Masasi yafikia asilimia 53 ya upandaji Miti.

Mwenyekiti wa Halmashauri ya mji wa Masasi, Sospeter Nachunga (Aliyeshika mche wa Mti) akipanda mti.

Na Juma Mohamed.

Halmashauri ya mji Masasi kwa kushirikiana na wananchi inatarajia kupanda miti 395,170.00 ya aina tofauti, katika maeneo mbalimbali wilayani humo kutoka kwa wazalishaji wa Halmashauri hiyo, ambapo hadi hivi sasa imefikia asilimia 53.2 ya malengo hayo.

Hayo yamezungumzwa na mwenyekiti wa Halmashauri hiyo, Sospeter Nachunga, wakati akitoa taarifa fupi ya siku ya upandaji Miti ambapo, alibainisha kuwa mkakati huo umepengwa kutekelezwa ndani ya msimu huu wa 2015/2016.

Alisema, Tanzania ni mojawapo ya nchi duniani zinazo kabiliwa na ongezeko la joto, hewa ukaa na upungufu wa mvua, ambadiliko ambayo yamesababishwa na uharibifu wa kimazingira kama vile ukataji wa miti kwa matumizi mbalimbali kulikopelekea vyanzo vya maji kukauka katika maeneo mengi duniani, Tanzania, na hata katika eneo  la Halmashauri hiyo.

Mwenyekiti wa Halmashauri ya mji wa Masasi, Sospeter Nachunga (Aliyeshika mche wa Mti) akipanda mti.

“Kutokana na hali hii ambayo ni tishio kwa vizazi vijavyo nchi yetu imejiwekea utaratibu wa kupanda miti kila mwaka ambapo kila Wilaya inatakiwa kupanda miti isiyopungua 1,500,000.. ndugu wananchi zoezi hili ni jukumu letu sote kuhakikisha tunapanda miti katika maeneo yetu.” Alisema.

Aidha Mkoa wa Mtwara umeweka utaratibu wa maadhimisho ya upandaji miti kwa mzunguko katika wilaya zake saba. Katika mzunguko huo Halmashauri ya mji Masasi itakuwa mwenyeji wa maadhimisho haya kimkoa mwaka 2021/2022.