Wajumbe MAMCU wagomea mkutano kudai posho.

 

Wajumbe wa mkutano mkuu wa kawaida wa Chama Kikuu cha Ushirika Masasi-Mtwara (MAMCU), wakiwa nje ya ukumbi wa Emirate, wilayani Masasi, baada ya kugomea kuingia ukumbini wakidai kuongezwa posho.

Mmoja ya mjumbe wa mkutano mkuu wa kawaida wa Chama Kikuu cha Ushirika Masasi-Mtwara (MAMCU), David Mng'andile, akiongea na waandishi wa habari (hawapo pichani), kwa niaba ya wenzake kuelezea misimamo yao juu ya madai ya posho wanayo dai

 

Na Juma Mohamed.

WAJUMBE wa mkutano mkuu wa kawaida wa Chama Kikuu cha Ushirika cha Masasi-Mtwara (MAMCU), jana waligomea kuingia ndani ya ukumbi wa mkutano baada ya kutoridhishwa na kiasi cha posho waliolipwa kwa ajili ya mktano huo wa siku moja.

Wajumbe hao walikuwa na kauli moja ya kuto ingia ukumbini mpaka uongozi wa chama hicho utakapoakubali kuongeza posho hiyo ambayo katika mkutano mkuu uliopita uliridhia kuwa iongezwe kutoka sh. 70,000 mpaka kufikia sh. 100,000 ambayo hata hivyo haikutekelezwa na baadala yake iliongezwa mpaka kufikia sh. 80,000.

“Mkutano mkuu walisema kwa siku ni sh. 100,000 na muda wa siku mbili ni 200,000 na sisi tunavyokuja hapa tunakuwa na mktano wa siku tatu yani semina na mkutano wa siku mbili kwahiyo tunalipwa kwa siku tatu na tulikubaliana hivyo, lakini leo tumekuja tumeambiwa haiwezekani na hatukuambiwa ila tumekabidhiwa tu..sasa kutokana na hayo sisi hatutaki.” Alisema, David Mng’andile, mkaazi wa wilayani Masasi.

Ukumbi wa mikutano wa Emirate wilayani Masasi, ukiwa hauna watu baada ya awali wajumbe kugoma kuingia ndai kwa ajili ya kuanza mkutano

 Alisema, waliamua kupokea posho hiyo ya sh. 190,000 ikijumuisha na gharama za usafiri ambayo ni ya siku mbili kwasababu waliwasili wilayani Masasi ambako ndiko mkutano huo ulipofanyika, siku moja kabla ya mkutano na kwamba imewasaidia kulipia gharama za malazi na chakula na kwamba hata wakiambiwa wazirudishe hawatokubali huku wakiendelea kudai kiasi kilichobaki.

“Tumekuja hapa na njaa zetu, tumekuja na nauli zetu na tumekula chakula kwa fedha hiyo kwasababu tumeshinda hapa jana na leo mpaka sasaivi bado hatujanywa chai na tunangoja hiyo iliyobaki, kama wakisema turudishe haturudishi kwasababu wao wanapeana posho lakini sisi wanachama wanatupangia wakati sisi ndio wenye kuamua..” aliongeza.

 

Naye Veronica Hussein, kutoka chama cha Umoja ni Nguvu (AMCOS), alisema wana haki ya kudai fedha hizo kwasababu tayari zilishapitishwa na mkutano mkuu na kuwekwa kwenye makabrasha ambayo yamegawiwa kwa wajumbe wote wa mkutano huo, na kwamba bajeti nzima ya mkutano ni sh. Milioni 72.

“Kwakeli kupata haki zetu ni sawasawa kwasababu ukiangalia gharama walioipanga ni milioni 72, na hela tuliyopata ni 160,000..lakini mpaka sasaivi hakuna kinachoeleweka, mimi na wajumbe wenzangu tunachotaka ni haki yetu na sisi lengo letu ni moja na hatuwezi kubadilika..” alisema.

Baadaye wajumbe hao walikubali kuingia ukumbini kutokana na ombi lililotoka kwa viongozi wao wa chama la kutaka hoja zao wazizungumze ndani ya kikao, ili kuokoa muda.

Wajumbe wa mkutano mkuu wa kawaida wa 16 wa Chama Kikuu cha Ushirika Masasi-Mtwara (MAMCU), wakiwa ndani ya ukumbi wa Emirate, baada ya kukubali kuingia kwa ajili ya kuanza mkutano

Naye, Mrajisi msaidizi wa chama hicho, John Henjewele, aliwataka wajumbe hao kuwa watulivu na kuzingatia maamuzi ya kisheria ambayo yaliamriwa kulingana na uwiano wa mapato na matumizi yanayopatikana kwa mwaka katika chama hicho, kiasi cha kumfanya Mrajisi mkuu kupunguza posho hiyo na kusaini kiasi cha sh. 80,000.

Baada ya mvutano huo kati ya wajumbe na viongozi wa chama, hatimaye mkuu wa mkoa wa Mtwara Halima Dendego, ambaye ndio alikuwa mgeni rasmi katika mkutano huo, alihitimisha kwa kutoa pendekezo kwamba kuwe na maridhiano ya pamoja kati ya wajumbe na meza kuu kwamba pendekezo la kulipwa sh. 100,000 lipelekwe kwa Mrajisi mkuu kwa ajili ya kuidhinishwa.

Mkuu wa mkoa wa Mtwara, Halima Dendego, akifafanua jambo katika  mkutano mkuu wa kawaida wa 16 wa Chama Kikuu cha Ushirika Masasi-Mtwara (MAMCU), uliofanyika jana katika ukumbi Emirate, wilayani Masasi.

Alisema kutokana na kuwa na idadi kubwa ya wajumbe wanaotaka posho iwe kiasi hicho ambao ni zaidi ya robo tatu ya wajumbe wote, basi kuwe na wigo wa kupendekeza kiasi hicho ili mrajisi awe na kazi ya kuidhinisha tu na kwamba kutokana na namna alivyoona mapato yao, hakuna sababu ya kushindwa kulipana kiasi hicho cha fedha.

“Katika muda mfupi ambao nimepitia mapato yenu na matumizi, mimi sioni wapi mutashindwa kulipana hiyo 100,000..lakini kwasababu tunataka twende kwa utaratibu bila kuvunja sheria, wekeni wigo sasa makamu akapitishe maana mnazo hela za kutosha, angalau kwa hiyo 100,000 wajumbe wakija wajadili vya kutosha maana na maisha yenyewe sasa yamepanda..kwahiyo wala hili halihitaji malumbano wala taarifa, wekeni azimio meza ikapitishe hilo linawezekana..” alisema.

Mkuu wa mkoa wa Mtwara, Halima Dendego (watatu kushoto), akiwa katika meza kuu katika mkutano mkuu wa kawaida wa 16 wa Chama Kikuu cha Ushirika Masasi-Mtwara (MAMCU), uliofanyika jana wilayani Masasi.

 Meza ilikubali mapendekezo ya mkuu wa mkoa, na kuwataka wajumbe wawe wavumilivu kwa siku moja ili jumatatu ya Septemba 7 mwaka huu wapatiwe kiasi cha fedha kilichosalia kukamilisha sh. 100,000 kama walivyopendekeza ambacho ni sh. 40,000 ambazo watapokea katika jengo la Ushirika mkoa wa Mtwara, jambo ambalo waliliunga mkono.