Huduma za matibabu za simama kwa muda Ligula..wawili wakamatwa tukio la kupigwa daktari.

Madaktari na wauguzi wa hospitari ya rufaa ya mkoa wa Mtwara, Ligula, wakiwa katika mgomo wakishinikiza serikali kuyafanyia kazi madai yao ikiwa ni pamoja na kuwakamata na kuwachukulia hatua watu wanaodaiwa kumpiga daktari wa hospitari hiyo, dkt. Dickson Sahini.

Madaktari na wauguzi

Waziri wa afya, maendeleo ya jamii, jinsia, wazee na watoto, Mhe. Ummy Mwalimu, akiongea na watumishi wa hospitali ya rufaa ya mkoa wa Mtwara, Ligula.

Mhe. Ummy Mwalimu, akiwa katika ziara katika kituo cha afya cha Nanguruwe, halmashauri ya wilaya ya Mtwara.

Mhe. Ummy Mwalimu, akimtengenezea mgonjwa chandarua katika wodi ya wazazi katika kituo cha afya cha Nanguruwe.

Mhe. Ummy Mwalimu akiongea na mgonjwa katika wodi ya wazazi katika kituo cha afya cha Nanguruwe, alikokwenda kwa ajili ya ziara ya kikazi kukagua utendaji kazi na kusikiliza kero za wananchi.

Mhe. Ummy Mwalimu, akimwangalia mtoto mchanga katika wodi ya wazazi, kituo cha afya cha Nanguruwe.

Mhe. Ummy Mwalimu akiwa na mkuu wa wilaya ya Mtwara, Fatma Ally, wakisikiliza kero za wananchi katika kituo cha afya cha Nanguruwe.

Mhe. Ummy Mwalimu, akimsikiliza mzee katika kituo cha afya cha Nanguruwe, ambako alisisitiza wazee wote hasa kuanzia miak 60 kupatiwa kadi za bima ya afya kwa ajili ya kutibiwa bure. Aliorodhesha majina ya wazee 10 na wanawake 10 wenye watoto wadogo kwa ajili ya kupatiwa kadi za bima ya afya za CHF.

Add caption

Na Juma Mohamed, Mtwara.

HUDUMA za matibabu katika hospitali ya rufaa ya mkoa wa Mtwara, Ligula, zilikosekana kwa muda baada ya madaktari na wauguzi wa hospitali hiyo kugoma kwa kushinikiza kutatuliwa kwa madai yao ikiwamo kuvitaka vyombo vya ulinzi na usalama kuwatia nguvuni watu wanaodaiwa kumpiga na kumdhalilisha daktari wa hospitali hiyo, dkt. Dickson Sahini.

Wakizungumza mapema leo hospitalini hapo, baadhi ya wagonjwa walisema kuwa toka wamewasili hakuna huduma yoyote ya matibabu iliyotolewa kwao zaidi ya kupokelewa mapokezi na kupatiwa cheti kisha kuambiwa wasubiri huku kukiwa hakuna dalili zozote za kushughulikiwa.

Baadhi ya wagonjwa wakisubiri huduma katika jengo la Kliniki ya macho katika hospitali ya rufaa ya mkoa wa Mtwara, Ligula, huku madaktari wakiwa na mgomo.

“Tumefika ‘reception’ tukaambiwa kwamba subirini kuna kitu kinataka kutokea, tuka kaa kama baada ya nusu saa hivi ndio baadae wakatukatisha vyeti lakini vyeti tumekata mpaka sasa hivi hatujamwona daktari wala nini na ule mlango umefungwa kabisa..sasa mimi nahitaji kwenda nyumbani lakini pale pamefungwa na bima yangu ya afya ipo pale mimi naondokaje kurudi nyumbani..” alihoji Salma Salumu.

Aliwaomba madaktari kutoa huduma kwa wagonjwa na kwamba kama kuna matatizo wasiyahusishe na wagonjwa wengine ambao hawahusiki kwasababu wanaweza kusababisha athari kubwa kwao kwani wapo ambao wanahitaji huduma za dharula.

