amewaagiza maafisa ugani, wakurugenzi na wakuu wa wilaya wote kupita katika kila chama cha msingi kwa ajili ya kukagua taarifa na kujua kama wakulima wameridhia na walichokipata na kama bado ifanyike jitihada za dhiada kuweza kuwaridhisha.

Aidha, alisema katika msimu huu uliomalizika, mkoa umeweza kufika na kuvuka lengo kwasababu umeweza kukusanya jumla ya tani 100,006 huku lengo ambalo ulijiwekea ilikuwa ni kukusanya tani 90,000.

“Na kwa jinsi tunavyoijua korosho yetu tatizo kubwa ilikuwa ni bei kwa mwaka huu mwenyezimungu amejaalia bei imeongezeka, lakini haijaja kwa kuongezeka tu yenyewe imekuja kwa ajili ya kubanana lakini pamoja ni hilo ongezeko bado sijaridhika, kama tutabangua korosho Mtwara hiyo bei tunayoiongelea sasa hivi mkulima atapata mara dufu yake.” Aliongeza Dendego.