Naye, fundi Salumu ambaye alikuwa anasubiri kutibiwa jicho alisema anapata maumivu kwasababu aliafanyiwa upasuaji na kushonwa hivyo aliwasili hospitalini hapo kwa ajili ya kufanyiwa uchunguzi zaidi na kuweza kupatiwa matibabu na kuondolewa uzi ambao alishonwa awali.  

Wagonjwa wakisubiri huduma.

“Sasa hivi jicho limeshaelemewa kwasababu linakiwa kufanyiwa ‘checking’ nadhani wale wanapofanya ‘operation’ wanashona, sasa uzi unaniathiri kule kwenye macho, sasa leo nilitakiwa niutowe huo uzi lakini hapa hakuna huduma na wauguzi wote wako nje na nimekuja hapa nimeweka cheti change kwenye boksi mle wakaniambia hapa hakuna huduma wauguzi hawapo..” alisema.

Wakizungumza mbele ya waziri wa afya, maendeleo ya jamii, jinsia, wazee na watoto, Mhe. Ummy Mwalimu, baadhi ya madaktari wa hospitali hiyo waliopata nafasi ya kueleza madai yao walisema kuwa hali ya usalama wao iko mashakani kutokana na kutokuwapo kwa ulinzi wa kutosha hospitalini hapo huku wengine wakipata vitisho kutoka kwa wananchi.

Watumishi wa hospitali ya rufaa ya mkoa wa Mtwara, Ligula, wakiwa katika kiako na waziri wa afya, maendeleo ya jamii, jinsia, wazee na watoto, Mhe. Ummy Mwalimu kwa ajili ya kuwasilisha malalamiko yao na kupokea tamko la serikali juu ya tukio la kupigwa kwa daktari wa hospitali hiyo dkt. Dickson sahini.

Dkt. Hindi Mastai, alisema usalama wao uko hatarini kwasababu wananchi wanaamini kuwa madaktari wanafanya kusudi wanapojaribu kuwaeleza mapungufu yaliyopo kwa baadhi ya huduma kwasababu waliaminishwa na viongozi wa serikali kuwa wanaweza kupata kila hitaji la matibabu ikiwa kama hospitari ya rufaa.

Alisema, hali imezidi kuwa mbaya kwao hasa baada ya ziara ya waziri mkuu wa jamhuri ya muungano wa Tanzania, Mhe. Kasim Majaliwa, ambaye alidai kuwa alipewa taarifa ambazo sio sahihi na baadhi ya viongozi waliompokea.

Dkt. Hindi Mastai, akiwasilisha hoja.

“Kwahiyo ile kauli ya waziri mkuu kwamba ‘you will not change Ligula, Ligula will change you’ napenda niwaambie kwamba waziri mkuu kweli itamchenji kwasababu watu wanalindana, kwasababu ukiangalia matatizo ya Ligula, upande wa vitendea kazi vya hospitali inafahamika na taratibu ziko wazi hazifanyiki kwasababu watu wanalindana kule juu..” alisema na kuongeza;

“Watu wanalalamikia ubadhirifu wa fedha za hospitali, maana yake mpaka muhasibu wa mkoa anahusika, upande wa ubadhirifu wa majengo mhndisi anahusika, wafanyakazi wengi wanalalamikia masilahi yao, vyeo, likizo..” aliongeza.

Akiongea kwa hisia kali, dkt. Hindi, alisema hospitali hiyo ina watumishi wengine wamekwa katika vitengo ambavyo hawakustahili kuwapo kutokana na taaluma zao kutokidhi lakini ni kutokana na kulindwa na baadhi ya wakubwa ambao hata hivyo hakuwataja.

Alisema, hospitali inakosa kuwa na mabomba ya sindano yenye ukubwa wa cc 10, inakosa kichomea taka hatarishi na hata mitambo ya kukusanya mapato iliyopo haikidhi kwasababu pesa zinazokusanywa kwa mwezi hazilingani na hadhi ya hospitali.

“Ile mitambo ya kukusanya makusanyo ni yakisanii tu, ni watu wanatumia kuiba, hospitali ya mkoa gani inakusanya 300,000 mhe? Wakati tuna wagonjwa zaidi ya 50 au 70 yani wakuwahi wanawapa ‘information wrong’ mnakuja mnatufokea sisi..lakini mimi Hindi hata wakinifukuza kazi nitabaki kuwa dokta na ‘I will go anywhere’ na I’m not afraid of anybody here’..alisema dkt. Hindi.

Asia Mussa, alisema kitendo alichofanyiwa dkt. Dickson Sahini ni cha udhalilishaji na hakuna daktari yeyote aliyefurahishwa nacho na kwamba kwa sasa hawezi kufanya kazi yake kwa hari kama awali.

Alimuomba waziri kuangalia namna ya kuwapatia usafiri wa basi ambalo litawasaidia kuwabeba wanapokwenda na kurudi kazini kama ilivyo kwa baadhi ya taasisi jambo ambalo litasaidia katika kulinda usalama wao.

Akitoa tamkoa la serikali juu ya tukio la kupigwa kwa daktari, Mhe. Ummy Mwalimu, alivitaka vyombo vya dola kutosita kuwachukulia hatua wananchi wote wanaokwenda kinyume na matakwa ya sheria ili kuwahakikishia watoa huduma za afya usalama na amani wakati wa kutekeleza wajibu wao.

“Kwahiyo ninawasihi wananchi wote wanaopatiwa huduma katika vituo vyote vya afya nchini kuacha maramoja tabia ya kujichukulia sheria mkononi na kufanya vitendo vinavyoweza kuwakwaza watumishi wa afya..kwavile inchi yetu inafuata misingi ya utawala unaozingatia sheria, ni vyema wananchi wakafuata taratibu zilizowekwa wanapohisi kwamba hawakupatiwa huduma za afya kama wanavyostahili..” alisema.

Waziri aliwaomba madaktari hao kurejesha huduma kwa wagonjwa hospitalini hapo na kuahidi kuzifanyia kazi changamoto zao ambazo waliziwasilisha kwake huku akiwaambia kuwa serikali ya awamu ya tano imejipanga vyema kuhakikisha inapunguza kwa kiasi kikubwa changamoto hizo ambapo wizara inatarajia kupokea madaktari 10,000 kati ya 30,000 ambao iliomba.

Waziri wa afya, maendeleo ya jamii, jinsia, wazee na watoto, Mhe. Ummy Mwalimu, akiongea na watumishi wa hospitali ya rufaa ya mkoa wa Mtwara, Ligula.

Madaktari walikubali kurudi kazini na kuendelea kuwahudumia wananchi ambao walikosa huduma kwa muda hospitalini hapo.

Aidha, kamanda wa polisi mkoa wa Mtwara, Kamishna Msaidizi wa Polisi (ACP) Henry Mwaibambe, alisema watuhumiwa wawili wanaodaiwa kutekeleza tukio hilo tayari wamekamatwa na wanatarajiwa kufikishwa mahakani haraka.

Alisema, walikamatwa usku wa juzi kuamkia jana wakiwa katika harakati za kutaka kutoroka na kukimbilia nje ya nchi.

“Tumejipanga vizuri kimkoa na nyie mnafahamu na nadhani mnatuunga mkono, hata hao tuliowakamata walikuwa wanajiandaa kutoroka kwenda nje ya nchi..tumewakamatia mahali pabaya sana lakini ni usiku wa saa tisa, kwahiyo hatuwezi kushindwa naomba tu madaktari mtupe ushirikiano ..” alisema Mwaibambe.

Waziri alitembelea kituo cha afya cha Nanguruwe, halmashauri ya wilaya ya Mtwara akiongozwa na mwenyeji wake mkuu wa wilaya hiyo, Fatma Ally, ambako huko alikutana na changamoto kadhaa zaidi ikiwa ni ukosefu wa maji hospitalini hapo.

Katika kuhakikisha changamoto hiyo inatatuliwa, mkuu wa wilaya alimtaka mkurugenzi wa halmashauri hiyo Nachoa Zacharia, aahidi mbele ya waziri ni lini maji yatapatikana hospitalini hapo ambapo mkurugenzi huyo alisema huduma hiyo itaanza kupatikana katikati ya mwezi Aprili mwaka huu.